Ezekiel 2 - Papiamentu Bible 2013

¹ El a bisa mi: ‘Hende, lanta para règt; Mi ta bai papia ku bo.’

² Ora mi a tende e palabranan akí, mi a haña forsa i por a lanta para règt atrobe. E ora ei mi a bolbe tende e stèm.

³ El a bisa mi: ‘Hende, mi ta manda bo serka e israelitanan, e pueblo rebelde ei ku a lanta kontra Mi. Te dia djawe nan a bira lomba pa Mi, meskos ku nan antepasadonan.

⁴ Nan yunan tambe tin kièr i ta tèrko. Mi ta manda bo serka nan i bo mester papia ku nan na mi nòmber, na nòmber di SEÑOR Dios.

⁵ Ku nan skucha bo òf nò, komo nan ta un pueblo rebelde, nan lo ripará ku un profeta tabata serka nan.

⁶ I abo, hende, kiko ku nan por bisa, no tene miedu di nan. Lo ta komo si fuera ta entre mata ku sumpiña i skarpion venenoso bo ta haña bo, pero no tene miedu di loke nan ta bisa i no laga nan miradanan di rabia spanta bo. Nan ta un pueblo rebelde.

⁷ Pero bo mester bisa nan loke Mi ta enkargá bo, ku nan skucha òf nò, komo nan ta rebelde.

⁸ I abo, hende, skucha loke Mi ta bisa bo. No sea rebelde manera e pueblo akí. Habri bo boka i kome loke Mi ta duna bo.’

⁹ Mi a mira un man ku un ròl aden sali den mi direkshon.

¹⁰ E man a habri e ròl pa mi: tur dos banda tabata yen skibí ku kehonan i lamentonan di doló.