Echonan 24 - Papiamentu Bible 2013

Ta akusá Pablo dilanti di gobernador romano Feliks

¹ Despues di sinku dia gransaserdote Ananías a yega Sesarea ku algun ansiano i un tal Tertulo, un abogado. Nan a presentá nan keho kontra Pablo serka gobernador.

² Ora a manda yama Pablo, Tertulo a kuminsá ku su diskurso di akusashon di e siguiente forma: ‘Su Ekselensia Gobernador Feliks, ta bo nos tin ku yama danki ku nos ta gosa di pas duradero, i ta danki na bo bon maneho ku hopi kambio ta tumando lugá na benefisio di e pais akí.

³ Tur ora i tur kaminda nos ta rekonosé esei ku un gratitut sin límite.

⁴ Ma pa mi no kansa bo mas tantu, mi ker a pidi bo pa skucha nos diskurso kòrtiku ku e atenshon bondadoso ku nos konosé di bo.

⁵ E hòmber akí, nos a deskubrí, ta un berdadero pèster: rònt mundu e ta kousa disturbio serka hudiu i t'e ta un di e kabesnan di e sekta di Nazareonan.

^6a Asta el a purba profaná tèmpel i e ora ei nos a koh'é prezu. [

^6b Nos ker a husg'é di akuerdo ku nos Lei,

⁷ ma komandante Lisias a bini i ku mashá violensia el a kit'é for di nos.

^8a Anto Lisias a duna òrdu pa esnan ku tin algu di akus'é presentá bo dilanti.]

^8b Bo por komprobá bèrdat di e akusashonnan akí, si bo mes interogá e hòmber ei.’

⁹ E outoridatnan hudiu a sostené e akusashon akí; nan a sigurá gobernador ku ta esei tabata e bèrdat.

Pablo su defensa dilanti di Feliks

¹⁰ Riba un señal di Feliks Pablo a tuma palabra: ‘Mi sa ku hopi aña kaba bo ta esun ku ta garantisá hustisia den e pais akí, p'esei ku konfiansa mi ta defendé mi kaso bo dilanti.

¹¹ Manera bo mes por averiguá, no mas ku diesdos dia pasá mi a bai Herusalèm pa adorá Dios.

¹² Nan no a mira mi ta debatí ku niun hende, ni ta kousa lantamentu ni den tèmpel ni den snoa òf kualke otro kaminda den siudat.

¹³ Anto nan no por proba loke nan ta akusá mi di dje awor akí.

¹⁴ Sí mi ke atmití, ku mi ta sirbi Dios di mi antepasadonan segun e Rumbo Nobo ku nan ta yama “sekta”. Mi ta kere tur kos ku ta skibí den lei di Moises i den buki di e profetanan.

¹⁵ Mi tin e mesun speransa den Dios ku e hendenan akí, esta e speransa ku bon hende i mal hende lo lanta for di morto.

¹⁶ Asina mi tambe ta bringa duru pa semper mi konsenshi ta limpi dilanti di Dios i dilanti di hende.

¹⁷ Despues di hopi aña mi a bai Herusalèm pa hiba un ofrenda di karidat pa mi pueblo i ofresé sakrifisio.

¹⁸ Na e okashon ei nan a mira mi den tèmpel, despues ku mi a partisipá na un seremonia di purifikashon. Niun multitut di hende no a bòsha bini, ni no tabatin niun bochincha;

¹⁹ ta poko hudiu di provinsia di Asia tabat'ei. Bon mirá ta nan mes lo mester a presentá bo dilanti i entregá nan keho, si nan tin algu kontra mi.

²⁰ Laga e hòmbernan akí bisa ki krímen nan a haña mi kulpabel di dje, ora mi a aparesé dilanti di nan Konseho Supremo.

²¹ Òf mester ta e echo ku mi a grita pará ei nan dilanti: “Ta pasobra mi ta spera riba resurekshon for di morto, boso ta tene e huisio akí kontra mi!” ’

²² Gobernador Feliks, ku tabata bon na altura tokante e Rumbo Nobo, a posponé e reunion. El a bisa: ‘Ora komandante Lisias yega, mi ta disidí boso kaso.’

²³ E òfisir a duna òrdu pa tene Pablo bou di un vigilansia no muchu severo i a pèrmití su amigunan kuid'é.

Pablo dilanti di Feliks i su kasá Drusila

²⁴ Poko dia despues Feliks tabata den kompania di su kasá Drusila, un muhé hudiu. Feliks a manda buska Pablo i a tend'é papia di fe den Kristu-Hesus.

²⁵ Ma ora Pablo a kuminsá papia tokante hustisia, dominio propio i huisio benidero, Feliks a haña miedu i a bis'é: ‘Bo por bai numa; ora mi tin un chèns, mi ta manda yama bo.’

²⁶ Na mes momento e tabata spera ku Pablo lo a ofres'é plaka bou di mesa. P'esei mes e tabata manda yam'é frekuentemente pa un kòmbersashon.

²⁷ Dos aña a pasa i Porkio Festos a bira gobernador na lugá di Feliks. Komo Feliks ker a hasi e hudiunan un fabor, el a laga Pablo den prizòn.