Éksodo 9 - Papiamentu Bible 2013

Di sinku plaga: e bestianan ta haña pèst

¹ E ora ei SEÑOR a bisa Moises: ‘Bai bisa fárao: “SEÑOR, Dios di e hebreonan, ta ordená bo: Laga mi pueblo bai pa nan adorá Mi.

² Si bo nenga di laga nan bai i sigui stroba nan,

³ lo Mi laga bo bestianan den kunuku haña un pèst teribel. Kabai, buriku, kamel, baka, karné i kabritu lo muri.

⁴ Wèl lo Mi hasi distinshon entre bestia di e egipsionan i esnan di e israelitanan. Ningun bestia di israelita lo no muri.” ’

⁵ Ademas SEÑOR a stipulá e ora tambe. El a bisa: ‘Mañan Mi ta hasié.’

⁶ I su manisé SEÑOR a hasié. Tur e bestianan di e egipsionan a muri, ma di e israelitanan ni un!

⁷ Fárao a laga kontrolá e bestianan i a resultá ku ni un bestia di e israelitanan no a muri. Tòg el a keda tèrko, el a nenga di laga e pueblo bai.

Di seis plaga: yaga

⁸ SEÑOR a bisa Moises i Aaron: ‘Kada un di boso saka un man di shinishi for di den un fòrnu i laga Moises bent'é den laria dilanti di fárao.

⁹ E shinishi lo plama manera puiru riba henter Egipto i kousa serka hende i bestia blar grandi ku ta kibra bira yaga.’

¹⁰ Moises i Aaron a saka shinishi for di un fòrnu i a bai para dilanti di fárao. Moises a benta e shinishi den laria. Hende i bestia a keda tur na yaga.

¹¹ Ni e magonan no por a keda huntu ku Moises, pasobra nan tambe, meskos ku e otro egipsionan, tabata tur na yaga.

¹² Pero SEÑOR a laga fárao keda tèrko, di moda ku e no a hasi kaso di nan petishon, manera SEÑOR a bisa Moises.

Di shete plaga: yobida di pipita di eis

¹³ E ora ei SEÑOR a bisa Moises: ‘Lanta mañan trempan bai bisa fárao: “SEÑOR, Dios di e hebreonan, ta ordená bo: Laga mi pueblo bai pa nan adorá Mi.

¹⁴ For di awor lo Mi manda e plaganan riba bo, riba bo funshonarionan i riba bo pueblo, pa bo sa ku riba mundu henter no tin unu igual na Mi.

¹⁵ Mi por a manda pèst, kaba ku bo i bo pueblo for di riba mundu.

¹⁶ Pero Mi ta laga bo biba pa mustra bo mi poder i pa henter mundu haña sa ta ken Mi ta.

¹⁷ Apesar di tur kos bo ta nenga di laga mi pueblo bai.

¹⁸ P'esei mañan den e oranan akí lo Mi laga pipita di eis yobe riba Egipto, manera no a yobe nunka den henter historia di Egipto.

¹⁹ Hiba bo bestianan i tur loke bo tin den kunuku paden pa nan ta for di peliger. Pipita di eis lo kai i mata tur loke keda pafó, sea ta hende òf bestia.” ’

²⁰ Algun funshonario di fárao a tuma SEÑOR su palabra na serio. Nan a hiba nan katibunan i nan bestianan paden.

²¹ Pero otronan no a hasi kaso i nan a laga nan katibunan i nan bestianan den kunuku.

²² SEÑOR a bisa Moises: ‘Hisa bo man na shelu pa pipita di eis kai riba henter Egipto, riba hende, riba bestia i riba tur grano den kunuku.’

^23-24 Moises a hisa su bastòn na shelu i SEÑOR a laga bos grita, pipita di eis yobe i welek kòrta te den tera. Miéntras welek tabata kòrta sin stòp, pipita di eis tabata kai riba henter Egipto. Nunka den historia di Egipto pipita di eis a yega di kai duru asina.

²⁵ Tur loke tabata den kunuku a keda destruí: hende i bestia a muri, loke tabatin plantá tabata tur tumbá i e palunan a kai.

²⁶ Solamente na Goshen, kaminda e israelitanan tabata biba, pipita di eis no a kai.

²⁷ E ora ei fárao a laga buska Moises i Aaron i a bisa nan: ‘Awor mi mester rekonosé ku mi a hasi piká. SEÑOR ta hustu. Ami i mi pueblo ta kulpabel.

²⁸ Resa pidi SEÑOR pa E laga e bos teribel ei stòp di grita i pipita di eis stòp di kai, pasobra ta mas ku mi por soportá. E ora ei mi ta laga boso bai; mi no ta stroba boso mas.’

²⁹ Moises a rospondé: ‘Asina mi sali for di siudat, mi ta hisa mi mannan i resa na SEÑOR. Bos lo stòp di grita i pipita di eis lo stòp di kai, pa bo sa ku mundu ta di SEÑOR.

³⁰ Pero mi sa ku ainda ni abo ni bo funshonarionan no tin rèspèt di SEÑOR Dios.’

³¹ Mata di vlas i di sebada a bai pèrdí, pasobra e sebada tabatin tapushi kaba i e vlas tabata tur na flor.

³² Pero no a pasa nada ku e trigo i otro tipo di grano pasobra no tabata nan tempu ainda.

³³ Moises a bai for di palasio di fárao, el a sali for di siudat i a resa na SEÑOR ku su mannan na laria. E ora ei bos a stòp di grita, pipita di eis i e áwaseru duru a stòp di kai.

³⁴ Pero ora fárao a mira ku e mal tempu a pasa, el a sigui hasi piká. El a keda tèrko i su funshonarionan tambe.

³⁵ Manera SEÑOR a laga Moises anunsiá: Fárao a nenga redondamente di laga e israelitanan bai.