Deuteronomio 11 - Papiamentu Bible 2013

Grandesa di SEÑOR

¹ Stima SEÑOR, boso Dios, sigui su òrdunan i kumpli ku su leinan, reglanan i mandamentunan tur dia bai.

² Ta boso i no boso yunan a eksperensiá kiko SEÑOR, boso Dios, ker a siña boso pa medio di su grandesa, su man fuerte, su man poderoso,

³ su señalnan i su obranan. Boso a mira kon El a trata fárao, rei di Egipto, ku henter su pais.

⁴ Boso a mira kiko El a hasi ku e ehérsito di Egipto, kon nan kabainan i garoshinan di guera a senk den Laman Kòrá ora nan tabata persiguí boso i kon SEÑOR a kaba ku nan.

⁵ Boso a mira kiko El a hasi pa boso den desierto te ora boso a yega aki.

⁶ Boso a mira kon El a trata Datan ku Abiram, yu di Eliab, for di tribu di Ruben, kon tera a habri boka guli nan manda abou dilanti di wowo di Israel, huntu ku nan famianan, nan tèntnan, tur bestia i tur hende ku tabata pertenesé na nan.

⁷ Ku boso mes wowo boso a mira tur e obranan grandi akí di SEÑOR.

Bendishon di e pais ku SEÑOR a primintí

⁸ Kumpli anto ku henter e lei ku mi ta duna boso awe, pa boso por ta fuerte pa krusa riu i konkistá e pais ku boso ta bai drenta,

⁹ pa boso por biba hopi tempu den e pais ku SEÑOR a primintí boso antepasadonan i duna nan desendientenan, un pais ku ta mana lechi i miel.

¹⁰ Pasobra e pais ku boso ta bai tuma komo propiedat, no ta Egipto for di kaminda boso a sali. Ora a sembra aya tabata mashá molèster pa muha e kunukunan, manera ta muha hòfi di bèrdura.

¹¹ Pero e pais ku boso ta bai tuma komo propiedat, ta un pais di seru ku vaye, ku ta bebe e awa ku ta kai for di shelu,

¹² un pais ku SEÑOR, boso Dios, ta perkurá p'e. Kontinuamente bista di SEÑOR, boso Dios, lo ta riba dje for di kuminsamentu te fin di aña.

¹³ Si boso obedesé kuidadosamente e mandamentunan ku mi ta duna boso awe, boso keda fiel na SEÑOR, boso Dios, sirbiÉ ku henter boso kurason i henter boso alma,

¹⁴ lo E perkurá na tempu, trempan i lat den aña, pa áwaseru riba e kunukunan. Boso lo kosechá trigo, wendrùif i oleifi

¹⁵ i boso bestianan lo tin yerba de sobra pa kome. Boso lo kome boso barika yen.

¹⁶ Tene kuidou pa nan no hinka boso den tentashon i boso bira lomba pa SEÑOR bai sirbi otro dios.

¹⁷ SEÑOR ta rabia e ora ei sera shelu; áwaseru lo no kai mas i tera lo no produsí. Asina pronto boso lo kaba na nada den e pais bunita ku SEÑOR ta bai duna boso.

¹⁸ Graba e palabranan akí den boso kurason pa boso keda kòrda nan, mara nan manera un señal na boso man i laga nan ta un rekuerdo na boso frenta.

¹⁹ Siña boso yunan e palabranan akí i papia di nan ora boso ta na kas i ora boso ta na kaminda, ora boso ta bai drumi i ora boso lanta.

²⁰ Skibi nan riba kozein di boso porta di kas i riba porta di siudat.

²¹ E ora ei boso i boso yunan lo biba largu den e pais ku SEÑOR a primintí boso antepasadonan. Boso lo keda biba aya tanten shelu ta riba tera.

²² Pasobra si boso kumpli kuidadosamente ku henter e lei akí ku mi ta duna boso awe, si boso stima SEÑOR, boso Dios, sigui e kaminda ku E mustra boso i tene rèspèt di djE,

²³ e ora ei SEÑOR lo kore ku tur e nashonnan akí di manera ku boso por tuma e region di e nashonnan ku ta mas grandi i mas fuerte ku boso komo propiedat.

²⁴ Unda ku boso pone pia riba tera lo keda di boso. Boso fronteranan lo kore for di e desierto na zùit te Libanon na nort i for di riu Eufrat na ost te Laman Mediteráneo na wèst.

²⁵ Niun hende lo no por resistí boso; SEÑOR, boso Dios, lo hinka miedu i spantu kaminda boso pasa den e pais, manera El a primintí boso.

²⁶ Wak! Awe mi ta laga boso skohe entre bendishon i maldishon:

²⁷ Bendishon si boso obedesé e mandamentunan di SEÑOR, boso Dios, ku mi ta duna boso awe;

²⁸ pero maldishon si boso no obedesé e mandamentunan di SEÑOR, boso Dios, i desviá for di e kaminda ku mi ta mustra boso awe, bai sirbi otro dios ku boso no konosé.

²⁹ Ora SEÑOR, boso Dios, kaba di hiba boso e pais ku boso lo tuma pa boso komo propiedat, destiná Guerizim pa bendishon i Ebal pa maldishon.

³⁰ Eseinan ta e dos serunan na otro banda di Yordan, na parti wèst di e kaminda ku ta pasa dor di vaye di Yordan; kaminda e kanaanitanan ta biba, enfrente di Guilgal, den bisindario di e palunan grandi di ekel na Morè.

³¹ Boso ta na punta di krusa Yordan pa tuma e pais ku SEÑOR, boso Dios, ta bai duna boso. Ora boso tum'é komo propiedat i ta biba einan,

³² kumpli kuidadosamente ku e leinan i reglanan ku mi ta duna boso awe.