Ezekiel 41 - Papiamentu Bible 2013

¹ Despues di esaki e hòmber a hiba mi e sala grandi di tèmpel. El a midi e murayanan di e portal meimei, kada un tabata tres meter hanchu.

² Entrada di e sala tabata sinku meter hanchu i e murayanan na kada banda di e entrada tabata dos meter i mei hanchu. Hanchura di e sala tabata antó dies meter; e largura binti meter.

³ Finalmente el a drenta e sala di patras i a midi e murayanan di e entrada; esakinan tabata un meter hanchu. E entrada tabata tres meter hanchu i e murayanan na kada banda di e entrada tabata tres meter i mei largu.

⁴ El a kohe midí di e sala akí: dies pa dies meter. El a bisa mi: ‘Esaki ta e lugá santísimo.’

E edifisionan rondó di tèmpel

⁵ E hòmber a midi muraya di e tèmpel; esaki tabata tres meter diki. Kontra di e muraya akí tabatin rondó di e tèmpel kuartunan di dos meter hanchu,

⁶ tres piso riba otro. Kada piso tabatin trinta kuartu. Na kada piso e murayanan di tèmpel tabata bai aden, di manera ku e kuartunan por a sosegá riba e muraya. No tabata pèrmití pa ankra nan den muraya di tèmpel.

⁷ Asina segun tabata bai ariba e pisonan tabata bira kada be mas grandi. Mas ariba bai mas grandi e espasio den e kuartunan. For di e piso di abou tabatin un trapi ta bai e piso di meimei i for di e piso di meimei un ta bai e piso di ariba.

⁸ Rondó di e tèmpel mi a mira un terasa di tres meter altu ku tabata forma e fundeshi pa e kuartunan na banda.

^9-10 E muraya parti pafó di e pisonan tabata dos meter i mei diki. Rondó di henter e tèmpel, entre e kuartunan na banda ku e kuartunan di servisio, tabatin un pida bashí di dies meter.

¹¹ E kuartunan na banda tabatin dos porta ku tabata sali riba e pida bashí, un na parti nort i un na parti zùit. Rondó di e pida bashí tabatin un muraya di dos meter i mei hanchu.

¹² Na e plenchi parti wèst di e tèmpel tabatin un edifisio ku tabata 45 meter largu i 35 meter hanchu. E murayanan tabata dos meter i mei hanchu.

¹³ E hòmber a midi largura di e tèmpel, esaki tabata sinkuenta meter. E plenchi parti wèst tambe tabata sinkuenta meter largu, meskos ku e edifisio ku tabatin einan, inkluso su murayanan.

¹⁴ E fachada di tèmpel, na parti ost, huntu ku e pida bashí na kada banda tambe tabata sinkuenta meter.

¹⁵ Finalmente el a midi tambe largura di e edifisio ku tabatin patras di e tèmpel riba e plenchi. Ku e pasionan na kada banda esaki tabata na tur sinkuenta meter. E sala di entrada, e sala grandi i e sala di patras di tèmpel

Interior di e tèmpel

¹⁶ tabata furá ku palu meskos ku e bentananan ku trali i e pasionan rondó di e tres pisonan. Tur kos tabata furá ku palu, for di e flur te e bentananan. E bentananan tabata tapá.

¹⁷ Riba e entrada i parti paden i parti pafó riba e murayanan di tèmpel a pone ku un sekuensia regular

¹⁸ kerubin i palma, kada be un palma meimei di dos kerubin. E kerubinnan tabatin dos kara:

¹⁹ un kara di hende birá pa e palma na esun banda, i un kara di leon birá pa e palma na e otro un banda. Tur e murayanan di tèmpel tabata dòrná ku e figuranan akí,

²⁰ for di e flur te riba e entrada.

²¹ E kozeinnan di porta di e entrada pa e sala grandi tabata firkant. Dilanti di e sala di patras, e lugá santísimo, tabatin algu ku tabata parse

²² un altá di palu. E tabata un meter i mei altu i un meter largu. E tabata tur di palu, meskos e skinanan, e pedestal i e bandanan. E hòmber a bisa mi: ‘Esaki ta e mesa ku ta pará dilanti di SEÑOR.’

²³ E sala grandi i e lugá santísimo tur dos tabatin un porta dòbel,

²⁴ ku blat di porta ku por a habri tur tur, dos pa kada porta.

²⁵ Nan tabata dòrná ku kerubin i palma, meskos ku e murayanan. Riba e entrada pa bai e sala grandi tabatin un afdak.

²⁶ Den e murayanan na banda di e sala grandi a hinka bentana ku trali; na kada banda e murayanan akí tabata dòrná ku palma, meskos ku e afdak i e murayanan den e kuartunan na banda.