Echonan 6 - Papiamentu Bible 2013

Un grupo nobo di shete ayudante

¹ Tempu e kantidat di kreyente tabata krese, e hudiunan di abla griego a kuminsá keha riba e hudiunan di abla arameo, pasobra tabata neglishá nan biudanan den e distribushon diario di kuminda.

² E diesdos apòstelnan a yama henter e grupo di kreyente huntu i bisa nan: ‘No ta bon pa nos neglishá predikamentu di palabra di Dios pa nos sirbi kuminda na e hendenan.

³ P'esei, rumannan, skohe shete hòmber di bon reputashon for di boso seno, hòmber yená ku Spiritu Santu i sabiduria, i nos lo duna nan e enkargo ei.

⁴ Nos mes lo dediká nos na orashon i predikamentu di palabra di Dios.’

⁵ Henter e grupo a bai di akuerdo ku e proposishon, i nan a skohe Esteban, un hòmber yen di fe i Spiritu Santu, tambe Felipe, Progoro, Nikanor, Timon, Parmenas, i Nikolaos di Antiokia ku a kombertí bira hudiu.

⁶ Nan a presentá nan na e apòstelnan, ku a resa i pone man riba nan.

⁷ Palabra di Dios a sigui plama. E kantidat di kreyente na Herusalèm a sigui krese mas i mas, i un grupo grandi di saserdote a aseptá fe.

II. E BON NOTISIA TA PLAMA RÒNT HUDEA, GALILEA I SAMARIA (6:8—9:31) Esteban, ún di e shete ayudantenan Testigunan falsu

⁸ Esteban, yená ku e poder ku el a risibí di Dios, tabata hasi hopi milager i señal tremendo den pueblo.

⁹ Pero algun hende a lanta kontra dje. Nan tabata miembro di e asina yamá ‘snoa di e Libertinonan’, na kua e hudiunan di Sirene i Alexandria tabata pertenesé. Nan, huntu ku e hudiunan di Silisia i Asia, a kuminsá diskutí ku Esteban.

¹⁰ Ma nan no tabata por kuné, pasobra e tabata papia ku sabiduria di Spiritu Santu.

¹¹ E ora ei nan a paga algun hende pa gaña i bisa: ‘Nos a tend'é papia kontra Moises i blasfemá Dios.’

¹² Asina nan a logra instigá pueblo, e ansianonan i e dòktornan di lei. Nan a bin kohe Esteban hib'é dilanti di Konseho Supremo.

¹³ Ei nan a trese testigu falsu ku a deklará: ‘E hòmber akí ta papia sin stòp kontra e lugá santu akí i kontra Lei.

¹⁴ Pasobra nos a tend'é bisa ku e Hesus di Nazarèt ei lo destruí e lugá akí i kambia e reglanan ku Moises a laga pa nos!’

¹⁵ Tur e miembronan di Konseho Supremo a fiha nan bista riba Esteban i nan a mira un kara manera di un angel.