Echonan 4 - Papiamentu Bible 2013

DEN NÒMBER DI HESUS DI NAZARÈT (kontinuashon) Konfrontashon ku Konseho Supremo

¹ Miéntras Pedro i Huan tabata papia ku e pueblo, e saserdotenan, e kapitan di guardia di tèmpel i e saduseonan a baha bini riba nan.

² No a kai nan niun tiki bon ku e apòstelnan tabata siña e hendenan i proklamá ku tin lantamentu for di morto a base di resurekshon di Hesus.

³ Nan a arestá nan i a sera nan te su siguiente dia, komo ya tabata anochi.

⁴ Ma hopi di esnan ku a skucha e mensahe a kere, i e kantidat di disipel a yega mas o ménos sinku mil.

⁵ Siguiente dia e lidernan, ansianonan i dòktornan di lei a reuní na Herusalèm

⁶ ku gransaserdote Anas, Kaifas, Huan, Alexander i henter famia di gransaserdote.

⁷ Nan a hiba Pedro i Huan dilanti i puntra: ‘Pa medio di kua forsa òf na nòmber di ken boso a hasi esaki?’

⁸ E ora ei Pedro, yená ku Spiritu Santu, a bisa nan: ‘Lidernan di pueblo i ansianonan,

⁹ ta interogá nos awe pa motibu di un bon obra ku nos a hasi pa un hende malu i pa haña sa dor di kua forsa el a haña su salú.

¹⁰ Wèl bon, laga ta bon kla pa boso tur i pa henter pueblo di Israel: e hòmber pará boso dilanti aki, a kura den nòmber di Hesu-Kristu di Nazarèt, Esun ku boso a krusifiká i ku Dios a lanta for di morto.

¹¹ Hesus ta, manera Skritura ta bisa: “e piedra, rechasá pa boso, e trahadónan, ku a bira e piedra prinsipal.”

¹² Den djE so por haña salbashon; riba mundu no tin niun otro nòmber duná na hende, ku por salba nos.’

¹³ Ora nan a mira kon Pedro i Huan tabata papia sin miedu i a realisá ku nan tabata hende sin edukashon òf kualifikashon, nan a keda babuká. Awor nan mes tambe a rekonosé ken Pedro i Huan tabata, esta kompañero di Hesus!

¹⁴ Pero nan no por a kontradesí nan, komo nan a mira e hòmber ku a kura, pará huntu ku e apòstelnan.

¹⁵ P'esei nan a manda nan sali for di Konseho Supremo i a kuminsá deliberá ku otro.

¹⁶ Nan a bisa otro: ‘Kiko nos tin ku hasi ku e hòmbernan akí? Ta bon kla pa tur hende na Herusalèm ku un milager grandi a tuma lugá pa medio di nan; nos no por nenga esei!

¹⁷ Pero pa evitá ku e kos akí ta plama mas tantu den pueblo, laga nos prohibí nan, bou di menasá di papia ku kualke hende mas tokante e nòmber ei.’

¹⁸ E ora ei nan a yama Pedro i Huan i prohibí nan pa den ningun forma papia òf siña hende den nòmber di Hesus.

¹⁹ Nan a kontestá: ‘Boso husga pa boso mes, si den bista di Dios ta korekto pa nos tende di boso en bes di tende di Dios mes.

²⁰ Di nos banda ta imposibel pa nos keda sin konta loke nos a mira i tende.’

²¹ Ora nan a kontestá asina, Konseho Supremo a bolbe prohibí nan i a laga nan bai. Nan no por a kastigá nan, pa motibu di e pueblo; tur hende tabata duna Dios gloria pa loke a pasa.

²² E hòmber ku a haña su kura pa medio di e señal milagroso ei tabatin ya mas ku kuarenta aña lam.

Solidaridat pa medio di orashon

²³ Ora Pedro i Huan a haña nan libertat, nan a bai serka nan mes hendenan i a konta tur kos ku e saserdotenan importante i e ansianonan a bisa.

²⁴ Ora e kreyentenan a tende loke a pasa, nan tur huntu a resa na bos altu na Dios, bisando: ‘Señor i Kreador di shelu i tera i tur loke nan ta kontené,

²⁵ Abo a bisa pa medio di Spiritu Santu, pa boka di bo sirbidó David, nos antepasado: Di kon nashonnan pagano ta bira rebelde i pueblonan ta kònkel sin motibu?

²⁶ Reinan di mundu ta lanta, gobernantenan ta sera kòmplòt kontra Señor i su Mesias.

²⁷ Pasobra enberdat nan a sera kòmplòt den e siudat akí kontra bo sirbidó santu Hesus ku Bo a skohe komo Mesias, esta tantu Heródes komo Ponsio Pilato, huntu ku e pueblonan pagano i e pueblo di Israel.

²⁸ Asina nan a ehekutá tur kos ku Abo den bo poder a disidí ku mester a sosodé.

²⁹ Awor Señor, paga atenshon na nan menasa i laga bo sirbidónan proklamá bo palabra sin miedu.

³⁰ Rèk bo man pa kura i laga kos maravioso i milager sosodé pa medio di Nòmber di Hesus, bo sirbidó santu.’

³¹ Ora nan a kaba di resa, e lugá kaminda nan tabata reuní a sakudí i Spiritu Santu a yena nan tur i nan a sigui proklamá Dios su palabra sin miedu.

KRESEMENTU I PERSEKUSHON E promé komunidat di kreyente

³² E grupo di kreyente tabata un di kurason i mente; niun hende no tabata reklamá su poseshonnan p'e so; al kontrario, nan tabata kompartí tur kos ku otro.

³³ E apòstelnan tabata testiguá na un manera mashá impreshonante di resurekshon di Señor Hesus i nan tur tabata bon mirá serka pueblo.

³⁴ Serka nan no tabatin niun hende den nesesidat, pasobra tur ku tabatin tereno òf kas tabata bende nan propiedat i trese e sèn i entreg'é na e apòstelnan,

³⁵ i for di esei tur hende tabata haña algu pa kubri nan nesesidat.

Un ehèmpel di aploudí

³⁶ Tabatin un hòmber ku yama Hosé, ku apòstelnan tabata yama Barnabas, esta ‘hòmber ku ta kurashá’; e tabata un levita, nasí na Chipre.

³⁷ El a bende un pida tereno ku e tabatin i a trese e sèn i a entreg'é na e apòstelnan.