Efesionan 6 - Papiamentu Bible 2013

Mayornan i nan yunan

¹ Muchanan, obedesé boso mayornan manera ta agradá Señor, pasobra esei ta korekto.

^2-3 E mandamentu ku ta bisa: ‘Honra bo tata i mama, pasobra si bo hasi asina, lo bai bon ku bo i lo bo tin bida largu riba mundu’, ta e promé mandamentu ku tin un promesa mará n'e.

⁴ Tatanan, no pone boso yunan rabia, ma lanta nan ku disiplina i ku e siñansa ku Señor ke.

Shon i katibu

⁵ Katibunan, obedesé boso shonnan na mundu. Obedesé nan ku rèspèt, temor i ku un kurason sinsero, komo si fuera ta Kristu mes boso ta sirbi.

⁶ No hasi manera hende chifladó i sirbi nan djis ora nan ta mira boso, ma manera katibu di Kristu, ku ta hasi Dios su boluntat ku henter nan kurason.

⁷ Hasi boso trabou ku entusiasmo, komo si fuera ta pa Señor i no pa hende boso ta hasié!

⁸ Kòrda ku Señor lo rekompensá kada hende di akuerdo ku e bon ku el a hasi, sin tene kuenta ku ken ta hende liber i ken ta katibu.

⁹ Di boso banda, boso ku ta shon mester trata boso katibunan na mesun manera. Stòp di menasá nan. Tene kuenta ku boso tur tambe tin un Shon den shelu; anto E no ta tuma parti pa niun hende!

E armadura spiritual

¹⁰ Pa terminá, mi rumannan: buska boso forsa den Señor i den su gran poder.

¹¹ Bisti e armadura ku Dios ta duna boso, pa boso por enfrentá diabel su plannan engañoso.

¹² Pasobra nos lucha no ta kontra ser humano, sino kontra e outoridatnan, e gobernantenan i e gobernadónan spiritual di e mundu den skuridat akí i kontra e spiritunan malu ku ta biba den e regionnan selestial.

¹³ P'esei bisti e armadura ku Dios ta duna, pa boso por wanta duru ora e dia di maldat yega i pa, despues di a hasi tur kos, boso por keda firme pará.

¹⁴ P'esei antó para kla ku bèrdat komo faha na bo sintura, ku hustisia komo korasa

¹⁵ i ku zelo pa anunsiá e mensahe di pas komo sandalia na boso pia!

¹⁶ Ma huntu ku esei, laga boso fe ta e eskudo ku por wanta e flechanan sendé na kandela ku e malbado ta tira riba boso.

¹⁷ Salbashon mester ta e hèlmu ku ta tapa boso kabes i palabra di Dios e spada ku Spiritu Santu a duna boso.

¹⁸ Resa i pidi Dios su yudansa semper i na tur okashon, guiá pa Spiritu Santu. Den esei sea alerta, i resa sin deskurashá pa henter e pueblo santu.

¹⁹ Resa pa mi tambe, pa Dios duna mi e palabranan korekto ora mi ta mustra ku kurashi e boluntat skondí di Dios ku ta kontenido di e bon notisia.

²⁰ Mi ta embahador den servisio di e bon notisia ei, ounke mi ta den prizòn awor akí. Resa antó pa mi papia ku kurashi manera mester ta.

Saludo final

²¹ Tígiko, nos ruman stimá i ayudante fiel den sirbishi di Señor, lo duna boso tur notisia. Ya boso ta sa kon kos ta bai ku mi.

²² P'esei mes mi ta mand'é pa boso sa tur kos di nos i pa e kurashá boso.

²³ Dios Tata i Señor Hesu-Kristu duna tur ruman pas, amor i fe.

²⁴ Grasia pa tur esnan ku ta stima nos Señor Hesu-Kristu ku un amor ku ta dura pa semper.