Deuteronomio 24 - Papiamentu Bible 2013

No kasa ku e mes muhé pa di dos be

¹ Suponé ku un hòmber kasá ta pèrdè amor pa su esposa, pasobra e ta deskubrí algu ku e no ta gusta. E ta skibi un papel di divorsio duna e muhé i kore kuné for di kas.

² E muhé ta bai i ta bolbe kasa ku un otro hende.

³ Si e muhé su di dos esposo tambe haña asko di dje kore kuné for di kas ku un papel di divorsio òf e di dos esposo muri,

⁴ e promé esposo no mag kasa kuné atrobe. E muhé ta impuru p'e. SEÑOR ta haña un di dos matrimonio asina algu repugnante. No deshonrá e pais ku SEÑOR, boso Dios, ta bai duna boso komo propiedat ku práktika asina.

Dispensashon pa hende hòmber resien kasá

⁵ Un hòmber resien kasá no tin mester di sali bai guera ora e ehérsito ta bai. No mag imponé otro obligashon tampoko riba dje. E ta dispensá un aña largu p'e keda kas hasi su esposa felis.

Tumamentu di garantia

⁶ Si boso tuma un pant serka un hende, e no mag ta un mulina di man ku e ta usa pa mula hariña pa traha pan, ni e piedra di mas ariba di e mulina. Pasobra e ora ei boso ta tuma algu ku e tin mester di dje p'e keda na bida.

Stipulashon ora kita libertat di hende

⁷ Si un hende usa violensia pa kita libertat di un israelita meskos kuné i nan hañ'é ta bende e kompatriota òf ta trat'é komo katibu, e mester haña kastigu di morto. Kaba asina ku e maldat akí ku tin serka boso.

Malesa di kueru

⁸ Den kaso di malesa di kueru atené boso estriktamente na e indikashonnan di e saserdotenan levita. Kumpli estriktamente ku loke mi a preskribí nan.

⁹ Kòrda kiko SEÑOR, boso Dios, a hasi ku Miriam despues ku boso a sali for di Egipto.

Tumamentu di garantia

¹⁰ Ora boso fia un hende algu, boso no mag drenta su kas skohe un garantia.

¹¹ Boso ta obligá di keda warda pafó te ora e hende ku a fia algu di boso, trese e garantia.

¹² Suponé ku un hòmber pober duna boso su mantel komo garantia. No keda kuné te su manisé,

¹³ pero dun'é e mantel bèk promé ku solo baha. E ora ei e por kai drumi den su mes mantel. E hòmber lo bendishoná boso p'esei i SEÑOR, boso Dios, lo haña ku boso a aktua bon.

Pagamentu di suèldu

¹⁴ No eksplotá un hende ku ta traha kontra pago, ku ta pober i ta den mizeria kaba. No ta importá ku e ta un israelita òf un strañero ku a drenta boso pais i ta biba den un di boso siudatnan.

¹⁵ Pag'é e mesun dia ei, no warda te su manisé. E ta den mizeria i tin mester di su sèn. Sino e ta keha boso serka SEÑOR i boso ta tuma un kulpa riba boso.

Hende ta responsabel pa nan mes echonan

¹⁶ No mag mata mayornan pa delito ku nan yunan a kometé i no mag mata yu pa delito ku nan mayornan a kometé. Ta mata un hende solamente pa e delitonan ku e mes kometé.

Stipulashon na fabor di e débilnan den komunidat

¹⁷ Boso no mag violá derecho di strañero òf wérfano ni tuma paña di un biuda komo pant.

¹⁸ Kòrda ku boso tabata katibu na Egipto i ku SEÑOR a libra boso fo'i djei. P'esei mi ta ordená boso aktua asina.

¹⁹ Si den tempu di kosecha boso lubidá un bòshi di trigo den kunuku, no bai bèk bai busk'é. Lag'é pa strañero, biuda i wérfano. E ora ei SEÑOR, boso Dios, lo bendishoná boso den tur boso trabou.

²⁰ Ora boso bati kita aseituna for di rama, no bolbe pasa banda di e ramanan. Laga loke a keda ainda na palu, pa strañero, wérfano i biuda.

²¹ Ora boso ta rekohé wendrùif den boso hòfi di wendrùif, no bai bèk pa e wendrùifnan ku a keda na e matanan. Laga nan pa strañero, wérfano i biuda.

²² Kòrda ku boso tabata katibu na Egipto. P'esei mi ta ordená boso aktua asina.