Deuteronomio 19 - Papiamentu Bible 2013

Tokante e siudatnan di asilo

^1-2 Ora SEÑOR, boso Dios, kaba di kore ku e nashonnan pa duna boso nan pais i boso tuma nan siudatnan i kasnan pa boso, skohe e ora ei tres siudat di asilo den e pais.

³ Parti p'esei e pais na tres i indiká un siudat di asilo den kada un di e partinan ei. Pa tur hende ku mata un otro hende tin e ora ei un siudat ku e por alkansá kaminda e por hui bai.

⁴ Den siguiente kaso e hende ku a mata un otro hende hui bai einan por keda na bida: si el a mata e hende sin ku e por a yuda òf sin ku tabatin enemistat entre nan.

⁵ Si por ehèmpel un hende bai ku un otro hende den mondi pa kap palu, e zuai e hacha pa kap un palu, heru di e hacha sali for di e man di hacha bai dal e otro mata, e por skapa su bida si e bai un di e siudatnan akí.

⁶ Si e kaminda pa e siudat akí ta muchu largu, por sosodé ku e famia mas yegá ku mester venga morto di e defuntu ta alkansá esun ku a mata i den su furia ta mat'é. Esei ta inhustu; e hòmber no a hasi nada ku ta meresé kastigu di morto, no tabatin enemistat entre nan.

⁷ P'esei mi ta ordená: Indiká tres siudat pa kaso asina.

⁸ I ora SEÑOR hasi boso teritorio mas grandi, manera El a primintí boso antepasadonan i E duna boso henter e pais manera El a primintí nan, indiká e ora ei tres siudat di asilo mas.

⁹ SEÑOR lo hasi boso teritorio mas grandi si boso kumpli ku tur e mandamentunan ku mi ta duna boso awe, esta ku boso keda fiel na SEÑOR, boso Dios, i sigui semper e kaminda ku E ta mustra boso.

¹⁰ Asina boso ta evitá ku den e pais ku SEÑOR, boso Dios, ta bai duna boso pa keda kuné, sanger inosente ta kore. Sino boso ta keda responsabel pa nan morto.

¹¹ Por sosodé ku un hende ku ta odia un otro hende, ta para ward'é na skondí, atak'é, dal e mata i hui bai un di e siudatnan ei.

¹² E ora ei e ansianonan di su siudat mester bai kuné fo'i djei i entreg'é na e famia mas yegá ku mester venga morto di e defuntu, pa e muri sigur.

¹³ No tene duele di dje; mester saka e hende ku drama sanger inosente for di Israel. Si boso aktua asina lo bai boso bon.

Lei kontra ladronisia di tereno

¹⁴ No kambia e frontera ku tin entre bo tereno i esun di bo bisiña, ku ta fihá for di hopi tempu kaba den e pais ku SEÑOR, boso Dios, ta bai duna boso.

Testigu den korte

¹⁵ Den ningun kaso di delito òf krímen no ta sufisiente si un persona so testiguá kontra di e kulpabel; solamente testimonio di dos òf tres testigu ta bálido.

¹⁶ Ora un testigu falsu kulpa un hende di un delito,

¹⁷ e dos partidonan mester presentá den santuario di SEÑOR serka e saserdotenan i e huesnan di e tempu ei.

¹⁸ Si sali na kla despues di un investigashon profundo hasí dor di e huesnan, ku enberdat no por konfia e testigu i ku el a entregá un keho falsu kontra su próhimo,

¹⁹ dun'é e ora ei e kastigu ku e akusado lo a haña. Kaba asina kompletamente ku e maldat ku tin serka boso.

²⁰ E otro hendenan lo tende i haña miedu i nan lo no hasi algu asina mas serka boso.

²¹ No tene duele di un hende asina, e kastigu lo ta: bida pa bida, wowo pa wowo, djente pa djente, man pa man, pia pa pia.