Deuteronomio 25 - Papiamentu Bible 2013

Limitashon pa kastigu korporal

^1-2 Suponé ku dos hòmber no ta di akuerdo ku otro, ku nan ta hiba e kaso dilanti i ku ta sentensiá e kulpabel na un halá di sota. E ora ei hues mester ordená pa pone e kulpabel drumi abou i dun'é un bon halá di sota. E kantidat di sla mester kuadra ku e delito.

³ Nunka e no mag pasa kuarenta sino ta deshonrá e hende públikamente.

Kon trata un bue ora di trabou

⁴ No bisti un bue bosal ora boso ta us'é pa trabou di bati trigo.

Deber ku un ruman hòmber defuntu

⁵ Suponé ku dos ruman hòmber ta biba pegá ku otro i ku un di nan ta muri sin laga yu hòmber atras. Den e kaso ei esposa di e defuntu no mag kasa atrobe ku un hòmber ku no ta di e famia ei. Ruman hòmber di e defuntu mester kasa kuné e ora ei i kumpli asina ku su deber di sua.

⁶ E promé yu hòmber ku e muhé haña, lo konta pa desendiente di e ruman defuntu, di manera ku su nòmber ta sigui eksistí na Israel.

⁷ Pero suponé ku e ruman hòmber no ta sinti niun tiki gana di kasa ku su kuñá. E ora ei e kuñá ta hiba e kaso pa e ansianonan ku ta sinta na porta di siudat: “Mi sua no ke kumpli ku mi ku su deber di sua, e ta nenga di duna su ruman un yu hòmber pa asina laga su nòmber keda sigui eksistí na Israel.”

⁸ E ansianonan mester laga yama e hòmber i papia e kaso kuné. Si e keda para ariba i deklará ku e no ta sinti nada pa un matrimonio,

⁹ e ora ei su kuñá mester bai para su dilanti. Den presensia di e ansianonan e kuñá mester kita un sandalia for di pia di e hòmber i skupi e hòmber den su kara. Solemnemente e muhé mester deklará: “Asina ta pasa ku hòmber ku no ke duna nan ruman defuntu un desendiente.”

¹⁰ Di awor padilanti su famia lo ta konosí na Israel komo famia “Pia abou”.

Kastigu pa inmoralidat

¹¹ Suponé ku dos hòmber kuminsá bringa i esposa di un di nan kore bin yuda su kasá. Pa libr'é di su agresor e muhé ta kohe esaki tene na su parti delikado.

¹² Den e kaso ei kap man di e muhé kita afó sin tene duele.

Uso di midí i peso

^13-14 Ora boso ta kumpra òf bende, no usa peso i midí falsu,

¹⁵ pero usa peso eksakto i kompleto pa boso biba hopi aña den e pais ku SEÑOR, boso Dios, ta bai duna boso.

¹⁶ Pasobra tur esnan ku hasi kos asina i kometé inhustisia ta repugná SEÑOR.

Òrdu pa kaba ku Amalèk su desendientenan

¹⁷ Keda kòrda loke e amalekitanan a hasi ku boso despues ku boso a sali for di Egipto,

¹⁸ kon nan tabata ataká boso ora boso tabata na kaminda; ora boso tabata morto kansá, nan a ataká mata tur esnan débil ku a keda atras sin tene rèspèt di Dios.

¹⁹ Ora boso ta na e pais ku SEÑOR, boso Dios, ta bai duna boso i E perkurá pa tur e enemigunan ku ta rondoná boso laga boso na pas, kita rekuerdo di Amalèk for di riba mundu. No lubidá esei nunka.