Ezekiel 26 - Papiamentu Bible 2013

Profesia kontra e siudat Tiro

¹ Riba e promé dia di luna, den e di diesun aña di eksilio, SEÑOR a dirigí palabra na mi:

² ‘Hende, Tiro a hari yen di chèrchè grita: Ha! E siudat ku nan ta yama “Porta di pueblonan” a kai; e ta habrí pa nos. Awor ku e siudat ei ta un ruina, lo mi bira riku.

³ P'esei,’ SEÑOR, mi Dios, ta bisa, ‘Mi mes ta bai tuma medida, Tiro. Manera laman ta lanta su olanan, asina ei lo Mi lanta hopi pueblo kontra bo.

⁴ Nan ta destruí bo murayanan i basha bo torennan abou. Asta sushedat di e siudat lo Mi bari benta afó, di manera ku no ta sobra nada mas ku un baranka bashí.

⁵ Lo e ta solamente un baranka den laman, kaminda ta pone nètnan pa seka. Mi a papia,’ SEÑOR, mi Dios, ta bisa. ‘Pueblonan strañero lo sakia Tiro

⁶ i mata e habitantenan di su pueblonan bisiña den kunuku. E ora ei nan lo rekonosé ku t'Ami ta SEÑOR.’

⁷ Esaki ta loke SEÑOR, mi Dios, ta bisa: ‘Tiro, Mi ta laga rei Nebukadnèsar di Bábel, e rei mas poderoso di tur reinan, ranka sali for di nort kontra bo ku kabai, garoshi, sòldá di kabayeria i hopi sòldá di infanteria.

⁸ Den kunuku lo e mata e habitantenan di e pueblonan bisiña, lo e lanta subida di tera pa sitia i subida pa ataká. Protegé pa un dak di eskudo

⁹ su sòldánan lo bati riba bo murayanan ku nan balki ku kachunan di heru. Ku barete nan ta basha bo torennan abou.

¹⁰ Nan lo basha bini riba bo ku asina tantu kabai ku bo ta keda tapá bou di nubianan di stòf. Bo murayanan lo sakudí di e bochincha di sòldánan di kabayeria i boroto di e wilnan di e garoshinan di guera, ora e ehérsito drenta manera ta drenta un siudat despues ku a kibra buraku den e murayanan.

¹¹ Patanan di e kabainan lo trapa kibra e kayanan. Bo habitantenan ta muri den bataya. Bo pilánan poderoso di tèmpel ta bai suela.

¹² Nan ta hòrta bo propiedatnan, bai ku bo merkansianan komo botin. Nan ta basha bo murayanan abou i tumba bo kasnan luhoso abou. E sushedat, piedranan i balkinan nan ta benta den laman.

¹³ Lo Mi laga bo kantamentu i muzik kambia bira silensio i lo no tende zonido di bo arpanan mas.

¹⁴ Mi ta hasi di bo un baranka bashí, un lugá kaminda ta seka nèt. Lo no rekonstruí bo, pasobra Ami, SEÑOR, a bisa.’ Esaki ta loke SEÑOR, mi Dios, ta bisa.

¹⁵ Esaki ta loke SEÑOR, mi Dios, ta bisa Tiro: ‘E pueblonan na kosta lo tembla ora nan tende e zonido di bo kaida i e kehamentu di bo hendenan heridá, ora ta mata bo habitantenan.

¹⁶ E gobernadornan di e pueblonan na kosta lo baha for di nan trono, kita nan mantelnan i nan pañanan bunita bòrdá. Spantá nan lo kai sinta abou, ta tembla sin fin, babuká di bo kaida.

¹⁷ Nan lo kanta e kantika di lamento akí riba bo: Destruí bo ta, siudat tan famoso, b'a disparsé for di laman. Bo habitantenan a goberná lamannan, tur kaminda nan tabatin miedu di nan.

¹⁸ Pero awor, awor ku b'a kai, tur e pueblonan na kosta ta tembla di miedu, e paisnan na kosta ta morto spantá.’

¹⁹ Esaki ta loke SEÑOR, mi Dios, ta bisa: ‘Ora Mi hasi boso un ruina manera siudatnan kaminda no tin hende ta biba, i ora Mi laga un lawina di awa sali for di laman, di manera ku awa ta tapa bo,

²⁰ e ora ei lo Mi laga bo baha den reino di morto, bai serka e hendenan ku hopi tempu promé ku bo a baha bai einan. Lo Mi laga bo manera otro siudatnan ku mashá tempu ta ruina, biba den reino di morto huntu ku esnan ku a muri kaba. Lo bo no bini bèk den e pais di bibunan.

²¹ Lo Mi hasi di bo un ehèmpel horibel. Lo bo disparsé pa semper. Lo buska bo, pero lo no haña bo nunka.’ Esei ta loke SEÑOR, mi Dios, ta bisa.