2 Samuel 4 - Papiamentu Bible 2013

Morto di Ish-Boshèt

¹ Ora Ish-Boshèt, yu di Saul, a tende ku nan a mata Abner na Hebron, el a pèrdè kurashi i henter Israel a haña mashá miedu.

² Ish-Boshèt tabatin dos hòmber den su servisio ku tabata hefe di un brigada spesial. Un di nan tabata yama Baana, e otro Rekab. Nan tabata yu di Rimon di e pueblo di Beerot i tabata pertenesé na tribu di Benhamin. Beerot tambe ta forma parti di teritorio di Benhamin.

³ Pasobra e habitantenan original di Beerot a hui bai Guitaim i a keda biba aya komo strañero te dia djawe.

⁴ Yonatan, yu di Saul, tabatin un yu hòmber, yamá Mefiboshèt, ku tabata lam na tur dos pia. Mefiboshèt tabatin sinku aña, dia e mal notisia ku Saul i Yonatan a muri a yega for di Yizreel. Su menchi a koh'é riba brasa i hui kuné, pero den su ansha Mefiboshèt a kai i a keda mankaron for di e dia ei.

⁵ Rekab i Baana, yu di Rimon di Beerot, a bai kas di Ish-Boshèt. Den higra di solo nan a yega nèt ora Ish-Boshèt tabata sosegá un ratu.

⁶ Nan a hasi manera ta trigo nan a bin buska. Nan a drenta te den e kas i hinka Ish-Boshèt den su barika. Despues nan a kore bai.

⁷ E dosnan ei a drenta den e kas miéntras Ish-Boshèt tabata drumí riba su kama den su kamber; nan a hink'é mata i kita su kabes afó. Nan a bai ku su kabes i nan a kana henter anochi pasa den vaye di Yordan

⁸ bai Hebron pa entregá David e kabes. Nan a bisa rei: ‘Ata kabes di Ish-Boshèt, yu di bo enemigu Saul, ku tabata buska bo pa mata. Awe SEÑOR a venga loke Saul i su desendientenan a hasi ku su mahestat.’

⁹ David a kontestá Rekab i su ruman Baana, yu di Rimon di Beerot: ‘Pa Dios bibu ku a saka mi semper for di tur pèrtá:

¹⁰ e hòmber ku a trese notisia di Saul su morto pa mi na Siklag tabata konvensí ku el a trese bon notisia pa mi, pero mi a laga koh'é prezu i mat'é. Asina mi a paga su trabou di mensahero.

¹¹ Ku mas rason ainda mi ta hasi meskos ku boso, malbadonan, ku a drenta mata un hòmber inosente den su mes kas miéntras e tabata drumí. Mi ta laga boso paga pa su morto, pasobra ta boso ta responsabel. Mi ta bari boso for di riba mundu.’

¹² Mesora David a duna su sirbidónan òrdu pa mata e hòmbernan. E sirbidónan a kap man i pia di e dos hòmbernan kita afó i horka nan serka di dam di Hebron. Nan a kohe kabes di Ish-Boshèt i der'é den graf di Abner na Hebron.