Génesis 25 - Papiamentu Bible 2013

Otro desendientenan di Abraham

¹ Abraham a kasa ku un otro muhé yamá Ketura.

² Ketura a haña e yu hòmbernan Zimran, Yokshan, Medan, Midian, Yishbak i Sua.

³ Yokshan tabata tata di Seba ku Dedan. E desendientenan di Dedan tabata e ashurita-, letusita- i leumitanan.

⁴ E yu hòmbernan di Midian tabata Efa, Efèr, Hanok, Abida i Eldaa. Nan tur tabata desendiente di Ketura.

⁵ Abraham a pasa tur loke e tabatin pa Isak.

⁶ E yunan ku e tabatin ku su konkubinanan el a duna regalo i durante su bida mes el a manda nan oriente, leu for di su yu Isak.

Morto i entiero di Abraham

^7-8 Abraham a alkansá e edat altu di 175 aña. Bieu i satisfecho el a bai sosegá serka su antepasadonan.

⁹ Su yunan Isak i Ismael a der'é den e kueba di Makpela, pariba di Mamre, den e kunuku di e hetita Efron, yu di Soar;

¹⁰ e kunuku ku Abraham a kumpra serka e hetitanan. Nan a dera Abraham mes kaminda ku a dera su kasá Sara.

¹¹ Despues di morto di Abraham, Dios a bendishoná Isak. Isak a keda biba banda di e pos Lahai-Roi.

E desendientenan di Ismael

¹² Awor ta sigui lista di e yu hòmbernan di Ismael. Ismael tabata yu di Abraham ku Hagar, e kriá egipsio di Sara.

¹³ Nebayot tabata e yu mayó; despues a sigui Kedar, Adbeel, Mibsam,

¹⁴ Mishma, Duma, Masa,

¹⁵ Hadar, Tema, Yetur, Nafish i Kedma.

¹⁶ Esaki ta nòmber di e diesdos yu hòmbernan di Ismael. Nan pueblonan i nan kampamentunan tabata karga nan nòmber. Diesdos lider ku nan mes tribu.

¹⁷ Dia Ismael tabatin 137 aña el a hala su delaster rosea i a bai sosegá serka su antepasadonan.

¹⁸ Su desendientenan tabata biba di Hawila te Shur, ku ta parti ost di Egipto, den direkshon di Asiria. Nan tabata biba separá di nan famianan.

Nasementu di Esou i Yakob

¹⁹ Awor ta sigui historia di Isak, yu di Abraham.

²⁰ Isak tabatin kuarenta aña, dia el a kasa ku Rebeka, yu di e arameo Betuel i ruman muhé di Laban, ku tabata biba na Padan-Aram.

²¹ Komo Rebeka no por a haña yu, Isak a roga na SEÑOR p'e. SEÑOR a skucha orashon di Isak i Rebeka a sali na estado.

²² E yunan den su barika tabata dal den otro i el a bisa: ‘Si ta asina mester bai, pakiko ta nèt ku mi e mester sosodé?’ E ora ei el a bai konsultá SEÑOR pa e haña un kontesta.

²³ SEÑOR a bis'é: ‘Den bo barika tin dos nashon, dos pueblo ku ta bringa otro asta promé ku nan nase. Esun lo ta mas fuerte ku e otro, i e mayó lo sirbi esun mas chikitu.’

²⁴ Porfin e dia a yega ku Rebeka mester a duna lus i el a haña un par di ohochi.

²⁵ E promé a nase ku kabei kòrá i ku su kurpa tur na kabei, komo si fuera ta un mantel di kabei e tabatin bistí. P'esei nan a yam'é Esou.

²⁶ Despues e ruman a nase. Ku un man e tabata tene hilchi di pia di Esou. P'esei nan a yam'é Yakob. Isak tabatin sesenta aña dia nan a nase.

Esou ta bende su derecho di yu mayó

²⁷ E muchanan a krese bira grandi. Esou a bira un bon yagdó, un hòmber di kunuku. Pero Yakob tabata un hòmber kalmu ku tabata gusta keda den bisindario di e tèntnan.

²⁸ Isak tabata preferá Esou pasobra e tabata gusta kome loke Esou tabata yag. Pero Rebeka tabata stima Yakob mas.

²⁹ Un dia ora Yakob tabata kushiná, Esou a yega kansá for di kunuku.

³⁰ El a bisa: ‘Duna mi un tiki di e sòpi kòrá ei, pasobra mi ta morto kansá.’ — P'esei a yama Esou, Edom: kòrá. —

³¹ Yakob a kontestá: ‘Pasa bo derecho di yu mayó promé pa mi.’

³² Esou a bisa: ‘Tòg mi ta serka di muri aki; kiko mi tin kunes ku e derecho di yu mayó?’

³³ Yakob a insistí: ‘Hura promé!’ Esou a hura. Asina el a pasa su derecho di yu mayó pa Yakob.

³⁴ E ora ei Yakob a duna Esou pan i e sòpi di bonchi. Ora Esou a kaba di kome i bebe el a lanta bai. Asina tiki interes e tabatin pa e derecho di yu mayó.