Ezekiel 38 - Papiamentu Bible 2013

SEÑOR ta laga Gog ranka sali kontra Israel

¹ SEÑOR a dirigí palabra na mi:

² ‘Hende, fiha bo bista riba Gog for di e pais Magog, gobernante prinsipal di Mèshèk i Tubal. Profetisá kontra dje

³ i bisa: Esaki ta loke SEÑOR, mi Dios, ta bisa: Mi ta bai aktua kontra bo, Gog, abo gobernante prinsipal di Mèshèk i Tubal.

⁴ Mi ta bin buska bo, Mi ta pasa un hak den bo kakumbein i bai ku bo, ku henter bo ehérsito, tur e kabainan i sòldánan di kabayeria, nèchi uniformá, armá ku eskudo grandi i chikitu, i ku spada den man.

⁵ Tambe e sòldánan for di otro pueblonan ku tin bou di bo sòldánan: for di Persia, Etiopia i Put, armá ku eskudo i hèlmu bistí,

⁶ Gomèr ku tur su trupanan i Bet-Togarma for di ariba aya den nort ku tur su trupanan. Hopi pueblo ta ranka sali ku bo.

⁷ Prepará bo, para kla, ku tur e ehérsitonan ku djòin bo; nan ta bou di bo komando.

⁸ Despues di hopi aña lo Mi ordená bo ranka sali kontra un pais ku a kaba di rekuperá di guera. E habitantenan a bini huntu for di hopi pueblo i ta bibando awor seif riba serunan di Israel ku un ten tabata kompletamente destruí.

⁹ Lo bo ranka sali rápidamente manera un mal tempu ku ta aserkando. Ku tur bo trupanan i e pueblonan ku a djòin bo, lo bo tapa e pais ei manera un nubia skur.’

¹⁰ Esaki ta loke SEÑOR, mi Dios, ta bisa: ‘E dia ei un plan malbado lo drenta bo kabes.

¹¹ Bo ta pensa den bo mes: “Mi ta bai ranka sali kontra un pais sin defensa, kaminda e hendenan ta biba seif i sin preokupashon, den siudatnan sin muraya òf ku portanan irèndu.

¹² Mi ta bai sakia nan i kohe nan propiedatnan komo botin.” Bo ta disidí di ataká siudatnan ku a keda rekonstruí, hendenan ku for di e pueblonan a bini huntu atrobe, ku tin nan mes bestianan i otro propiedat atrobe i ku ta biba den sentro di mundu.

¹³ E habitantenan di Seba i Dedan, e komersiantenan for di Tarsis i nan sòldánan lo puntra bo: “Sakia bo a bin sakia? Ta pa haña botin, kohe oro i plata bai kuné, haña bestianan i otro propiedat, bo a pone e ehérsito akí riba pia? Ta riba un botin grandi bo a ranka bini?”

¹⁴ P'esei bo mester aktua komo profeta, hende, i bisa Gog: Esaki ta loke SEÑOR, mi Dios, ta bisa: Na momento ku mi pueblo Israel kere ku e ta seif, lo bo desarmá bo kampamentu.

¹⁵ Lo bo bini for di bo pais, for di ariba den nort. Lo bo ta na kabes di hopi pueblo, un tremendo ehérsito di sòldá riba kabai.

¹⁶ Lo bo ataká mi pueblo Israel i tapa e pais manera un nubia skur. Lo ta den un futuro lehano ku lo Mi laga bo ataká mi pais i dia Mi demostrá abo, Gog, ku t'Ami t'Esun Santu, e pueblonan lo siña konosé Mi.’

¹⁷ Esaki ta loke SEÑOR, mi Dios, ta bisa: ‘Riba bo Mi a papia promé aya pa medio di mi sirbidónan, profetanan di Israel. Nan a anunsiá añanan largu ku lo Mi a laga bo ranka sali kontra nan.

SEÑOR ta aktua kontra Gog

¹⁸ Pero e dia ku Gog trapa pia riba teritorio di Israel, mi rabia ta eksplotá,’ SEÑOR, mi Dios, ta bisa.

¹⁹ ‘Den mi indignashon i mi rabia ardiente Mi ta hura: Riba e dia akí un temblor pisá lo tuma lugá na Israel.

²⁰ Di miedu pa Mi tur kos lo tembla: piskánan den laman, paranan den laria, tur bestia, grandi i chikitu, tur hende na mundu. Serunan lo basha bini abou, partinan di baranka lo kibra, niun muraya no ta keda para.

²¹ Riba mi serunan lo Mi yama e spada di guera kontra Gog,’ SEÑOR, mi Dios, ta bisa. ‘Su sòldánan lo ataká otro ku spada.

²² Lo Mi kastig'é ku pèst i matamentu, lo Mi laga diluvio, pipita di eis, kandela i suafel kai riba Gog i su ehérsitonan i riba e tantísimo pueblonan ku a djòin e.

²³ Lo Mi demostrá hopi pueblo ku Mi ta grandi i santu i nan lo rekonosé ku t'Ami ta SEÑOR.