Ezekiel 27 - Papiamentu Bible 2013

Kantika di lamento riba Tiro

¹ SEÑOR a dirigí palabra na mi:

² ‘Hende, kanta un kantika di lamento riba Tiro,

³ e siudat situá na kosta ku ta hasi negoshi ku hopi pueblo ku ta biba kantu di laman. Bisa Tiro: Esaki ta loke SEÑOR, mi Dios, ta bisa: Tiro, bo a pensa: mi tin bunitesa perfekto.

⁴ Bo teritorio ta meimei di laman; bo konstruktornan a traha un bunita barku di bo.

⁵ Di pal'i siprès di Senir a traha bo kurpa, a buska un pal'i seder for di Libanon traha bo master for di dje.

⁶ For di pal'i ekel di Bashan a kòrta bo remanan. Ku pal'i pino for di Chipre a forma bo dèk, un dèk ku mosaiko di ivor.

⁷ Bo belanan tabata di lenen for di Egipto, bunita bòrdá; na e kosnan ei por a rekonosé bo. Bo tènt pa solo tabata di blou püs i kòrá püs, tela bunita for di kosta di Elisha.

⁸ Bo remadónan tabata bini for di Sidon i Arwad; bo mes nabegantenan ku eksperensia, Tiro, tabata na bordo.

⁹ Bo karpinténan di barku, eksperto i sabí, tabata bini for di Guebal. Tur barku grandi ku nan tripulashon tabata den bo haf pa hasi negoshi ku bo.

¹⁰ Sòldá for di Persia, Lud i Put tabata sirbi den bo ehérsito. Na bo murayanan nan tabata kologá nan eskudo i hèlmu. Ta nan a engrandesé bo fama.

¹¹ Hòmbernan for di Arwad i Helèk tabata vigilá bo murayanan, hòmbernan for di Gamad tabata para riba bo torennan. Nan tabata kologá nan eskudo rònt na bo murayanan. Esei tabata hasi bo bunitesa perfekto.

¹² Tarsis a hasi negoshi ku bo den kantidat di merkansia; el a entregá plata, heru, staña i chumbu a kambio di bo merkansia.

¹³ Habitantenan di Gresia, Tubal i Mèshèk a entregá katibu i opheto di bròns a kambio di bo merkansia.

¹⁴ Bet-Togarma a entregá kabai di trabou, kabai di monta i mula a kambio di bo produktonan.

¹⁵ Habitantenan di Rodos a ofresé bo nan merkansia. Riba hopi isla bo a baha bo merkansianan i a laga nan paga bo ku ivor i palu di ébano.

¹⁶ Aram a hasi negoshi ku bo den kantidat di produkto. A kambio di bo merkansianan nan a entregá bo garnafein, lana kòrá püs, tela bòrdá di koló, lenen, makurá i rubí.

¹⁷ Huda i e pais Israel a hasi negoshi ku bo; nan a entregá trigo for di Minit, sebada, miel, zeta di oleifi i bálsamo a kambio di bo merkansia.

¹⁸ Damasko a hasi negoshi ku bo den hopi produkto i tur sorto di merkansia; nan tabata entregá boso biña for di Hèlbon i lana for di Sakar.

¹⁹ Wedan i Yawan for di e teritorio di Uzal a entregá bo heru, kané i yerba aromátiko a kambio di bo merkansianan.

²⁰ Dedan a hasi negoshi ku bo den shabrak.

²¹ Arabia i e hefenan di tribu di Kedar tabata paga pa bo merkansianan ku lamchi, chubat'i karné i chubatu.

²² Komersiantenan for di Seba i Rama tabata hasi negoshi ku bo; nan tabata entregá bo e spesereinan di mas fini, piedranan presioso i oro a kambio di bo merkansianan.

²³ E siudatnan Haran, Kane i Eden, komersiantenan for di Seba, Asiria i Kilmad a hasi negoshi ku bo.

²⁴ Nan a hasi negoshi ku bo den pañanan bunita, mantel di lana blou püs i tela fini bòrdá, tapeitnan di hopi koló i kabuya duru iflèktu.

²⁵ Barkunan impreshonante tabata transportá bo merkansianan pasa laman. Tiro, bo tabata manera un barku meimei di laman, bon kargá, ku karga pisá.

²⁶ Bo remadónan a hiba bo laman ganchu, pero aya, meimei di laman, un tempestat for di ost a pone bo noufragá.

²⁷ Bo tesoronan, bo merkansia, tur bo merkansia, bo matrosnan, henter bo tripulashon, karpinténan di barku i komersiante, tur sòldá, tur hende na bordo, tur kos laman hundu ta guli, e dia ku bo bai pèrdí.

²⁸ Habitantenan na kosta ta tembla, ora nan tende bo matrosnan grita di miedu.

²⁹ Awor tur nabegante ta bandoná nan barku, remadónan i matrosnan ta bai tera.

³⁰ Nan ta keha na bos altu pa e kos ku a pasa bo; nan ta ekspresá nan tristesa grandi. Nan ta pone tera riba nan kabes i ta lora abou den stòf.

³¹ Pa bo nan ta feita nan kabes limpi i bisti paña di rou: nan ta yora pa bo ku tristesa profundo i nan lamento ta amargo.

³² Kehando nan ta kuminsá un kantika di lamento riba bo; nan ta kanta: “Ku ken por a kompará Tiro riba laman?

³³ Ku bo merkansia, transportá riba laman, bo a hasi hopi pueblo próspero; ku bo tesoronan i merkansia bo a enrikesé hopi rei.

³⁴ Pero bo a noufragá, bo a senk den e awa hundu, bo merkansia, henter bo tripulashon laman a guli huntu ku bo.”

³⁵ Tur habitante na kosta ta morto spantá pa bo; nan reinan ta tembla di miedu, nan kara a kambia koló.

³⁶ Komersiantenan di otro pueblo ta flùit hasi chèrchè di bo. Loke ta pasa ku bo ta hororoso, bo a disparsé, pa semper!’