Génesis 30 - Papiamentu Bible 2013

¹ Ora Raquel a realisá ku e no a duna Yakob yu ainda, el a bira yalurs riba su ruman. El a bisa Yakob: ‘Duna mi yu sino mi no ke biba mas!’

² E ora ei Yakob a rabia ku Raquel: ‘Mi ta Dios anto? T'E no a laga bo haña yu!’

³ Raquel a kontestá: ‘Mira, ata mi kriá Bilha. Drumi kuné i lag'é haña yu den mi skochi; ya mi por bira mama pa medio di dje.’

⁴ Asina Raquel a duna Yakob e katibu Bilha komo esposa. Yakob a drumi ku Bilha.

⁵ Bilha a sali na estado i a duna Yakob un yu hòmber.

⁶ E ora ei Raquel a bisa: ‘Mi ta yama e yu Dan, pasobra Dios a trata mi hustu. El a skucha mi i a duna mi un yu hòmber.’

⁷ Despues Raquel su kriá Bilha a bolbe sali na estado i a duna Yakob di dos yu hòmber.

⁸ Raquel a bisa: ‘E yu akí mi ta yama Naftali, pasobra mi a hiba un lucha pisá kontra mi ruman muhé i mi a sali ganá.’

⁹ Ora Lea a ripará ku el a keda poko tempu sin haña yu, el a bisa Yakob: ‘Ata mi kriá Zilpa. Drumi kuné.’

¹⁰ Ora Zilpa a duna Yakob un yu hòmber,

¹¹ Lea a bisa: ‘Esta suerte!’ I el a yama e yu Gad.

¹² Despues Zilpa a bolbe duna Yakob un yu hòmber.

¹³ E ora ei Lea a bisa: ‘Mi ta sinti mi felis. Awor tur muhé lo bisa ku mi ta felis. P'esei mi ta yama e yu Asher.’

¹⁴ Un dia Ruben a bai kunuku. Tabata durante di kosecha di trigo. El a haña poko fruta di mandrágora i a trese nan pa su mama Lea. Ora Raquel a mira e frutanan, el a bisa Lea: ‘Por fabor, duna mi poko di e frutanan di mandrágora ku bo yu a trese pa bo.’

¹⁵ Pero Lea a kontestá: ‘No ta basta ku bo a kita mi kasá for di mi? Anto awor bo ke kita e frutanan di mandrágora di mi yu tambe?’ Raquel a proponé: ‘Bon, a kambio di e frutanan di bo yu, Yakob mag drumi ku bo awe nochi!’

¹⁶ Lat den atardi ora Yakob tabata bini for di kunuku, Lea a sali bai top'é i a bis'é: ‘Awe nochi bo ta drumi ku mi, pasobra mi a kumpra bo ku e frutanan di mandrágora di mi yu.’ E anochi ei Yakob a drumi ku Lea.

¹⁷ Dios a skucha orashon di Lea. Lea a sali na estado i a haña su di sinku yu hòmber.

¹⁸ E ora ei Lea a bisa: ‘Dios a rekompensá mi, pasobra mi a duna mi kasá mi kriá. P'esei mi ta yama e yu Isakar.’

¹⁹ Despues Lea a bolbe sali na estado di Yakob i el a haña di seis yu hòmber.

²⁰ Lea a bisa: ‘Dios a duna mi un bunita regalo. Awor sí mi kasá ta keda serka mi, pasobra mi a dun'é seis yu.’ P'esei el a yama e yu Zebulon.

²¹ Despues Lea a haña un yu muhé ku el a yama Dina.

²² E ora ei Dios a kòrda di Raquel. El a skucha su orashon i a lag'é haña un yu.

^23-24 Ora su yu hòmber a nase el a bisa: ‘Dios a kita mi bèrgwensa. Mara Dios por duna mi un yu hòmber mas.’ P'esei el a yama e yu Jozef.

Triki di Yakob i Laban

²⁵ Despues di nasementu di Jozef, Yakob a bisa Laban: ‘Laga mi bai mi mes tera bèk awor.

²⁶ Duna mi mi kasánan i mi yunan; ya mi por bai, no ta pa nan mi a sirbi bo? Laga mi bai. Bo sa kon duru mi a traha pa bo.’

²⁷ Pero Laban a kontest'é: ‘Por fabor, keda aki. Na señal ku mi a haña mi a ripará, ku SEÑOR a bendishoná mi pa bo motibu.

²⁸ Bisa mi kuantu bo ke, mi ta paga bo.’

²⁹ Yakob a kontestá: ‘Bo no por laga di sa kon duru mi a traha pa bo i kon mi a kuida bo bestianan.

³⁰ Promé ku mi a bini bo no tabatin hopi bestia, pero despues nan a rende, komo ku for di dia mi a yega SEÑOR a bendishoná bo den tur loke mi a hasi. Ki dia mi ta haña chèns di kuminsá traha pa mi mes famia?’

³¹ E ora ei Laban a bisa: ‘Kuantu bo ke antó pa mi paga bo?’ Yakob a rospondé: ‘No paga mi nada. Mi ta sigui kuida bo bestianan basta bo bai di akuerdo ku e siguiente proposishon:

³² Laga mi chèk bo karnénan i bo kabritunan awe. Mi ta apartá tur ku ta pintá òf ku tin mancha. Tur karné pretu i tur kabritu pintá òf ku mancha mi ke komo pago.

³³ Lo ta fásil pa bo chèk den futuro si mi ta honesto òf nò: si bo haña entre mi bestianan kabritu ku no tin mancha òf ku no ta pintá, òf bo haña karné ku no ta pretu, bo sa mesora ku ta hòrtá nan ta.’

³⁴ Laban a kontestá: ‘Ta bon; mi ta bai di akuerdo!’

³⁵ E mes dia ei Laban a apartá tur chubatu ku strepi òf ku mancha, tur kabritu pintá òf ku mancha i tur ku tabatin pida blanku na nan kurpa. Tambe el a apartá tur karné pretu i a laga su yunan kuida e bestianan akí.

³⁶ Despues el a hiba e bestianan for di kaminda Yakob tabata, na un distansia di tres dia kana. Yakob di su banda a sigui kuida e sobrá karné- i kabritunan di Laban.

³⁷ Awor el a kòrta taki bèrdè for di tres tipo di palu: álamo, mangel i kastaña. El a kaska e takinan pa nan a keda ku strepi blanku.

³⁸ Kaba el a pone e takinan akí den e bakinan ku e bestianan tabata bebe awa. E bestianan tabatin kustumber di par ora nan tabata bin bebe awa.

³⁹ Si e bestianan par den serkania di e takinan, nan tabata wèrp lamchi pintá, ku mancha òf ku strepi.

⁴⁰ Yakob tabata apartá e lamchinan ei. Despues e tabata laga nan par ku tur esnan ku strepi i tur esnan pretu di Laban. Asin'ei Yakob a forma su kria di bestia, ku e tabata tene apartá for di e kria di Laban.

⁴¹ Ki ora ku e bestianan mas fuerte tabata par, Yakob tabata pone e takinan den nan baki di awa pa tanten nan ta par nan mira e takinan.

⁴² Ora e mira e bestianan suak yega e no tabata hasi esei. P'esei Laban a haña tur e bestianan suak i Yakob a haña tur e bestianan mas fuerte.

⁴³ Asin'ei dia pa dia Yakob tabata bira mas riku. E tabatin hopi karné, kabritu, katibu, kamel i buriku.