Filipensenan 4 - Papiamentu Bible 2013

Ekshortashon

¹ T'asina, mi rumannan stimá, ku mi tin tantu gana di mira, ku ta mi goso i mi korona, t'asina mes boso mester para firme den Señor.

² Euodia i Síntigè, mi ta roga boso pa yega na un akuerdo ku otro manera ruman den Señor.

³ Sí, abo tambe, kompañero berdadero den trabou, mi ta pidi bo pa yuda e muhénan akí. Pasobra nan a lucha huntu ku mi pa e bon notisia, huntu ku Klemente i mi otro kolaboradónan, ku tin nan nòmber skibí den e buki di bida.

⁴ Keda semper kontentu den Señor! Mi ta ripití: Keda kontentu!

⁵ Laga tur hende mira kon amabel boso ta. Señor ta serka!

⁶ No preokupá pa nada, sino den tur sirkunstansia presentá boso petishonnan na Dios den orashon i semper ku gradisimentu.

⁷ I e pas di Dios ku niun hende no por komprondé, lo warda boso kurason i mente den union ku Kristu-Hesus.

⁸ Pa konkluí, rumannan: pensa riba tur loke ta berdadero i noble, hustu i puru, agradabel i honorabel. Si tin kiko ku ta, ku ta bon i ku ta digno di alabansa, pensa riba eseinan.

⁹ Pone loke boso a siña, risibí, tende i mira di mi, den práktika. I Dios ku ta duna pas, lo ta huntu ku boso.

Gradisimentu pa yudansa di e filipensenan

¹⁰ Komo un ku ta biba den union ku Señor, tabata un goso grandi pa mi ku porfin boso a mustra atenshon pa mi. No ku boso no tabata interesá den mi, ma boso no tabatin chèns di mustra esei.

¹¹ Mi no ta bisa asina, pasobra mi ta sinti falta di algu, ya ku den tur sirkunstansia, mi a siña biba ku loke mi tin.

¹² Mi sa kiko ke men biba pober i biba den abundansia. Den tur sirkunstansia i tur kaminda, mi a siña kiko ta nifiká kome barika yen òf pasa hamber; di biba den abundansia òf biba den nesesidat.

¹³ Mi por enfrentá tur kos pa medio di Esun ku ta duna mi forsa.

¹⁴ Sinembargo boso a hasi bon di yuda mi den mi problema.

¹⁵ Filipensenan, boso mes sa mashá bon ku tempu mi a kuminsá prediká e bon notisia, ora mi a bandoná provinsia di Masedonia, niun otro iglesia no a mustra nan gratitut materialmente. Ta boso so a yuda mi!

¹⁶ Asta tempu ku mi tabata na Tesalónika, boso a yega di manda yudansa mas ku un bia, pa kubri mi nesesidatnan.

¹⁷ No ku mi ke algu di boso, ma mi ke mira boso krédito serka Dios subi.

¹⁸ Mi a risibí sufisiente pago, asta mas ku esei! Mi a haña tur loke mi mester, awor ku Epafrodito a trese boso regalonan pa mi. Nan ta manera un holó dushi, un sakrifisio aseptabel i plasentero na Dios.

¹⁹ I mi Dios lo kumpli ku tur boso nesesidatnan for di su rikesa glorioso, pa medio di Kristu-Hesus.

²⁰ Na nos Dios i Tata sea gloria pa semper i semper! Amèn.

Saludo final

²¹ Kumindá tur esnan ku ta pertenesé na Dios i ta uní ku Kristu-Hesus. E rumannan ku ta serka mi ta manda kumindamentu.

²² Tur esnan ku ta pertenesé na Dios ta manda kumindamentu, spesialmente esnan ku ta den sirbishi di emperador.

²³ Grasia di Señor Hesu-Kristu keda ku boso.