Ezekiel 44 - Papiamentu Bible 2013

E edifisio di entrada na parti ost ta keda será

¹ E ora ei e hòmber a hiba mi bèk na e edifisio di entrada na parti ost parti pafó di e santuario. E porta tabata será.

² SEÑOR a bisa mi: ‘E porta akí mester keda será, no mag habrié di ningun manera. Ningun hende no mag drenta djaki, awor ku Ami, SEÑOR, Dios di Israel, a drenta djaki. P'esei e ta keda será.

³ Solamente e gobernante tin mag di sinta den e edifisio di entrada ei pa kome for di e sakrifisio den mi presensia. E ta drent'é via di e hal i bandon'é via di e mesun kaminda.’

Regla pa drenta den e santuario

⁴ E ora ei via di e edifisio di entrada na parti nort el a hiba mi e banda dilanti di tèmpel. I mi a mira kon e tèmpel tabata yená ku gloria di SEÑOR, i mi a kai bok'abou.

⁵ SEÑOR a bisa mi: ‘Hende, paga tinu, wak bon i skucha ku atenshon tur e stipulashonnan i reglanan ku Mi ta duna bo relashoná ku mi tèmpel. Paga bon tinu ken tin mag i ken no tin mag di drenta mi santuario.

⁶ Bisa e rebeldenan ei, e pueblo di Israel: Esaki ta loke SEÑOR, mi Dios, ta bisa: Boso a hasi basta kos repugnante kaba, pueblo di Israel!

⁷ Ora boso tabata presentá Mi sebu i sanger di e bestianan di sakrifisio, boso a bini ku strañeronan den mi santuario, hendenan ku no a dediká nan mes na Mi i ku no tabata sirkunsidá. Asina boso a profaná mi tèmpel! Ku tur boso práktikanan repugnante boso a kibra e aliansa ku Mi.

⁸ Boso mes no a tuma kuido di e ophetonan sagrado riba boso, pero a nombra strañeronan pa sirbishi den tèmpel.’

⁹ Esaki ta loke SEÑOR, mi Dios, ta bisa: ‘Ningun strañero ku no a dediká su mes na Mi i ku no ta sirkunsidá no mag drenta mi santuario; esaki ta konta pa tur strañero ku ta biba entre e israelitanan.

¹⁰ Loke ta trata e levitanan, ku a bira infiel na Mi ora e israelitanan a bira lomba pa Mi i tabata bai tras di diosnan falsu, nan lo karga konsekuensia di e kos ei.

¹¹ Nan mester sirbi komo guardia di e edifisionan di entrada i tambe hasi otro trabou riba e tereno di tèmpel. Nan mester mata e bestianan ku e pueblo trese pa sakrifisio di kandela òf pa sakrifisio di pas i para semper kla pa e pueblo.

¹² Pasobra e levitanan a ofresé sakrifisio na diosnan falsu pa e israelitanan i asina tabata kousa di nan piká; p'esei Mi a hisa mi man pa hura kontra nan ku nan lo karga konsekuensia di nan maldat.’ Esaki ta loke SEÑOR, mi Dios, ta bisa.

¹³ ‘Nan no mag sirbi Mi komo saserdote ni mag mishi mas ku e ofrendanan santu i esunnan mashá santu. Asina nan lo karga bèrgwensa i konsekuensia di nan práktikanan repugnante.

¹⁴ Mi ta nombra nan pa servisio den tèmpel, pa tur e trabou ordinario ku mester hasi einan.

¹⁵ Pero e saserdotenan for di tribu di Levi ku ta desendientenan di Sadok, sí mag sirbi Mi. Semper nan a sòru pa mi santuario, tempu e israelitanan a bira lomba pa Mi tambe. Nan mag bini Mi dilanti pa ofresé Mi sebu i sanger di e bestianan matá pa sakrifisio,’ SEÑOR, mi Dios, ta bisa.

¹⁶ ‘Nan mag drenta mi santuario, tene sirbishi na mi mesa i sòru pa sirbishi di tèmpel.

¹⁷ Kada be ku nan drenta e edifisionan di entrada di e plenchi parti paden nan mester bisti paña di lenen. Nan no mag bisti nada di lana ora nan ta tene sirbishi den e edifisionan di entrada òf den tèmpel.

¹⁸ Nan mester tin un tùlbant di lenen riba nan kabes i un karson di lenen bistí. Nan no mag di tin nada bistí ku ta pone nan soda.

¹⁹ Ora nan ta bai e plenchi parti pafó kaminda e pueblo ta, nan ta obligá di kita e pañanan ku nan a tene sirbishi den dje; nan mester laga e pañanan ei keda den e kuartunan sagrado i bisti otro paña. Asina ta evitá ku e pueblo lo por mishi ku nan pañanan sagrado.

²⁰ Nan no mag feita nan kabes chinu ni laga nan kabei bira largu tampoko; nan mester kòrt'é debidamente.

²¹ E saserdotenan no mag bebe biña promé ku nan drenta e plenchi parti paden.

²² Nan no mag kasa ku un biuda òf un muhé divorsiá, pero solamente ku un mucha muhé israelita ku no ta kasá ainda òf ku biuda di un saserdote.

²³ E saserdotenan tin e tarea di siña mi pueblo e diferensia entre loke ta sagrado ku loke no ta sagrado, entre puru ku impuru.

²⁴ Ora tin pleitu nan ta aktua komo hues i dikta sentensia segun mi leinan. Nan mester selebrá tur dia di fiesta segun mi leinan i reglanan i santifiká mi sabat.

²⁵ Saserdotenan mester evitá di bira impuru. P'esei nan no mag yega den bisindario di un defuntu, a ménos ku ta nan tata òf mama, nan yu hòmber òf yu muhé, nan ruman hòmber òf nan ruman muhé soltero.

²⁶ Ta te shete dia despues di nan purifikashon

²⁷ nan mag drenta e plenchi parti paden atrobe pa tene sirbishi den mi santuario. Nan ta kuminsá e ora ei ku ofresé un sakrifisio pa pordon di piká pa nan mes,’ SEÑOR, mi Dios, ta bisa.

²⁸ ‘Saserdotenan no tin derecho riba tereno di nan mes; nan a haña e derecho di sirbi Mi. No duna nan niun propiedat na Israel; t'Ami ta nan parti.

²⁹ Nan por gana nan bida ku e ofrendanan vegetal, sakrifisionan pa pordon di piká i sakrifisionan di debe. Nan ta risibí tur loke keda dediká na Mi na Israel.

³⁰ Pa nan e mihó parti di e promé produkto di kosecha i di tur loke keda ofresé na Mi ta. Tambe tur hende mester duna e saserdotenan e mihó parti di nan hariña pa trese bendishon riba nan kas.

³¹ Karni di bestia ku a muri un morto natural òf ku bestianan salbahe a mata, sea ku ta para òf otro bestia, saserdotenan no mag kome.