Ezekiel 21 - Papiamentu Bible 2013

¹ SEÑOR a dirigí palabra na mi:

² ‘Hende, fiha bo bista den direkshon di Herusalèm, basha bo palabranan riba e lugánan sagrado, profetisá kontra e pais Israel.

³ Bisa nan: Esaki ta loke SEÑOR Dios ta bisa: Mi ta bai aktua kontra boso! Lo Mi saka mi spada pa mata tur habitante, tantu esnan hustu komo esnan malbado.

⁴ Lo Mi mata tur hende ku mi spada, for di zùit te nort.

⁵ Henter mundu lo sa, ku Ami, SEÑOR, a saka e spada for di su baliña; lo Mi no hink'é aden atrobe.

⁶ Hende, keha manera un hende kibrá, keha di un tristesa profundo nan dilanti.

⁷ I si nan puntra bo pakiko bo ta keha, bo mester bisa: Pa motibu di un notisia ku ta bai bini; e ora ei kurason di tur hende lo paralisá di miedu, nan brasanan lo kologá slap, nan lo pèrdè kurashi i lo no por wanta nan awa. E notisia ei ta bini sigur, e kos ta bai sosodé.’ Esei ta loke SEÑOR Dios ta bisa.

Kantika di e spada

⁸ SEÑOR a dirigí palabra na mi:

⁹ ‘Hende, profetisá i bisa: Esaki ta loke SEÑOR, mi Dios, ta bisa: Un spada, a hasi un spada skèrpi, a mula un spada!

¹⁰ A hasié skèrpi pa kousa un matansa, a mul'é p'e kòrta manera welek. Kon nos por ta kontentu? Bo a despresiá kada palu, mi yu, i tur konseho.

¹¹ Mula a mula e spada pa kohe den man, a hasié skèrpi i mul'é pa pon'é den man di un asesino.

¹² Grita duru, hende, yora di fèrdrit. Pasobra a mek e spada riba mi pueblo, kontra tur lider di Israel. Nan lo muri pa spada, huntu ku mi pueblo. Bati riba bo hep di desesperashon!

¹³ Un prueba pisá ta bini. I kiko lo sosodé, si bo despresiá e palu? Lo e no bini? Esei ta loke SEÑOR, mi Dios, ta bisa.

¹⁴ Abo, hende, profetisá, bati man; e spada lo zuai dos, tres be. Ta un spada ku ta mata, e ta kousa hopi víktima. E ta sera nan aden,

¹⁵ laga nan pèrdè kurashi i ta mata hopi hende. Mi ta laga e spada mata den tur nan siudatnan. A traha e spada p'e kòrta manera welek, a hasié skèrpi pa e mata.

¹⁶ Dal na banda robes, ataká na banda drechi, dal kaminda bo por dal.

¹⁷ Mi tambe lo bati man. Lo Mi baha mi rabia. Ami, SEÑOR, a bisa asina.’

Rei di Bábel ta e spada den man di SEÑOR

¹⁸ SEÑOR a dirigí palabra na mi:

¹⁹ ‘Abo, hende, pinta dos kaminda via kua rei di Bábel por pasa ku su spada. Sòru pa tur dos kaminda kuminsá den e mesun pais i indiká ku un señal na kuminsamentu di tur dos kaminda, kua siudat nan ta bai.

²⁰ Via esun kaminda e spada por yega den e siudat Raba di e amonitanan, via e otro kaminda den e Herusalèm reforsá na Huda.

²¹ E rei di Bábel ta pará na kuminsamentu di e dos kamindanan. Pa determiná kua direkshon e mester kohe, e ta sakudí e flechanan, konsultá su diosnan di kas i saminá higra di un bestia morto.

²² E flecha ku ta indiká Herusalèm, ta kai den su man drechi: e señal pa e pone aya balkinan ku kachunan di heru pa dal e portanan kibra, pa e duna òrdu pa mata, pa e grita gritunan di bataya i traha subidanan di tera pa sitia i subidanan pa ataká.

²³ E hendenan na Herusalèm lo pensa ku esaki ta un señal engañoso, pasobra nan a hasi huramentunan solèm na e rei di Bábel. Pero lo e rekordá nan nan maldat i kohe nan prezu.’

²⁴ P'esei esaki ta loke SEÑOR, mi Dios, ta bisa: ‘Boso mes a mustra boso kulpabilidat dor ku boso maldatnan a sali na kla i boso pikánan a bira evidente den tur kos ku boso ta hasi. Pasobra boso kulpabilidat a sali na kla, lo duna boso un trato severo.

²⁵ I abo, lider di Israel, kriminal malbado! E dia ku ta kastigá bo krímennan, ta aserká.’

²⁶ Esaki ta loke SEÑOR, mi Dios, ta bisa: ‘Kita e tùlbant ei, pone e korona ei abou. Tur kos ta bira otro: loke ta abou, ta bira altu; loke ta altu, ta bira abou.

²⁷ Un ruina, un ruina kompleto Mi ta hasi di Herusalèm. Pero promé esun ku Mi a duna poder pa kastigá e siudat mester bini.

E spada di SEÑOR kontra e amonitanan

²⁸ I abo, hende, profetisá i bisa: Esaki ta loke SEÑOR, mi Dios, ta bisa di e amonitanan i di nan hasimentu di chèrchè: Un spada, a saka un spada, un spada pa mata, a hasié skèrpi pa destruí, pa kòrta manera welek.

²⁹ Ounke tabatin vishonnan mentiroso tokante bo i profesianan engañoso, ya bo ta dal e hendenan malbado riba nan nèk; dia di nan kastigu ta bini.

³⁰ Pero hinka bo spada bèk den su baliña! Aya kaminda a krea bo, na e pais for di kaminda bo ta bini, lo Mi husga bo.

³¹ Mi ta basha tur mi rabia riba boso, esei ta dal boso manera un kandela fuerte. Mi ta entregá boso na bárbaronan; nan sa kon mester destruí.

³² E kandela lo kima boso kaba ku boso, boso sanger lo kore den boso mes pais. Ningun hende lo no kòrda boso. Ami, SEÑOR, a bisa.’