2 Tesalonisensenan 3 - Papiamentu Bible 2013

Petishon pa orashon

¹ Pa terminá, rumannan, resa pa nos, pa meskos ku serka boso, e palabra di Señor sigui plama lihé i pa e hendenan risibié ku honor.

² Resa tambe pa Dios libra nos di hende perverso i malbado, pasobra no ta tur hende tin fe.

³ Pero Señor ta fiel, lo E fortalesé boso i warda boso di e malbado.

⁴ Nos ta konvensí ku Señor ta laga boso hasi loke nos a manda boso i ku boso ta sigui hasié.

⁵ Señor dirigí boso kurason pa boso por komprondé e amor ku Dios tin pa boso i pa boso por tin konstansia manera Kristu.

No anda ku rumannan ku ta biba un bida indisipliná

⁶ Rumannan, den nòmber di nos Señor Hesu-Kristu, nos ta ordená boso pa no anda ku niun ruman ku ta hiba un bida indisipliná i no di akuerdo ku e instrukshonnan ku nos a duna nan.

⁷ Pasobra boso mes ta konsiente kon boso mester sigui nos ehèmpel: nos no a hiba un bida indisipliná tempu nos tabata huntu ku boso,

⁸ ni nos no a kome pan di niun hende sin paga. Al kontrario, di dia i anochi nos a traha duru i púluwe pa nos no ta un peso pa niun di boso.

⁹ No ku nos no tabatin derecho di pidi boso yuda nos, pero nos a traha pa duna boso e ehèmpel ku boso mester sigui.

¹⁰ En bèrdat, tempu nos tabata huntu ku boso nos a duna boso e siguiente regla: Es ku no ke traha no ta kome!

¹¹ A yega na nos orea ku tin algun hende serka boso ku ta hiba un bida indisipliná; nan no ta buska trabou pa hasi, pero ta traha trabou di otro hende!

¹² Den nòmber di Señor Hesu-Kristu, nos ta ordená i enkargá e rumannan ku ta biba asina pa traha pa nan pan den tur trankilidat.

¹³ Pero rumannan, boso sí no mester kansa di hasi bon.

¹⁴ Wak ken no ke obedesé loke nos a bisa den e karta akí. No asosiá kuné, ya esei ta brongos'é.

¹⁵ Ma no trat'é manera enemigu sí; hala su atenshon manera ta hasi ku un ruman.

Saludo final

¹⁶ Señor ku ta duna pas, duna boso e pas ei tur ora i bou di tur sirkunstansia. Señor sea ku boso tur!

¹⁷ Awor ta mi mes ta skibi esaki: Kumindamentu di Pablo! Ta asin'akí mi ta firma tur mi kartanan; ta asin'akí mi ta skibi.

¹⁸ Grasia di nos Señor Hesu-Kristu sea ku boso tur.