Génesis 27 - Papiamentu Bible 2013

Yakob ta gaña Isak i kita bendishon for di Esou

¹ Isak a bira mashá bieu. Su bista a bai asina atras ku e no tabata mira mas. El a yama su yu mayó Esou i a bis'é: ‘Mi yu!’ Esou a kontestá: ‘Ata mi akí, Papa.’

² Isak a sigui papia: ‘Bo mes ta mira ku mi ta bieu kaba i ku mi por muri un ora pa otro.

³ Kohe bo bog i bo flechanan; bai yag den mondi i tira un bestia pa mi.

⁴ Prepará un dushi kuminda manera mi gusta i tres'é pa mi kome. Ora mi kaba di kome mi ta bendishoná bo promé ku mi muri.’

⁵ Rebeka a tende tur loke Isak a bisa Esou. Asina Esou a sali bai yag,

⁶ Rebeka a bisa Yakob: ‘Awor ei mi a tende bo tata papia ku bo ruman Esou.

⁷ El a bis'é: “Bai yag den mondi i tira un bestia pa mi; despues prepar'é pa mi kome. Ora mi kaba di kome mi ta bendishoná bo den presensia di SEÑOR, promé ku mi muri.”

⁸ Wèl, mi yu, skucha bon loke mi ta bai bisa bo:

⁹ “Bai kaminda e karné i e kabritunan ta i trese dos lamchi di kabritu pa mi. Wak pa nan ta gordo. E ora ei mi ta prepará un kuminda dushi manera bo tata gusta.

¹⁰ Bo ta hib'é pa bo tata kome, ya e ta bendishoná abo promé ku e muri.” ’

¹¹ Pero Yakob a bisa su mama: ‘Bo sa ku Esou su kurpa ta tur na kabei i di mi no.

¹² Si mi tata fula mi brasa, lo e haña sa ku mi ta purba nèk e i en bes di bendishoná mi lo e maldishoná mi.’

¹³ Pero su mama a kontest'é: ‘Laga e maldishon kai riba mi, mi yu. Awor tende di mi i bai buska e kabritunan.’

¹⁴ E ora ei Yakob a bai buska e kabritunan i a trese nan pa su mama. Rebeka a prepará un dushi kuminda manera e tata tabata gusta.

¹⁵ El a kohe e mihó pañanan ku su yu mayó Esou tabatin na e kas ei i a laga su yu mas chikí Yakob bisti nan.

¹⁶ El a tapa brasa i e parti di garganta di Yakob ku no tabatin kabei ku kueru di e kabritunan.

¹⁷ Despues el a duna Yakob e kuminda dushi i e pan ku el a traha.

¹⁸ Yakob a bai serka su tata i bis'é: ‘Papa.’ E tata a kontesta: ‘Ya; ta kua di mi yunan?’

¹⁹ ‘T'ami, bo yu mayó Esou; mi a hasi loke bo a ordená mi. Lanta sinta pa papa kome karni di e bestia ku mi a yag, pa despues papa bendishoná mi.’

²⁰ Isak a bisa su yu: ‘Kon bo a hasi hañ'é asina lihé?’ El a kontestá: ‘SEÑOR, bo Dios, a yuda mi.’

²¹ Isak a bisa Yakob: ‘Yega serka, mi yu; laga mi fula bo brasa pa mi sa sigur ku ta Esou bo ta.’

²² Yakob a hala serka. E tata a fula su brasa i a bisa: ‘E stèm ta stèm di Yakob, pero e mannan si ta man di Esou.’

²³ E no a rekonos'é, pasobra Yakob su mannan tabata tur na kabei meskos ku di su ruman Esou. E ora ei Isak tabata dispuesto pa dun'é su bendishon. Tòg el a bolbe puntra:

²⁴ ‘Bo ta mi yu Esou di bèrdat?’ Yakob a rospondé: ‘Sí!’

²⁵ ‘Sirbi mi, mi yu, ya mi ta kome karni di loke bo a yag, pa despues mi bendishoná bo.’ El a sirbi su tata e kuminda i a dun'é biña. Isak a kome i bebe.

