Génesis 2 - Papiamentu Bible 2013

¹ Asina shelu, tera i tur loke ta pertenesé na nan a keda kla.

² Di shete dia Dios tabata kla ku su trabou; e dia ei El a sosegá.

³ Dios a bendishoná e di shete dia i a proklam'é un dia sagrado, pasobra riba e dia ei Dios a sosegá di tur e trabou di su kreashon.

⁴ Esei ta e historia di shelu i di tera, ora Dios tabata krea nan. Tempu SEÑOR Dios a traha shelu i tera

Hòfi di Eden

⁵ ningun mata ni yerba no a spreit ainda den kunuku, pasobra SEÑOR Dios no a laga áwaseru kai riba mundu i no tabatin hende pa traha kunuku.

⁶ Sinembargo tabatin awa ta sali for di tera ku tabata muha henter e lugá.

⁷ E ora ei SEÑOR Dios a forma hende for di tera. El a supla rosea den su nanishi i asina hende a haña bida.

⁸ SEÑOR Dios a planta un hòfi den region di Eden, na parti ost, i eiden El a pone e hende ku El a forma.

⁹ SEÑOR Dios a laga tur sorto di palu bunita krese. Nan fruta tabata bunita pa mira i bon pa kome. Meimei di e hòfi tabatin dos palu: e palu ku ta duna bida i e palu ku ta duna konosementu di bon i malu.

¹⁰ Den Eden tambe tabatin orígen di un riu ku tabata duna awa pa e hòfi. Pafó di e hòfi e riu a sples na kuater.

¹¹ Esun promé yama Pishon; e ta pasa rònt di henter e region Hawila, kaminda por haña oro.

¹² Oro di e lugá ei ta puru. Tambe bo por haña einan un gòm di palu ku holó dushi, i e piedra presioso óniks.

¹³ E di dos riu yama Guihon. E ta pasa rònt di henter e region di Etiopia.

¹⁴ E di tres riu yama Tigris. E ta pasa na parti ost di Asiria. Esun di kuater ta Eufrat.

¹⁵ SEÑOR Dios a pone e hende den hòfi di Eden pa e kultivá i kuida e hòfi.

¹⁶ SEÑOR Dios a bisa e hende: ‘For di tur palu den hòfi bo mag kome libremente,

¹⁷ pero di e palu ku ta duna konosementu di bon i malu sí no. Pasobra e dia ku bo kome for di dje, bo ta muri sigur.’

¹⁸ Despues SEÑOR Dios a bisa: ‘No ta bon pa e hende ta so. Mi ta bai traha un kompañero ku ta yud'é i ku ta pas kuné.’

¹⁹ SEÑOR Dios a forma di tera tur bestia riba mundu i tur para den laria. El a hiba nan pa e hende, pa mira kon lo e yama nan. Ku e nòmber ku e hende duna nan, nan ta keda.

²⁰ Asina e hende a duna tur bestia nòmber, e bestianan di kria, e bestianan di mondi i e paranan den laria. Pero ningun di nan no a resultá di ta un kompañero ku ta yud'é i ku ta pas kuné.

²¹ E ora ei SEÑOR Dios a laga e hende bai un soño profundo; miéntras ku e tabata na soño, Dios a saka un di su repchinan i El a pone karni na e lugá.

²² Di e repchi SEÑOR a forma un muhé i a hib'é pa e hende.

²³ E hende a bisa: ‘Awor sí, esaki sí ta karni di mi karni i wesu di mi wesu. Lo e yama muhé, pasobra for di hòmber a sak'é.’

²⁴ P'esei un hòmber lo laga su tata i su mama pa uni ku su kasá i nan dos lo ta un.

²⁵ Nan tur dos, e hòmber i e muhé, tabata sunú, pero nan no tabata sinti bèrgwensa.