Deuteronomio 10 - Papiamentu Bible 2013

Moises ta bolbe risibí e dies mandamentunan

¹ Despues SEÑOR a bisa mi: “Kap dos tabla di piedra meskos ku e proménan ku bo a dal kibra na pida pida i traha un kaha di palu, un arka. Ora bo kaba, subi seru bini serka Mi.

² E ora ei lo Mi skibi e palabranan ku tabatin skibí riba e tablanan. Warda e tabla nobonan den e arka.”

³ Mi a traha antó un arka di palu di akasia i a kap dos tabla di piedra meskos ku e proménan; kaba mi a subi e seru ku e dos tablanan den mi man.

⁴ Riba e tablanan akí SEÑOR a skibi e mes palabranan ku tabatin skibí riba e promé tablanan, esta e dies mandamentunan ku SEÑOR a pronunsiá, for di meimei di e kandela, riba e dia di enkuentro. El a duna mi nan

⁵ i despues di esei mi a baha for di e seru i a pone e tablanan den e arka ku mi a traha. Te ainda nan t'einan, manera SEÑOR a ordená mi.

⁶ (E israelitanan a biaha di Beerot ku ta propiedat di famia Yaakan, pa Mosera. Aya Aaron a muri i a der'é einan tambe. Su yu Eleazar a siguié komo saserdote.

⁷ For di Mosera e biahe a sigui pa Gudgod i di Gudgod pa Yotbata, un region ku mashá hopi roi.)

⁸ Den e tempu ei SEÑOR a skohe tribu di Levi pa un tarea spesial, esta pa karga arka di aliansa di SEÑOR, pa sirbi den santuario i pa duna bendishon den su nòmber. I asina ta ketu bai te dia djawe.

⁹ P'esei e levitanan no a haña tereno komo propiedat, manera e otro tribunan. Na lugá di esei nan a haña e privilegio di sirbi SEÑOR, manera SEÑOR, boso Dios, a primintí tribu di Levi.

¹⁰ Mi a keda kuarenta dia i kuarenta nochi riba e seru meskos ku e promé bia. I e bia akí tambe SEÑOR a skucha mi. El a disidí di no kaba ku boso.

¹¹ E ora ei SEÑOR a bisa mi: “Prepará bo! Sali na kabes di e pueblo pa nan drenta tuma e pais ku solemnemente mi a primintí nan antepasadonan.”

E eksigensianan di e aliansa

¹² Ke men antó, Israel, ku SEÑOR, boso Dios, no ta pidi nada otro di boso ku no ta tene rèspèt di djE, sigui e kaminda ku E ta mustra boso, stim'É, sirbiÉ ku henter boso alma i ku henter boso kurason

¹³ i kumpli ku e mandamentunan i ku e leinan di SEÑOR ku mi ta duna awe. E ora ei ta bai boso bon.

¹⁴ Komprondé bon ku ta di SEÑOR, boso Dios, shelu infinito i mundu ku tur loke tin riba dje ta.

¹⁵ Na boso antepasadonan so SEÑOR a mara su mes. Nan so El a stima. Boso, nan desendientenan, El a skohe for di tur pueblo. I ketu bai ta asina.

¹⁶ P'esei no hasi kos di tèrko mas. Boso ta sirkunsidá na kurpa, pero sirkunsidá boso kurason tambe.

¹⁷ Pasobra SEÑOR, boso Dios, ta e Dios Supremo, e SEÑOR mas altu, grandioso, fuerte i temibel. E Dios ku no sa tuma parti pa hende, ni sa tuma sèn bou di mesa;

¹⁸ ma ku ta hustu pa wérfano i biuda i ta duna strañero ku ta biba serka boso kuminda i paña pa demostrá amor.

¹⁹ P'esei demostrá amor na e strañeronan ku ta biba serka boso, pasobra boso tambe tabata strañero na Egipto.

²⁰ P'esei respetá SEÑOR, boso Dios, sirbiÉ, keda fiel n'E i hasi huramentu den su nòmber.

²¹ Dun'É homenahe, E tá boso Dios. Ku boso mes wowo boso a mira su obranan grandi i spantoso.

²² Boso antepasadonan tabata setenta hende dia nan a bai Egipto, pero awor SEÑOR, boso Dios, a hasi boso numeroso manera strea na shelu.