Echonan 20 - Papiamentu Bible 2013

Di Éfese pa Troas via Gresia i Masedonia

¹ Ora e bochincha a plakia, Pablo a yama e disipelnan huntu i kurashá nan. El a tuma despedida di nan i kohe kaminda pa Masedonia.

² El a pasa rònt e regionnan ei i kurashá e hendenan ku diskurso largu. Despues el a yega provinsia di Gresia,

³ kaminda el a keda tres luna. Nèt ora e tabata bai nabegá pa Siria, e hudiunan a traha un kòmplòt kontra dje. P'esei el a disidí di bai via Masedonia.

⁴ Sopatro, yu di Piro, di siudat Berea, tabata kompañ'é, huntu ku Aristargo i Sekundo di Tesalónika, Gaius di Derbe, Timoteo, i Tígiko i Trófimo di Asia.

⁵ Nan a sigui biaha bai dilanti i keda warda nos na Troas.

⁶ Despues di fiesta di pan sin zürdeg nos mes a nabegá sali for di Filipi i despues di sinku dia nos a djòin nan na Troas, kaminda nos a keda un siman.

Pablo su último bishita na Troas

⁷ Riba e promé dia di siman nos a reuní pa kibra pan. Pablo, ku tabatin intenshon di bai su siguiente dia, a tene un diskurso largu ku a dura te meianochi.

⁸ Den e sala ariba kaminda nos tabata reuní, tabatin hopi lampi sendé.

⁹ Un mucha hòmber yamá Eutiko tabata sintá riba rant di bentana. Segun Pablo tabata blo papia numa, el a bai un soño profundo, te ku kompletamente zurí di soño el a kita kai for di e di tres piso. Ora a his'é, e tabata morto.

¹⁰ Ma Pablo a baha bini abou, tira su kurpa abou na suela riba e mucha hòmber i bras'é. Anto el a bisa nan: ‘No preokupá! E ta na bida!’

¹¹ Pablo a bolbe bai ariba i kibra pan kome. Despues el a sigui prediká pa un tempu largu; el a bai te ora di dia a habri.

¹² Nan a kompañá e mucha hòmber, ku tabata bibu, hiba kas i a sinti nan mashá kurashá.

Di Troas pa Mileto

¹³ Nos a bai dilanti den e barku i nabegá bai Asos, kaminda nos a keda di tuma Pablo a bordo. El a manda nos hasi asina, pasobra e mes tabata bai na pia.

¹⁴ Ora el a kontra nos na Asos, nos a tum'é a bordo i sigui pa Mitilena.

¹⁵ Nos a nabegá sali fo'i djei i su siguiente dia nos a yega dilanti di isla di Kios. Su manisé nos a pasa isla di Samos i e dia despues nos a yega siudat Mileto.

¹⁶ Pablo a disidí di pasa Éfese bai pa asina e no pèrdè tempu na provinsia di Asia. E tabatin purá, pasobra si tabata posibel e ker a yega Herusalèm riba dia di Pentekòster.

Último palabra di Pablo na e ansianonan di Éfese

¹⁷ For di Mileto Pablo a manda yama e ansianonan di e iglesia na Éfese pa nan bin kontra kuné.

¹⁸ Ora nan a yega, el a bisa nan: ‘Boso sa kon mi a anda semper ku boso, for di e promé dia ku mi a pone pia riba suela di provinsia di Asia.

¹⁹ Bou di lágrima i den tur humildat mi a hasi mi trabou komo sirbidó di Señor durante e tribulashonnan ku mi a haña mi aden pa motibu di kòmplòt di e hudiunan.

²⁰ Boso sa ku mi no a keda sin bisa boso loke ta di probecho pa boso; al kontrario, mi a proklamá e bon notisia na boso, i a siña boso, públikamente i na kas.

²¹ Mi a hasi un apelashon serio na tantu hudiu komo no hudiu pa sigui Dios i tambe aseptá fe den nos Señor Hesus.

²² I awor mi ta bai Herusalèm komo prizonero di Spiritu Santu, sin sa kiko ta warda mi aya.

²³ Loke mi sa ta ku den kada siudat ku mi bai, Spiritu Santu ta bisa mi ku prizòn i tribulashon ta warda mi.

²⁴ Pero mi no ta konsiderá mi bida di ningun balor pa mi; loke tin balor pa mi ta, terminá mi mishon i e trabou ku mi a haña di Señor Hesus, esta prediká e bon notisia tokante grasia di Dios.

²⁵ Wèl mi sa, ku boso lo no mira mi kara nunka mas, boso tur ku mi a pasa rònt serka dje predikando reino di Dios.

²⁶ P'esei mi ta deklará na boso awe: si un di boso bai pèrdí, ami no ta kulpabel!

²⁷ Pasobra mi a anunsiá boso henter plan di Dios, sin tene nada atras.

²⁸ Kuida boso kurpa i henter e trupa di karné ku Spiritu Santu a pone na boso enkargo. Sea wardadó di iglesia di Dios, e iglesia ku El a gana pa E mes, pa medio di su mes sanger.

²⁹ Mi sa ku despues ku mi no t'ei mas, lobo feros lo bini meimei di boso i nan lo no spar e trupa di karné!

³⁰ For di boso mes grupo lo lanta hende ku ta trose bèrdat pa haña e disipelnan nan tras.

³¹ P'esei sea alerta i sigui kòrda kon, ku awa na wowo, pa tres aña largu di dia i anochi ami a siña kada un di boso.

³² I awor mi ta entregá boso den man di Dios i su mensahe bondadoso; e mensahe ku por yuda boso krese i duna boso tur e benefisionan ku Dios tin wardá pa esnan ku ta pertenesé n'E.

³³ Nunka mi no a deseá oro, plata ni paña di niun hende.

³⁴ Boso mes sa kon ku mi mes man mi tabata proveé pa mi nesesidatnan i nesesidatnan di mi kompañeronan.

³⁵ Den tur kos mi a mustra boso ku pa medio di e tipo di trabou duru akí nos mester yuda esnan ku ta suak i no lubidá e siguiente palabranan ku Señor Hesus mes a bisa: “Duna ta hasi hende mas felis ku risibí!” ’

³⁶ Ora Pablo a kaba, el a hinka rudia i a resa huntu ku nan tur.

³⁷ Tur hende a kuminsá yora. Nan a basha bai riba Pablo, bras'é i sunch'e.

³⁸ Loke a hasi nan mas tristu tabata ku el a bisa ku nan lo no mira su kara mas. Despues nan a kompañ'é hib'é barku.