Ezekiel 11 - Papiamentu Bible 2013

SEÑOR ta kondená e lidernan di pueblo

¹ Spiritu di Dios a hisa mi hiba mi Porta Ost di tèmpel. Ei mi a mira 25 hòmber, entre otro dos lider di pueblo, esta Yaazanías, yu hòmber di Azur, i Pelatías, yu hòmber di Benayahu.

² SEÑOR a bisa mi: ‘Hende, esakinan ta e hòmbernan malbado ku aki den siudat ta hiba mal maneho i ta pone e hendenan hasi maldat.

³ Nan ta bisa: “Por lo pronto no konstruí kas; e siudat ta wea i nos ta e karni.”

⁴ P'esei, profetisá kontra nan, profetisá, hende!’

⁵ E ora ei Spiritu di SEÑOR a poderá di mi i a duna mi e enkargo di papia asin'akí: ‘Esaki Ami, SEÑOR, ta bisa. Pueblo di Israel, Mi sa kiko boso ta bisa, kua pensamentu ta bini den boso mente.

⁶ Den e siudat akí boso a hasi asina tantu víktima ku kayanan ta yen di morto.

⁷ P'esei Ami, SEÑOR Dios, ta bisa: Sí, e siudat ta un wea, pero esnan ku boso a mata, ta nan ta e karni. Boso Mi ta saka for di siudat.

⁸ Boso tin miedu di guera? Mi ta laga ehérsitonan ranka sali kontra boso! Esei Ami, SEÑOR Dios, ta anunsiá.

⁹ Mi ta saka boso for di siudat, Mi ta entregá boso den man di strañeronan. Mi ta bai kastigá boso.

¹⁰ Lo mata boso ku spada; den boso pais mes Mi ta kastigá boso. E ora ei boso lo rekonosé ku t'Ami ta SEÑOR.

¹¹ Siudat lo no ta e wea, den kual boso ta seif manera e karni; den boso pais mes Mi ta kastigá boso.

¹² Boso lo rekonosé ku t'Ami ta SEÑOR, boso, ku a violá mi reglanan, ku no a kumpli ku mi leinan, pero wèl ku esunnan di e pueblonan ku ta rondoná boso!’

¹³ Miéntras mi tabata profetisá, Pelatías, yu hòmber di Benayahu, a muri. Mi a kai na rudia i a grita: ‘O, SEÑOR Dios! Kaba Bo ta bai kaba ku loke a sobra di Israel?’

SEÑOR ta primintí ku E ta trese e eksiliadonan bèk

¹⁴ SEÑOR a dirigí palabra na mi:

¹⁵ ‘Hende, ta bo ruman hòmbernan, bo famia i henter Israel, e habitantenan di Herusalèm ta bisa: “Keda kaminda boso ta, leu for di SEÑOR, pasobra ta nos El a duna e pais akí komo propiedat.”

¹⁶ P'esei bo mester bisa lo siguiente: Esaki ta loke SEÑOR Dios ta bisa: Maske Mi a manda nan bai serka pueblonan strañero i a plama nan den otro pais, nan por a adorá Mi tòg na un manera limitá.

¹⁷ Bo mester bisa lo siguiente tambe: Esaki SEÑOR Dios ta bisa: Lo Mi saka boso for di e paisnan leu ei ku e pueblonan strañero ei. Mi ta trese boso huntu na Israel, e pais ku lo Mi duna boso.

¹⁸ Ora nan bai bèk aya, nan lo kita tur e práktikanan repugnante i diosnan falsu horibel for di den henter e pais.

¹⁹ Lo Mi duna nan un kurason nobo i un spiritu nobo. Na lugá di un kurason di piedra Mi ta duna nan un kurason bibu.

²⁰ E ora ei nan lo ehekutá mi reglanan i kumpli ku mi leinan. Nan lo ta mi pueblo, Ami lo ta nan Dios.

²¹ Pero esnan ku a entregá nan ku alma i kurpa na e práktikanan repugnante i horibel, lo karga konsekuensia di nan aktonan. Esaki ta loke SEÑOR Dios ta bisa.’

Gloria di SEÑOR ta bandoná Herusalèm

²² E ora ei e kerubinnan ku e wilnan banda di nan a habri nan alanan, miéntras gloria di Dios di Israel tabata riba nan.

²³ Gloria di SEÑOR a subi sali for di e siudat i a baha riba e seru ku tin na parti ost di e siudat.

²⁴ Den e vishon Spiritu di Dios a hisa mi hiba mi serka e eksiliadonan na e pais di kaldeonan. E vishon a disparsé.

²⁵ E ora ei mi a konta nan tur loke SEÑOR a laga mi mira.