Galatanan 6 - Papiamentu Bible 2013

Yuda otro ku nan karga

¹ Rumannan, si un hende hañ'é den gara di algu robes, boso ku ta biba di akuerdo ku Spiritu di Dios mester yud'é drecha su bida. Pero hasié ku kariño i wak bon pa niun di boso no kai den tentashon.

² Boso un yuda otro ku su karga i asin'ei boso ta kumpli ku lei di Kristu.

³ Si un hende ta kere ku e ta mashá kos, pero en realidat e no ta nada, e ta gaña su mes.

⁴ Kada un di boso mester husga su mes aktonan i si nan keda aprobá lo e por broma ku nan. Lo e no por broma si e kompará su mes ku otro hende.

⁵ Pasobra kada ken ta responsabel pa su mes aktonan.

⁶ Esun ku ta risibí instrukshon den palabra di Dios mester kompartí tur kos bon ku e ta poseé ku su instruktor.

⁷ No gaña boso mes! Dios no ta laga niun hende hasi bofon di djE. Loke un hende sembra, e ta kosechá!

⁸ Es ku sembra den kunuku di su mal deseonan, lo kosechá destrukshon, ma es ku sembra den loke ta di Spiritu Santu, lo kosechá bida eterno.

⁹ Laga nos no kansa di hasi loke ta bon i si nos no deskurashá, na su debido tempu nos lo kosechá loke nos a sembra.

¹⁰ P'esei antó, ki ora ku tin oportunidat, laga nos hasi bon pa tur hende, spesialmente pa nos rumannan den fe.

Atvertensia i kumindamentu

¹¹ Mira e lèternan grandi akí ku mi mes ta skibi boso!

¹² Tur esnan ku ta obligá boso risibí sirkunsishon, ta hasié djis pa keda bon ku hende i pa no sufri persekushon pa krus di Hesus.

¹³ Pero ni esnan ku a risibí sirkunsishon mes no ta kumpli kompletamente ku Lei di Moises! Nan ke pa boso sí laga sirkunsidá boso, ya nan por broma ku nan a laga boso marka boso kurpa!

¹⁴ Ami sí no ke broma ku nada otro ku no ta krus di nos Señor Hesu-Kristu. Pasobra pa motibu di loke El a hasi na krus, mundu a muri pa mi i ami ta morto pa mundu.

¹⁵ Si un hende ta sirkunsidá òf nò, no tin niun balor; importante ta bira un kreashon nobo!

¹⁶ Pas i mizerikòrdia pa tur hende ku ta biba segun e regla akí, esta pa e Israel di Dios!

¹⁷ Finalmente, for di awor en adelante, mi no ke pa niun hende kousa mi problema, pasobra den mi kurpa mi ta karga e markanan di Kristu ku ta mustra ku mi ta su katibu.

¹⁸ Rumannan, grasia di nos Señor Hesu-Kristu sea ku boso. Amèn!