Éksodo 37 - Papiamentu Bible 2013

Trahamentu di e arka

¹ Besalel a traha e arka di palu di akasia: un meter bintisinku largu, setentisinku sèntimeter hanchu i setentisinku sèntimeter altu.

² El a fur'é di paden i di pafó ku oro puru i a traha un leshi di oro rònt di dje.

³ El a traha kuater renchi di oro i a pega nan na e kuater pianan, dos na kada banda di e arka.

⁴ Tambe el a traha bara di palu di akasia i a fura nan ku oro.

⁵ El a pasa nan den e renchinan na kada banda di e arka pa por karga e arka.

⁶ Besalel a traha un tapa di oro puru: un meter bintisinku largu i setentisinku sèntimeter hanchu.

⁷ El a traha na rant di kada banda kòrtiku un kerubin di oro batí,

⁸ tur na un ku e tapa.

⁹ E kerubinnan tabata ku kara pa otro den direkshon di e tapa i tabata protegé e tapa ku nan alanan habrí.

Trahamentu di e mesa

¹⁰ Tambe Besalel a traha un mesa di palu di akasia: un meter largu, sinkuenta sèntimeter hanchu i setentisinku sèntimeter altu.

¹¹ El a fur'é ku oro puru i a traha un leshi di oro rònt di dje.

¹² El a traha un rant, hanchura di un man, na e mesa i rònt di e rant un leshi di oro.

¹³ El a traha kuater renchi di oro i a pega nan na e skinanan na e kuater pianan.

¹⁴ E renchinan tabata serka di e rant pa por pasa e baranan di karga e mesa.

¹⁵ El a traha e baranan di palu di akasia i a fura nan ku oro.

¹⁶ Tambe Besalel a traha e rekisitonan ku tabata pertenesé na e mesa: e skòternan, e skalchinan, e kòmchinan i e kanikanan pa sakrifisio di biña, tur di oro puru.

E kandelar

¹⁷ Tambe Besalel a traha un kandelar di oro puru. Su pia, bara i e adornonan, esta e kèlki-, kònòpi- i blachinan tabata tur na un.

¹⁸ For di e bara tabata sali seis brasa, tres na kada banda.

¹⁹ Na kada un di e seis brasanan tabatin tres kèlki den forma di flor di mangel, ku tantu nan kònòpinan komo nan blachinan

²⁰ i na e bara di e kandelar kuater kèlki, tambe den forma di flor di mangel ku kònòpi i blachi.

²¹ Bou di kada par di brasa ku tabata sali for di e bara tabatin un kònòpi di flor.

²² Tur kònòpi i brasa tabata trahá na un ku e kandelar: ún pida oro batí.

²³ Tambe el a traha shete lampi di zeta pa e kandelar, ku nan snùiter i baki di oro puru.

²⁴ Pa e kandelar ku tur loke ta pertenesé n'e Besalel a usa trinta kilo di oro puru.

E altá pa ofresé sensia

²⁵ Besalel a traha un altá di palu di akasia pa ofresé sensia. E altá tabata firkant: sinkuenta sèntimeter largu i sinkuenta sèntimeter hanchu. E tabata un meter altu. E kachunan tabata tur na ún ku e altá.

²⁶ El a fura e blat ariba, e bandanan i e kachunan ku oro puru i a traha un leshi di oro rònt di dje.

²⁷ Na kada banda bou di e leshi, el a pega dos renchi di oro. E renchinan tabata pa pasa e baranan ora ta karga e altá.

²⁸ El a traha e baranan di palu di akasia i a fura nan ku oro.

Preparashon di sensia i di zeta pa konsagrá

²⁹ Besalel a prepará tambe e zeta sagrado i e sensia puru di holó dushi manera un trahadó di perfume ta traha perfume.