2 Timoteo 2 - Papiamentu Bible 2013

Un bon sòldá di Kristu-Hesus

¹ P'esei abo, mi yu, sea fuerte pa medio di e grasia ku Kristu-Hesus ta duna.

² Pasa e siñansa ku bo a haña di mi den presensia di hopi testigu pa hende konfiabel, kapasitá pa siña otro hende tambe.

³ Mira pa bo tambe karga parti di e sufrimentu, manera ta toka un bon sòldá di Kristu-Hesus.

⁴ Niun sòldá ku ta den servisio militar no ta mete ku asuntu sivil, pasobra e tin ku komplasé su superior.

⁵ Meskos tambe, un atleta no por gana e krans di viktoria, si e no kompetí di akuerdo ku e reglanan.

⁶ E kunukero, ku a kansa kurpa, tin derechi di haña e promé parti di kosecha.

⁷ Reflekshoná riba loke mi ta bisa bo, pasobra Señor mes lo duna bo komprondementu den tur kos.

⁸ Kòrda riba Hesu-Kristu, ku Dios a lanta for di morto i ku ta desendiente di rei David. Esei ta e bon notisia ku mi ta prediká.

⁹ Ta pasobra mi ta prediká e bon notisia akí mes, mi ta sufri asin'akí na man di hende i ta asta na kadena manera un kriminal! Pero no por bui Palabra di Dios sí!

¹⁰ P'esei mi ta sufri tur kos pa kousa di esnan ku Dios a skohe, ya nan tambe por haña e salbashon ku Kristu-Hesus ta duna i e gloria eterno.

¹¹ E palabranan ku ta sigui ta konfiabel: Si nos a muri huntu ku Kristu, nos lo biba huntu kunÉ.

¹² Si nos perseverá, nos lo reina huntu kunÉ tambe. Si nos neng'É, E tambe lo nenga nos.

¹³ Si nos no ta fiel n'E, E sí ta keda fiel na nos, pasobra E no por bai kontra su mes.

E aktitut ku Timoteo mester tin

¹⁴ Kòrda bo hendenan riba e kosnan akí i atvertí nan seriamente, ku Dios komo testigu, ku nan mester evitá diskushon sin sentido. E tipo di diskushon akí no ta yuda niun hende ku nada, pero ta hasi daño na esnan ku ta skucha.

¹⁵ Hasi bo máksimo esfuerso pa presentá bo mes na Dios komo un trahadó ku E ta aprobá, un trahadó ku ta siña hende e mensahe di bèrdat korektamente, sin hasi nada pa pone su mes kara na bèrgwensa.

¹⁶ Evitá kòmbersashon profano i bashí, pasobra esnan ku hiba tipo di kòmbersashon asina, lo sigui alehá mas i mas di Dios.

¹⁷ I loke nan ta papia, lo plama manera kanser, manera a pasa den kaso di Himeneo i Fileto.

¹⁸ Nan a desviá di e bèrdat i bisa ku ya e resurekshon di morto a tuma lugá i asina nan a pone fe di otro hende tambaliá.

¹⁹ Sinembargo e fundeshi sólido ku Dios a pone, ta keda firme i den e fundeshi tin un inskripshon ku ta bisa: ‘Señor konosé esnan ku ta pertenesé n'E’ i ‘Tur esnan ku invoká nòmber di Señor mester kita leu for di maldat’.

²⁰ Den un kas grandi bo ta haña opheto di oro i di plata, pero tambe di palu i di klei; algun ta di balor i otro no tin balor.

²¹ Siñadó falsu ta manera e kosnan sin balor. Ora un hende deshasí di nan, e ta bira algu di balor. E ora ei e ta spesial i útil pa su doño, prepará pa hasi tur sorto di bon obra.

²² Abo kore pa e pashonnan di hubentut i buska hustisia, fe, amor i pas, huntu ku esnan ku ta invoká Señor ku un kurason limpi.

²³ Rechasá diskushon sin pia sin kabes, pasobra manera bo sa, nan ta kaba na pleitu.

²⁴ Un sirbidó di Señor no mester pleita, pero mester trata tur hende ku kariño. E mester por ta un bon maestro, un hende ku pasenshi,

²⁵ i e mester koregí esnan ku ta kontra dje ku suavidat. Pasobra tal bes Dios por duna e hendenan ei oportunidat di kombertí i yega na un konosementu real di e bèrdat.

²⁶ E ora ei nan por bini bei i skapa di e trampa ku diabel a gara nan aden pa pone nan hasi loke e ke.