2 Samuel 22 - Papiamentu Bible 2013

Kanto di viktoria di David

¹ Esaki ta e kantika ku David a kanta pa SEÑOR, dia ku SEÑOR a libr'é for di man di tur su enemigunan i for di gara di Saul.

² El a bisa: ‘SEÑOR ta mi baranka, mi fòrti i Salbador.

³ Mi Dios, e baranka pa mi skonde, mi eskudo, arma di mi viktoria, baluarte, mi asilo, mi refugio, Bo ta libra mi di hende violento.

⁴ Gloria na SEÑOR! Ora mi a yam'É El a libra mi for di man di enemigu.

⁵ Morto a sera mi den su olanan, awa brutu brutu kla pa guli mi;

⁶ Reino di morto a sera mi den kordon, Lamuèrtè a arma trampa mi dilanti.

⁷ Den mi ansha mi a sklama na SEÑOR, sí, mi a grita duru na mi Dios. El a skucha mi bos fo'i su palasio, mi gritu di ousilio a yega na su orea.

⁸ Kaba tera a sakudí i a kuminsá krak, fundeshi di shelunan a tambaliá, nan a tembla, pasobra Dios a baha su rabia.

⁹ Fo'i su nanishi a sali huma bai ariba, un kandela golos a brota fo'i su boka, El a saka karbon sendé kòrá kòrá.

¹⁰ El a sker shelu habri i a baha abou, un nubia pretu tabatin bou di su plant'i pia.

¹¹ El a subi un kerubin i a bula bai. El a aparesé riba alanan di bientu.

¹² El a hasi tiniebla rònt di djE su tènt, masanan di awa, nubia riba nubia.

¹³ Fulgor a kore su dilanti, karbonnan sendé a bria.

¹⁴ Bos di SEÑOR a lora na shelu, Dios Altísimo a laga su stèm resoná.

¹⁵ El a tira flecha, El a plama nan, saka rayo di welek, El a bruha nan.

¹⁶ Hende por a mira fondo di laman, fundeshi di tera a sali na bista, dor di e gritu di menasa di SEÑOR i e suplamentu pisá fo'i su nanishi.

¹⁷ El a saka su man for di ariba gara mi, El a saka mi for di e awanan hundu,

¹⁸ libra mi for di man di mi enemigu poderoso, di esnan ku a odia mi i ta muchu fuerte pa mi.

¹⁹ Nan a ataká mi na e momento fatal, pero SEÑOR a duna mi su apoyo.

²⁰ El a hiba mi na un lugá espasioso. El a libra mi pa motibu ku E ta stima mi.

²¹ SEÑOR a trata mi segun mi bon kondukta, El a rekompensá mi pa mi mannan limpi,

²² pasobra mi a sigui SEÑOR su kamindanan i mi no a peka bira lomba pa mi Dios.

²³ Tur su dekretonan mi a tene mi dilanti, loke E ta manda mi no a kita fo'i dje.

²⁴ Mi tabata fiel n'E den delaster un kos; m'a tene mi leu fo'i tur loke ta malu.

²⁵ Anto SEÑOR a paga mi segun mi bon kondukta segun mi puresa ku su wowo a mira.

²⁶ Bo ta fiel pa esun ku ta fiel, sin reproche pa un hende ireprochabel,

²⁷ sinsero pa esun ku ta sinsero ma alerta pa un hende ku maña.

²⁸ Bo ta salba un pueblo humilde, Bo ta wak e sobèrbènan ku Bo ta humiliá.

²⁹ Abo ta Esun ku ta mi lampi, SEÑOR, SEÑOR ta iluminá mi skuridat.

³⁰ Sí, ku Bo mi ta bula drenta un trupa armá, huntu ku mi Dios mi ta bula muraya.

³¹ E Dios akí — su kaminda ta perfekto, palabra di SEÑOR, bo por konfia riba dje. E ta un eskudo pa tur hende ku ta buska nan refugio serka djE.

³² Pasobra ken ta Dios, fuera di SEÑOR? Ki baranka tin fuera di nos Dios?

³³ Dios ta mi forsa, un forsa poderoso. El a habri kaminda pa mi pasa trankil.

³⁴ El a hasi mi pia manera di biná i a pone mi para firme na lugánan na altu.

³⁵ El a siña mi mannan e arte di bataya i mi brasa kon rèk e bog di bròns.

³⁶ B'a entregá mi bo eskudo protektor, B'a skucha mi i mi forsa a oumentá.

³⁷ B'a habri e kaminda pa mi kana, mi ènkelnan no ta suek.

³⁸ M'a persiguí mi enemigunan i mi a plèchè nan i mi no a bolbe sin a kaba ku nan.

³⁹ Mi a mata nan, kaba ku nan, di moda ku nan no a lanta mas, nan a kai abou, drumí na mi pia.

⁴⁰ Sí, Bo a faha mi ku forsa pa kombate, Bo a laga mi atversario bùk mi dilanti.

⁴¹ Bo a pone mi enemigu bira lomba, hui bai, mi a destruí tur esnan ku ta odia mi.

⁴² Nan ta wak rònt — ningun hende pa salba, buska SEÑOR — E no a kontestá.

⁴³ Mi a garna nan fini fini, nan a bira stòf, mi a trapa nan, bari nan manera sushi di kaya.

⁴⁴ Bo a libra mi di e rebeldia di mi pueblo bo a warda mi na kabes di nashonnan, pueblonan di hende deskonosí a pone nan mes na mi sirbishi.

⁴⁵ Nan ta trastia ku mi, e strañeronan, nan ta obedesé mi pareu nan tende mi.

⁴⁶ Strañeronan ta bini asustá, ta sali fo'i nan fòrtinan tur na temblamentu.

⁴⁷ Biba SEÑOR! Bendishoná ta mi Baranka! Mare Dios por ta altu elevá. E baranka ku a duna mi viktoria!

⁴⁸ E ta e Dios ku ta venga mi i ta pone pueblonan bou di mi poder.

⁴⁹ Bo ta salba mi for di gara di mi enemigunan, hisa mi altu riba esnan ku a ataká mi, i libra mi di hende violento.

⁵⁰ P'esei, mi ta alabá Bo, SEÑOR, den pueblonan! I mi ta kanta salmo na honor di bo nòmber.

⁵¹ E ta duna su rei viktorianan grandi, E ta mustra su fieldat na su rei skohí, na David su desendientenan pa semper.’