2 Samuel 23 - Papiamentu Bible 2013

Último palabranan di David

¹ At'akí e último palabranan di David: ‘David, yu di Ishai, David, e hòmber altu elevá pa SEÑOR, konsagrá komo rei pa e Dios di Yakob, kantadó faborito di Israel, ta deklará:

² Spiritu di SEÑOR ta papia pa medio di mi, mi ta anunsiá loke E ta bisa mi.

³ E Dios di Israel a papia, e Baranka di Israel a bisa mi: “Esun ku ta manda riba hende ku hustisia, esun ku ta manda ku rèspèt pa Dios

⁴ ta manera lus di mainta, na salida di solo — un mainta sin nubia — manera klaridat despues di áwaseru ku ta pone yerba sali for di tera.”

⁵ N' ta asina mi famia ta pará serka Dios? E no a sera un aliansa ku mi ku lo dura pa semper, ku reglanan detayá i sigur? No ta E a laga mi viktoria, tur mi deseonan spreit manera yerba?

⁶ Pero hendenan ku no tin kunes ku nada nan tur ta manera sumpiña ku mester tira afó, no sa kohe nan ku man;

⁷ ningun hende no ta mishi ku nan si nan no ta armá ku hèrmènt di heru i ku palu di lansa; ta tira nan den kandela, pa kima nan, kima nan aya mes.’

E balentenan di David

⁸ Aki ta sigui e nòmbernan di e héroenan di David: Yisbaal di Hakmoni. E tabata hefe di e trio mas balente, esun ku na un okashon a derotá 800 hòmber ku su lansa i a derotá nan den un tiru.

⁹ Despues ta sigui Eleazar, yu hòmber di Dodo, di famia Ahoag. E tabata e di dos den e tres héroenan, ku tabata huntu ku David, ora nan a desafiá e filisteonan, ku a reuní nan trupanan aya pa bataya. Miéntras e israelitanan a retirá,

¹⁰ el a para firme i a keda mata e filisteonan te ora su man a kue kram di kansansio i e no por a laga su spada lòs mas. Asina SEÑOR a duna e pueblo un gran viktoria e dia ei. Despues e ehérsito a sigui Eleazar, ma solamente pa nan a hòrta loke nan por a haña for di e mortonan.

¹¹ Shama, yu hòmber di Ague di Harar, tabata e di tres. Dia e filisteonan a reuní na Lehi, kaminda tabatin un kunuku di bonchi, e israelitanan a hui pa nan.

¹² Shama a bai para meimei di e kunuku; el a sa di defendé e kunuku i a derotá e filisteonan. Asina SEÑOR a duna nan un gran viktoria.

¹³ Ainda tabatin tres mas. Nan tabata forma parti di e trinta òfisirnan ku na kuminsamentu di tempu di kosecha a sa di alkansá David den kueba di Adulam, ounke tabatin un kampamentu filisteo den vaye di Refaim.

^14-15 David tabata den su spelònk altu den seru. Un momento dado David a ekspresá e deseo: ‘Mare un hende por duna mi poko awa di bebe for di e pos ku tin serka di porta di Betlehèm.’ Pero aya na Betlehèm tabatin un pòst di e filisteonan.

¹⁶ E ora ei e tres balentenan akí a penetrá pasa dor di e filanan filisteo i saka awa for di e pos ku tin serka di porta di Betlehèm. Nan a hiba e awa pa David, pero David no ker a beb'é; el a bash'é komo ofrenda na SEÑOR.

¹⁷ El a bisa: ‘Dios warda mi di hasi un kos asina. Ta manera bebe sanger di e tres hòmbernan akí ku a riska nan bida pa bai busk'é.’ P'esei e no ker a beb'é. Kosnan asina e tres balentenan akí tabata hasi.

¹⁸ Abishai, ruman di Yoab i yu di Seruya, tabata hefe di e tres balentenan akí. Un bia el a ataká 300 hòmber ku su lansa i derotá nan. Asina el a haña mes tantu fama ku e Trio famoso.

¹⁹ E tabata esun di mas famoso den e tres balentenan, te ku el a bira nan hefe, pero e no por a kompetí ku e Trio.

²⁰ Tambe tabatin Benayahu, yu di Yoyada, un hòmber mashá balente di e pueblo Kabseel; el a logra hasi hopi hazaña. T'e a mata e dos hòmbernan yamá ‘Leon di Moab’. T'e tambe, un dia ku tabatin sneu, a laga su mes sak den un renbak i mata un leon ku tabatin eiden.

²¹ E mes Benayahu ei a derotá un egipsio grandi manera un kas, ku tabata armá ku un lansa. Benayahu a bai riba dje ku un palu, ranka e lansa kita for di su man i mat'é ku su mes lansa.

²² Kosnan asina Benayahu tabata hasi; el a haña hopi fama den e tres balentenan.

²³ El a risibí mas honor ku e trinta òfisirnan, pero e no por a igualá e famoso Trio. David a dun'é mando riba su guardia personal.

²⁴ Den e trinta òfisirnan por a haña: Asael, ruman di Yoab; Elhanan, yu di Dodo di Betlehèm;

²⁵ Shama di Harod; Elika tambe di Harod,

²⁶ Hèlès di Bet-Pèlèt, Ira, yu di Ikesh di Tekoa;

²⁷ Abiezèr di Anatot, Mebunai di Husha,

²⁸ Salomon di Ahoag; Marai di Netofa;

²⁹ Helèb, yu di Baana di Netofa; Itai, yu di Ribai, di Guibea na Benhamin

³⁰ Benayahu di Piraton, Hidai di e Roinan-di-Gaash;

³¹ Abi-Albon di Bet-Arba; Azmawèt di Bahurim;

³² Elyagba di Shaalbim; Yashen di Gun; Yonatan, yu di Shama;

³³ Shama di Harar; Ahíam yu di Sharar, ku tambe tabata di Harar;

³⁴ Elifelèt, yu di Ahasbai, di Bet-Maaka; Eliam, yu di Ahitofèl, di Guilo;

³⁵ Hèsrai di Karmel; Paarai di Arab;

³⁶ Yigal, yu di Natan, di Soba; Bani di Gad;

³⁷ Sèlèk di Amon; Naarai di Beerot, ayudante di Yoab, yu di Seruya;

³⁸ Ira di Yatir, Gareb ku tambe tabata di Yatir;

³⁹ i Urías, e hetita. Tur huntu trintishete.