²⁶ Despues el a bisa Yakob: ‘Bini mas serka i duna mi un sunchi, mi yu.’

²⁷ Yakob a hala serka i a sunchi su tata. Ora Isak a sinti holó di su pañanan, el a bendishon'é ku e palabranan: ‘Sí! Holó di mi yu ta manera holó di un kunuku ku SEÑOR a bendishoná.

²⁸ Dios duna bo serena for di shelu; i hasi bo kunukunan fértil ku trigo i wendrùif na abundansia.

²⁹ E pueblonan lo sirbi bo i e nashonnan lo bùig pa bo. Goberná bo mes rumannan; desendiente di bo mama lo bùig pa bo. Esun ku maldishoná bo lo ta maldishoná i esun ku bendishoná bo lo ta bendishoná.’

³⁰ Asin'ei Isak a bendishoná Yakob. Yakob no a kaba di sali serka su tata ku Esou a yega for di yag.

³¹ E tambe a prepará un dushi kuminda, hib'é pa su tata i bis'é: ‘Lanta sinta, Papa, i kome karni di e bestia ku bo yu a yag pa bo, pa despues bo bendishoná mi.’

³² Isak a puntr'é: ‘Ken bo ta?’ El a kontestá: ‘Ta mi, Esou, bo yu mayó!’

³³ Isak a spanta formal i a puntra: ‘Ta ken anto a tira bestia i a trese karni pa mi? Promé bo yega mi a kome tur loke el a trese i mi a dun'é mi bendishon. E ta keda ku e bendishon.’

³⁴ Asina Esou a tende e palabranan di su tata el a dal un gritu di amargura i bisa: ‘Bendishoná mi tambe, Papa!’

³⁵ Pero Isak a kontest'é: ‘Bo ruman a bin gaña mi i el a bai ku e bendishon ku mi tabatin pa bo.’

³⁶ ‘Ku rason e yama Yakob!’ Esou a grita. ‘Ya ta di dos bia ku e ta kohe mi kabes abou! Promé el a kita e derecho di yu mayó for di mi i awor el a kita mi bendishon. Bo no a keda ku ningun bendishon pa mi?’

³⁷ Isak a kontestá: ‘Ya mi a duna Yakob poder pa manda riba bo; i tur su rumannan mi a hasi su sirbidó. Mi a dun'é hopi trigo i hopi wendrùif. Kiko mi por hasi pa bo awor, mi yu?’

³⁸ Esou a insistí: ‘Papa, ta e bendishon ei so bo tin? Bendishoná ami tambe.’ I el a grita yora.

³⁹ E ora ei Isak a bis'é: ‘Lo bo biba leu for di kunuku fértil i leu for di serena di shelu.

⁴⁰ Di bo spada bo tin ku biba i lo bo tin ku sirbi bo ruman. Pero ora bo lanta formal kontra dje lo bo kita su yugo for di bo skouder.’

Yakob ta hui pa Esou

⁴¹ Pa motibu di e bendishon Esou a haña mal rabia riba Yakob. El a pensa: ‘Tòg mi tata lo no tarda pa muri, asina e muri mi ta mata mi ruman Yakob.’

⁴² Ora a konta Rebeka loke Esou tabatin pensá, el a yama Yakob i bis'é: ‘Wak, mi yu, pa tuma vengansa bo ruman ke mata bo.

⁴³ P'esei tende mi. Hui mesora bai serka mi ruman Laban ku ta biba na Haran.

⁴⁴ Keda poko tempu serka dje te dia e mal rabia di bo ruman plakia.

⁴⁵ Ora su rabia kita i e lubidá loke bo a hasi kuné, mi ta laga buska bo. Pasobra mi no ke pèrdè mi dos yunan riba e mesun dia!’

⁴⁶ Despues Rebeka a bisa Isak: ‘Mi ta fadá i kansá di e muhé hetitanan di Esou; si Yakob tambe mester kasa ku un muhé hetita di e tera akí, anto e ora ei mi no tin pakiko di keda biba mas.’