Ezekiel 19 - Papiamentu Bible 2013

Kantika di lamento riba e lidernan di Israel

¹ Bo mester kanta e siguiente kantika di lamento riba e lidernan di Israel:

² ‘Esta un bunita leon muhé boso mama tabata entre e otro leonnan! Meimei di su yunan el a kai drumi, kria su yu 'i leonnan.

³ Un di su yunan el a kria pa bira un leon yòn; e leon yòn a siña sker su víktimanan, asta tabata devorá hende.

⁴ Pero e pueblonan a tende papia di dje; nan a koh'é prezu den un trampa; i na hak a hib'é Egipto.

⁵ Ora e mama a mira ku el a spera enbano i ku su speransa a kaba na nada, el a skohe un otro yu 'i leon i a kri'é pa e bira un leon yòn.

⁶ Kabes na laria e yu 'i leon ei tabata kana meimei di e leonnan, el a bira un leon yòn: el a siña sker su víktimanan, asta tabata devorá hende.

⁷ E tabata basha nan palasionan abou i destruí nan siudatnan. Miedu a drenta tur habitante di e pais pa motibu di su gruñamentu.

⁸ E pueblonan for di e paisnan rondó a lanta kontra dje; nan a tira nan nèt pa koh'é i a koh'é prezu den un trampa.

⁹ Nan a domin'é ku hak i a ser'é den un kouchi. Nan a hib'é pa e rei di Bábel i a hink'é den un fòrti reforsá pa no tende su gruñamentu mas riba e serunan di Israel.

¹⁰ Bo mama tabata parse un mata di wendrùif, plantá kantu di awa; el a haña ranka i fruta danki na e awa abundante.

¹¹ El a haña taki fuerte ku a krese bira sèpter di rei. Un di nan a krese bai te den nubia. E tabata destaká pa su altura, pa su rankanan yen.

¹² Pero den rabia a ranka saka e mata di wendrùif i tir'é na suela. Bientu di ost a seka su frutanan i nan a kai i pashimá. Kandela a destruí e taki fuerte.

¹³ Awor a planta e mata di wendrùif den desierto, den un pais seku seku.

¹⁴ Kandela a sali for di su tronkon i a destruí su ramanan i frutanan. E no tin taki fuerte mas, e sèpter di rei a disparsé.’ Esaki ta un kantika di lamento, asina a kant'é semper.