Ezekiel 23 - Papiamentu Bible 2013

Ohola i Oholiba: Samaria i Herusalèm

¹ SEÑOR a dirigí palabra na mi:

² ‘Hende, un dia tabatin dos ruman muhé, yunan di e mesun mama.

³ Tempu nan tabata hóben ainda, nan a biba bida di prostituta kaba na Egipto. Aya a karisiá nan pechu, aya a pasa man riba nan pechunan hóben.

⁴ Esun mayó tabata yama Ohola, su ruman muhé Oholiba. Mi a tuma nan komo esposa i nan a pone yu hòmber i yu muhé na mundu. Loke ta nan nòmber: Ohola ta Samaria, Oholiba ta Herusalèm.

⁵ Ohola tabata infiel na Mi i tabata deseá otro amante: e asirionan, hendenan balente,

⁶ bistí na blou püs, kansiernan i gobernadornan, un pa un yònkumannan ku bon tipo i sòldánan di kabayeria.

⁷ El a kometé aktonan inmoral ku tur e asirionan ei ku puesto altu i a hasi su mes impuru ku e diosnan falsu di e hòmbernan ku el a deseá.

⁸ E no a stòp ku e aktonan inmoral ku el a kuminsá kuné na Egipto. Aya kaba el a laga hòmber drumi kuné, pasa man riba su pechunan i sasia nan pashon kuné.

⁹ P'esei Mi a entreg'é den poder di su amantenan, e asirionan, e hendenan ku el a deseá.

¹⁰ Eseinan a kit'é sunú, kohe su yu hòmbernan i yu muhénan prezu i mat'é ku spada. E kastigu ku el a haña, a hasié un ehèmpel hororoso pa tur muhé.

¹¹ Su ruman muhé Oholiba a mira tur e kosnan akí. Pero su pashon i aktonan inmoral tabata mas grandi ku esunnan di su ruman muhé.

¹² El a deseá e asirionan, kansiernan i gobernadornan, hendenan balente bistí na paña mashá bunita, sòldánan di kabayeria itrein, un pa un yònkumannan ku bon tipo.

¹³ I Mi a mira kon el a hasi su mes impuru ku e hendenan ei: e ku su ruman ta riba e mesun skèr kòrtá.

¹⁴ Pero Oholiba a bai mas leu ku su aktonan inmoral. Riba un muraya el a mira figuranan di hòmber pintá ku fèrf kòrá: tabata kaldeonan,

¹⁵ ku faha na nan sintura i riba nan kabes un tùlbant ku puntanan lòs ta kologá. Nan tur tabata parse òfisirnan for di Bábel den e pais di kaldeonan.

¹⁶ Asina Oholiba a mira nan, el a kuminsá deseá nan i el a manda mensahero serka nan den e pais di kaldeonan.

¹⁷ I a bini hòmbernan for di Bábel, ku a drumi kuné i deshonr'é. Pero despues ku nan a hasié impuru, el a haña asko di nan.

¹⁸ E tabata kometé aktonan inmoral públikamente i tabata kita sunú pa tur hende. P'esei Mi a haña asko di dje, meskos ku di su ruman.

¹⁹ Pero no tabatin manera pa e stòp. E tabata komport'é meskos ku den su hubentut na Egipto.

²⁰ E tabata deseá amantenan ku tabatin un órgano seksual manera di buriku i ku tabata kayente manera kabai.

²¹ Oholiba, bo tabata deseá e aktonan inmoral bergonsoso di bo hubentut, tempu e egipsionan tabata karisiá bo pechu, tempu nan tabata pasa man riba bo pechunan hóben.’

²² P'esei, Oholiba, SEÑOR, mi Dios, ta bisa bo lo siguiente: ‘Mi ta pone bo amantenan, ku bo a haña asko di dje, lanta kontra bo; di tur banda Mi ta laga nan ranka sali kontra bo,

²³ hòmbernan for di Bábel, for di e pais di kaldeonan, for di Pekod, for di Shoa i for di Koa i tambe tur asirio. Yònkumannan ku bon tipo nan ta, kansiernan i gobernadornan, ofisialnan i otro funshonarionan altu, sòldánan di kabayeria itrein.

²⁴ Nan lo ataká bo ku kabai ku garoshi, ku un ehérsito grandi i poderoso. Ekipá ku eskudo grandi i chikitu i hèlmu nan lo rondoná bo. Mi ta laga na nan pa husga bo, nan lo sentensiá bo segun nan mes leinan.

²⁵ Lo Mi laga bo sinti ku Mi no ta tolerá ningun amante banda di Mi. Nan lo baha nan rabia riba bo. Nan ta kòrta bo nanishi i oreanan kita afó i mata loke a sobra di bo habitantenan ku spada; nan lo bai ku bo yunan komo prezu i pega e siudat desolá na kandela.

