Ezekiel 42 - Papiamentu Bible 2013

Kambernan di e saserdotenan

¹ E ora ei e hòmber a hiba mi e plenchi parti pafó na banda nort i a hiba mi e kuartunan na banda nort di e plenchi parti paden, i e edifisio eitras.

² E edifisio na banda nort tabata sinkuenta meter largu i bintisinku meter hanchu.

³ Na un banda e tabata pegá ku e pida bashí di dies meter banda di e tèmpel i na e otro banda e tabata pegá ku e plenchi parti pafó di mosaiko. E tabatin forma di un trapi i tabata konsistí di tres piso.

⁴ Na banda nort di e kuartunan tabatin un pasio ku un hanchura di sinku meter i un largura di sinkuenta meter. Na e banda akí por a drenta e kuartunan.

^5-6 E kuartunan di mas ariba tabata mas chikitu ku esunnan di e piso di meimei i e piso di abou, pasobra e pasionan tabata tuma mas espasio. Es desir no tabatin pilá ta karga e kuartunan manera e otro edifisionan di e plenchi parti pafó. P'esei a traha e kuartunan segun ta bai ariba mas smal.

⁷ Na banda di e plenchi parti pafó e edifisio tabatin un muraya di bintisinku meter.

⁸ Largura di e edifisio na banda di e plenchi parti pafó tabata bintisinku meter, pero na banda di e tèmpel e tabata sinkuenta meter.

⁹ Si a drenta di e plenchi parti pafó, entrada di e kuartunan akí tabata na banda ost, na un nivel mas abou.

¹⁰ Tambe tabatin kuartu kontra di e muraya di e plenchi parti pafó na banda zùit di e plenchi patras di tèmpel.

¹¹ Dilanti di e kuartunan tabatin un pasio. E tabata presis meskos ku e edifisio na banda nort, ku mesun midínan, mesun entradanan i salidanan i mesun partishon.

¹² Si tabata bini for di e plenchi parti pafó pa drenta e kuartunan akí, por a pasa na banda ost dor di un entrada ku tabatin na kuminsamentu di e muraya ku tabata pasa banda di e pasio.

¹³ E hòmber a bisa mi: ‘E kuartunan akí na rant di e plenchi, tantu esunnan na banda nort komo esunnan na banda zùit, ta sagrado. Ei e saserdotenan ku ta tene sirbishi den serkania di SEÑOR mester kome e ofrendanan mashá sagrado. Ei nan mester pone e ofrendanan mashá santu, esta nan parti di ofrenda vegetal, sakrifisio pa haña pordon di piká i sakrifisio di debe, pasobra ta un lugá sagrado.

¹⁴ Si e saserdotenan a drenta e tèmpel, nan no mag sali for di einan bai derechitu e plenchi parti pafó. Promé nan mester kita e pañanan sagrado den kua nan a tene sirbishi i bisti otro. E ora ei numa nan mag bai e lugá ku ta destiná pa e pueblo.’

Grandura di e tereno di tèmpel

¹⁵ Ora e hòmber a kaba di midi e parti di mas paden di e edifisionan di tèmpel, el a pasa ku mi dor di e edifisio di entrada na parti ost bai pafó i a midi grandura di henter e tereno.

¹⁶ Ku e dùimstòk el a midi e banda ost: esaki tabata 250 meter largu.

¹⁷ Despues el a midi e banda nort, 250 meter,

¹⁸ i e banda zùit, 250 meter.

¹⁹ Finalmente el a bai banda wèst i a midi esei, tambe 250 meter.

²⁰ Asina el a midi e muraya ku tabatin rondó di henter e kompleho. El a forma un firkant di 250 pa 250 meter, ku tabata sirbi komo separashon entre tereno sagrado ku no sagrado.