Amos 8 - Papiamentu Bible 2013

Vishon di e makutu

¹ Esaki ta un otro vishon ku SEÑOR Dios a laga mi haña: Un makutu ku fruta hechu.

² I SEÑOR a puntra mi: ‘Kiko bo ta mira, Amos?’ Mi a rospondé: ‘Un makutu ku fruta hechu.’ E ora ei SEÑOR a bisa mi: ‘Tempu ta hechu pa Israel, mi pueblo. Lo Mi no spar e mas.’

³ ‘E dia ei,’ SEÑOR Dios ta bisa, ‘kantamentu na palasio lo kambia den lamento. Lo tin kantidat di kadaver tur kaminda bentá. Lo reina un silensio mortal.’

Kontra inhustisia i eksplotashon

⁴ P'esei boso, ku ta trapa hende den nesesidat i ta eliminá e hòmber chikí dje pais, skucha!

⁵ Boso ta bisa: ‘Ki ora fiesta di luna nobo ta pasa pa kaba, ki ora sabat ta yega na su fin pa nos habri mangasina atrobe i bende nos maishi; pa nos hasi e baki di un kana mas chikí, oumentá e peso di pisa plaka, kònkel ku e balansa i bende asta bagas na un bon preis?

⁶ Nos ta kumpra un hòmber ku n' tin ni moda di muri komo katibu, ora e no por paga su debe, ounke e no debe mas ku loke un par di sandalia ta kosta.’

Kon SEÑOR ta bai kastigá

⁷ SEÑOR, gran orguyo di pueblo di Yakob, a hura: ‘Nunka lo Mi no lubidá loke nan a hasi.

⁸ P'esei, ken lo keda straño si mundu tembla, si su habitantenan kai den tristesa, si henter mundu sakudí i subi baha manera Riu Nilo di Egipto?

⁹ E dia ei lo Mi laga solo baha mèrdia i lo Mi tapa mundu ku skuridat den pleno dia.

¹⁰ Boso fiestanan lo Mi kambia den belorio, boso kantamentu lo kambia den lamento. Paña di rou lo tapa boso kurpa, boso kabes lo ta pelá chinu pa demostrá boso tristesa. Boso lo keda manera mayornan, ku ta yora pèrdida di nan úniko yu. E dia ei tur kos lo kaba na amargura. Ami, SEÑOR Dios, a papia.’

¹¹ SEÑOR Dios ta bisa: ‘E tempu lo yega ku hende ta sinti hamber, ma no di pan; ku hende tin set, ma no di awa; hamber i set di un palabra for di boka di SEÑOR.

¹² Nan lo kana dualu di Laman Morto te Mediteráneo i sigui di nort te ost, buskando palabra di SEÑOR sin hañ'é.

¹³ E dia ei mucha hòmber i muhé den flor di nan hubentut lo muri di set.

¹⁴ Tur esnan ku ta hura pa e piká di Samaria, bisando: “Pa bida di bo dios, o tribu di Dan,” “Pa bida di e dios di Beer-Shèba,” lo kai sin lanta mas.’