²⁶ Nan ta ranka bo pañanan for di bo kurpa i hòrta bo prendanan for di bo.

²⁷ Asina Mi ta pone un fin na bo aktonan inmoral, na bo bida komo prostituta ku a kuminsá na Egipto. Lo bo no as mas pa otro amante ni kòrda nunka mas riba Egipto.’

²⁸ Esaki ta loke SEÑOR, mi Dios, ta bisa: ‘Mi ta entregá bo den poder di e hòmbernan ku bo ta odia, den poder di esnan ku bo tin asko di dje.

²⁹ Nan lo laga bo sinti nan odio, hòrta tur loke bo ta poseé fo'i bo i laga bo blo sunú atras; tur hende lo mira bo sunú bergonsoso. Pa motibu di bo aktonan inmoral i bo bida komo prostituta

³⁰ ta hasi asina ku bo, pa motibu di bo aktonan inmoral ku otro pueblonan, pasobra bo a hasi bo mes impuru ku nan diosnan falsu.

³¹ Bo a sigui ehèmpel di bo ruman muhé. P'esei Mi ta laga bo tambe bebe for di e beker ku Mi a lag'é bebe for di dje.’

³² Esaki ta loke SEÑOR, mi Dios, ta bisa: ‘E beker di bo ruman muhé lo bo bebe, un beker hundu, hanchu; e ta yen te na rant. Ta hasi chèrchè di bo i hari bo,

³³ pasobra e ta hasi bo burachi i hinka bo den desesperashon grandi: e beker di bo ruman muhé Samaria ta un beker di konsternashon i konfushon.

³⁴ Lo bo beb'é te den bòm, mord'é kibra i habri bo pechunan ku e skèrfnan. Ami, SEÑOR, a papia.’ Esaki ta loke SEÑOR, mi Dios, ta bisa.

³⁵ ‘Pasobra bo a lubidá Mi i a bira lomba pa Mi,’ SEÑOR, mi Dios, ta bisa, ‘lo bo karga e kastigu pa bo aktonan inmoral i bo bida komo prostituta.’

³⁶ SEÑOR a bisa mi: ‘Hende, bo ke husga Ohola i Oholiba? Laga nan mira e ora ei kon repugnante nan práktikanan ta.

³⁷ Nan a hasi nan kulpabel di adulterio i asesinato. Nan a drenta ku diosnan falsu i a ofresé nan asta e yunan ku nan a duna Mi, komo sakrifisio.

³⁸ Mas kos nan a hasi ku Mi: den e mesun tempu ei nan a hasi mi santuario impuru i a profaná mi dia di sabat.

³⁹ E mes dia ku nan a ofresé mi yunan komo sakrifisio na nan diosnan falsu, nan a bini mi santuario pa profan'é; asina nan a komportá den mi kas.

⁴⁰ Sí, asta bo a manda bo mensahero serka e hòmbernan na e paisnan leu i riba bo invitashon nan a bini. Pa nan bo a baña bo kurpa, pinta wowo i dòrna bo kurpa ku prenda.

⁴¹ Bo a kai drumi riba un kama di prònk, miéntras mesa tabata drechá ku mí sensia perfumá i mí zeta riba dje.

⁴² Un kantidat grandi di hende a bini serka dje i tabata tende bochincha di un multitut mashá kontentu. Banda di e hòmbernan ku tabat'ei kaba, a bini tambe hende burachi for di den desierto, ku a bistié armbant i pone un korona elegante riba su kabes.

⁴³ Mi a pensa den Mi mes: Nan ta bai asta serka un muhé gastá asina, nan ke drenta ku un hende asina?

⁴⁴ Nan tabata bai serka dje manera un hende ta bai serka un prostituta. Asina nan tabata bai serka Ohola i Oholiba, e muhénan ei ku tabata biba un bida parotin.

⁴⁵ Pero hòmbernan hustu lo husga nan segun e leinan ku ta konta pa muhénan adúltero i muhénan asesino. Pasobra t'esei nan ta.’

⁴⁶ Esaki ta loke SEÑOR, mi Dios, ta bisa: ‘Laga e hendenan bini huntu pa maltratá nan i hòrta kos for di nan.

⁴⁷ Nan lo tira nan ku piedra mata i kap nan na pida pida ku spada, mata nan yunan i pega nan kasnan na kandela.

⁴⁸ Lo Mi pone un fin na e bida parotin den e pais akí. Esei lo ta un atvertensia pa tur otro muhé pa nan no biba manera e muhénan akí a biba.

⁴⁹ Lo laga boso paga pa boso aktonan inmoral i boso lo karga konsekuensia di boso pikánan ku e diosnan falsu. E ora ei boso lo rekonosé ku t'Ami ta SEÑOR Dios.’