Galatanan 3 - Papiamentu Bible 2013

Esnan ku ta konfia den Lei di Moises i esnan ku ta kere den bon notisia

¹ Esta bobo boso ta, galatanan! Ta ken a blèndu boso asina? Anto mira kon mi a duna boso un deskripshon bon kla di Hesu-Kristu komo Esun krusifiká!

² Un kos so mi ke puntra boso: Boso a risibí Spiritu Santu dor di kumpli ku Lei di Moises òf dor di kere den e bon notisia ora boso a tend'é?

³ Kon boso por ta bobo asina? Boso a kuminsá ku forsa di Spiritu Santu, anto awor boso ke perfekshoná boso mes dor di boso mes forsa?

⁴ Ta pòrnada Spiritu Santu a laga boso eksperensiá hopi kos bon asina? Ohalá ku nò!

⁵ Ta pakiko Dios ta duna boso Spiritu Santu i laga milager sosodé serka boso? Pasobra boso a kumpli ku Lei di Moises òf pasobra boso a kere den e bon notisia ora boso a tend'é?

⁶ Tuma Abraham komo ehèmpel. El a kere Dios i Dios a asept'é komo hustu.

⁷ P'esei boso mester realisá ku ta esnan ku ta kere Dios ta desendiente di Abraham.

⁸ Skritura a tene kuenta di antemano ku e echo ku Dios lo bai aseptá no hudiu pa medio di fe. Ta p'esei Skritura a anunsiá e bon notisia akí na Abraham di antemano: ‘Tur pueblo di mundu lo ta bendishoná pa medio di bo.’

⁹ Asina antó, esnan ku kere lo ta bendishoná huntu ku Abraham, esun ku a kere Dios.

¹⁰ Pasobra tur esnan ku ta konfia riba Lei di Moises pa haña salbashon ta maldishoná, ya ku Skritura ta bisa: ‘Maldishoná ta esun ku no ta kumpli fielmente ku tur loke ta den buki di Lei.’

¹¹ Ke men antó, ta bon kla ku Dios no ta aseptá niun hende, pa motibu ku e ta kumpli ku Lei, ya ku Skritura ta bisa: ‘E hende ku pa medio di fe ta hustu den bista di Dios, lo biba.’

¹² Pero serka Lei no ta fe ta importante, pero práktika di e mandamentunan, pasobra tin skibí: ‘Esun ku praktiká nan, lo biba dor di nan.’

¹³ Kristu a reskatá nos di e maldishon ku Lei di Moises ta trese dor di bira un maldishon pa nos motibu. El a bira un maldishon, pasobra Skritura ta bisa: ‘Maldishoná ta tur esnan ku muri kologá na un palu.’

¹⁴ Esaki a sosodé pa e bendishon ku Abraham a risibí alkansá esnan ku no ta hudiu tambe, pa medio di Kristu-Hesus. Asina nos tur, pa medio di fe, ta risibí Spiritu Santu ku Dios a primintí nos.

Lei no ta kita e promesa

¹⁵ Rumannan, mi ta bai duna boso un komparashon for di bida diario. Ora un hende sera un kontrakt i pone su firma bou di dje, niun hende no por anul'é òf pone algu aserka.

¹⁶ Wèl, Dios a hasi su promesanan na Abraham i su desendiente. Skritura no ta papia di desendientenan; tin skibí: ‘bo desendiente’, esta Kristu.

¹⁷ Mi ke men lo siguiente: Dios ya a sera un aliansa ku Abraham i a primintí di keda fiel na e aliansa ei. P'esei Lei di Moises, ku a bini 430 aña despues, no por a anulá e aliansa ei i kanselá e promesa ku Dios a hasi Abraham.

¹⁸ Pues si e benefisionan ku Dios a primintí tabata dependé di Lei di Moises, nan lo no tabata dependé di e promesa. Pero Dios a duna Abraham e benefisionan ei gratuitamente pa medio di e promesa.

¹⁹ Pakiko Lei di Moises ta sirbi antó? El a bini pa hasi hende su desobediensia na Dios evidente; e tabata na vigor te ora esun ‘desendiente’ pa kende e promesa tabata destiná, a bini. Dios a duna Lei pa medio di angel i Moises a sirbi komo mediadó entre Dios i e pueblo.

²⁰ Pero no tin mester di un mediadó ora ta trata di un persona so i den e kaso akí Dios ta ún so!

²¹ Ke men antó ku Lei di Moises ta bai kontra e promesanan di Dios? Apsolutamente ku nò! Pasobra si tabata asina ku Dios a duna Lei pa hende por haña bida, e ora ei enberdat ta pa medio di Lei Dios lo a aseptá hende komo hustu!

²² Pero manera Skritura ta bisa: nos tur ta biba bou di dominio di piká, ya asina e promesa hasí pa Dios a base di fe den Hesu-Kristu, por konta pa esnan ku ta kere.

²³ Ántes, promé ku nos ku ta hudiu a bini na fe, Lei di Moises tabatin nos prezu, miéntras nos tabata warda riba revelashon di fieldat di Hesu-Kristu.

²⁴ Anto Lei tabata pa nos manera un yaya ku ta kuida mucha, te ora Kristu a bini pa Dios por a aseptá nos komo hustu pa medio di fe.

²⁵ Pero awor ku e bon notisia di salbashon pa medio di fe a bini, nos no ta bou di enkargo di e yaya ku yama Lei mas!

²⁶ Boso tur ta yu di Dios pa medio di fe den Kristu-Hesus,

²⁷ pasobra ora boso a uni ku Kristu pa medio di boutismo, boso a keda bistí ku Kristu.

²⁸ Awor no tin kuenta di hudiu òf no hudiu, katibu òf hende liber, hende hòmber òf hende muhé, pasobra boso tur ta ún dor di boso union ku Kristu-Hesus.

²⁹ I si boso ta pertenesé na Kristu, boso ta desendiente di Abraham i ta haña benefisio di e promesanan ku Dios a hasi Abraham.