Amos 2 - Papiamentu Bible 2013

¹ Skucha loke SEÑOR ta bisa: ‘Krímen riba krímen Moab a montoná. Ta restunan di rei di Edom el a profaná trahando kalki ku su wesunan. P'esei Mi no ta spar Moab, Mi ta kastig'é.

² Kandela lo Mi manda riba dje, ku lo destruí palasionan di Keriot. Moab lo hoga den bochincha di guera, bou di gritu di sòldá i tokamentu di tròmpèt.

³ Mi ta kaba ku e gobernante i huntu kuné Mi ta mata tur noble.’ Asina SEÑOR a bisa.

⁴ Skucha palabra di SEÑOR: ‘Krímen riba krímen Huda a montoná. E mesun diosnan falsu di su antepasadonan a pon'é kita for di bon kaminda. Mi leinan el a despresiá, mi mandamentunan el a rechasá. P'esei Mi no ta spar Huda, Mi ta kastig'é.

⁵ Kandela lo Mi manda riba Huda, ku lo destruí palasionan di Herusalèm.’

Huisio di Israel

⁶ Skucha loke SEÑOR ta bisa: ‘Krímen riba krímen Israel a montoná. P'esei Mi no ta spar e, Mi ta kastig'é. Abo, Israel, hende drechi bo ta bende komo katibu, ora nan no por paga nan debe i hende den nesesidat, ku no por paga e sandalia na nan pia.

⁷ Ansioso boso ta pa bati kabes di hende pober den tera i derecho di esnan ku no tin bos boso ta trapa. Tantu tata komo yu ta abusá di e mesun katibu muhé i di e manera akí ta deshonrá mi nòmber santu.

⁸ Banda di tur altá boso ta kai drumi riba paña, ku sa kita for di un pober komo pant; den santuarionan boso ta bebe e biña ku sa sobra komo but.

⁹ Sinembargo Ami a yuda bo, Israel. T'Ami a destruí e amoritanan, grandi manera un kas, fuerte manera baranka. Mi a kaba ku nan na wèrki.

¹⁰ Promé ku esei Mi a saka bo for di Egipto, guia bo kuarenta aña largu den desierto, te dia Mi a duna bo tera di e amoritanan.

¹¹ Den bo yunan Mi a nombra profetanan pa anunsiá mi mensahe i nazireonan, ku fo'i nan hubentut a konsagrá nan mes na Mi. Bisa Mi ku no ta bèrdè, o pueblo di Israel. Ami, SEÑOR, ta puntra.

¹² Pero boso a duna e hóbennan ei biña pa bebe i a prohibí e profetanan papia den mi nòmber.

¹³ Anto awor Mi ta trapa boso abou den tera. Boso lo keda manera un garoshi, kargá di mas ku trigo, ku ta sofoká bou di su peso.

¹⁴ E hòmber di mas lihé lo no por hui bai, esun di mas fuerte lo no tin basta forsa ni esun di mas poderoso lo no por salba su bida.

¹⁵ E tiradó di flecha tampoko lo no mantené su puesto ni sòldá di kabayeria lo no salba su bida.

¹⁶ Riba e dia pretu ei, ora Mi manda kastigu, e sòldá di mas balente ta benta su armanan abou i hui bai.’ T'asina SEÑOR a papia.