2 Samuel 13 - Papiamentu Bible 2013

Amnon ta deshonrá Tamar

¹ Despues a sosodé lo siguiente. Absalon, yu hòmber di David, tabatin un ruman muhé mashá bunita, yamá Tamar. Amnon, un otro yu hòmber di David, a namorá di Tamar.

² El a namorá asina tantu di su ruman Tamar, ku el a kunsumí te bira malu, pasobra e ruman tabata bírgen i Amnon no tabata mira ni un chèns pa mishi kuné.

³ Amnon awor tabatin un amigu yamá Yehonadab, yu hòmber di Shima, ruman di David. Yehonadab tabatin solushon pa tur kos.

⁴ Un dia Yehonadab a puntra Amnon: ‘Mi bon prínsipe, di kon bo ta asina tumbá tur mainta? Bisa mi ki falta bo.’ I Amnon a kontest'é: ‘Mi ta namorá di Tamar, ruman di Absalon, mi ruman hòmber.’

⁵ E ora ei Yehonadab a bisa Amnon: ‘Kai drumi riba kama i hasi komo si fuera ta malu bo ta. Ora bo tata bin bishitá bo, bo ta bis'é: “Tata, laga mi ruman Tamar bin duna mi kuminda. Ora e prepará e kuminda mi dilanti, di manera ku mi por mira, mi ta lag'é duna mi na boka.” ’

⁶ Amnon a kai drumi riba kama i a hasi komo si fuera e tabata malu. Ora rei a bin bishit'é, Amnon a bis'é: ‘Tata, laga mi ruman Tamar bin traha poko repa kaminda mi por mir'é, i duna mi nan na boka.’

⁷ E ora ei rei a manda un rospondi pa Tamar na palasio: ‘Bai kas di bo ruman Amnon i prepará kuminda p'e.’

⁸ Tamar a bai kas di su ruman Amnon, ku tabata drumí riba kama. El a kohe mansa mans'é, traha e repanan kaminda Amnon por a mir'é i hasa nan.

⁹ Despues el a bai ku e panchi serka Amnon i a pone e repanan su dilanti p'e kome. Pero Amnon a nenga di kome i el a bisa: ‘Laga tur hende bai for di aki.’ Ora tur hende a bai,

¹⁰ Amnon a bisa Tamar: ‘Trese e kuminda den mi kamber, i duna mi na boka.’ Tamar a kohe e repanan ku el a prepará i a hiba nan pa su ruman den kamber.

¹¹ Ora el a saka man pa duna Amnon e kuminda, Amnon a koh'é tene duru i a bis'é: ‘Bini, bin drumi ku mi, ruman.’

¹² Pero Tamar a kontestá: ‘Nò, ruman, no deshonrá mi, no sa hasi kos asina na Israel. Laga e lokura ei!

¹³ Ami, unda lo mi por bai ku mi bèrgwensa? I abo, henter Israel lo yama bo un sinbèrgwensa. Papia ku rei, pasobra lo e no nenga di laga mi bira bo muhé.’

¹⁴ Sinembargo Amnon no ker a tende di Tamar, pero el a gar'é i viol'é.

¹⁵ Despues Amnon a haña un asko grandi di Tamar, un asko mas grandi ku e amor ku e tabata sinti p'e. Amnon a bisa Tamar: ‘Lant'ariba, bai fo'i djaki!’

¹⁶ Tamar a bis'é: ‘Nò! Manda mi bai ta pió ku loke bo a kaba di hasi ku mi.’ Pero Amnon no ker a tende di Tamar.

¹⁷ El a yama e sirbidó ku tabata atend'é i a bis'é: ‘Bai ku e muhé ei for di aki, sak'é pafó i sera e porta bon na rèndu su tras.’

¹⁸ Tamar tabatin un paña largu ku manga largu bistí, manera prinsesanan tabata bisti tanten nan tabata bírgen. E sirbiente di Amnon a saka Tamar pafó i a sera e porta bon na rèndu su tras.

¹⁹ Tamar a stroi tera riba su kabes, sker su bistí largu, pone man riba su kabes i a kana bai yorando.

²⁰ Su ruman Absalon a puntr'é: ‘Drumi Amnon a drumi ku bo? Ni un palabra dje kos ei, ruman; kon ku bai bini ta bo ruman e ta. No preokupá di mas pa loke a pasa.’ Asina Tamar a bai biba, manera un muhé bandoná, den kas di su ruman Absalon.

²¹ Ora rei David a tende tur e kosnan akí, el a rabia mashá pisá.

²² Absalon no a papia niun palabra mas, ni na bon ni na malu, ku Amnon. Absalon tabata odia Amnon, pasobra el a deshonrá su ruman Tamar.

Absalon ta tuma vengansa riba Amnon.

²³ Dos aña despues Absalon tabatin feitadónan di karné ta traha p'e na Baal-Hasor, ku ta keda pegá ku Efraim. Komo e ker a kombidá tur e yu hòmbernan di rei na e fiesta akí,

²⁴ el a bai serka rei i bisa: ‘Tende, komo ku mi tin feitadónan di karné ta traha pa mi, mi ke pidi pa rei i su korte kompañá mi.’

²⁵ Pero rei a bisa Absalon: ‘Despensá mi, mi yu, nos tur no por bai, ta muchu molèster pa bo.’ Kon ku Absalon a keda insistí, rei no ker a bai i el a bis'é: ‘Bai ku Dios!’

²⁶ E ora ei Absalon a bisa: ‘Si abo no ke bai, laga sikiera mi ruman Amnon bai ku nos antó.’ ‘Pakiko bo ke pa e bai ku bo?’ rei a puntra.

²⁷ Ora Absalon a keda insistí, rei a laga Amnon i tur e otro prínsipenan bai kuné.

²⁸ Absalon a laga prepará un bankete digno di un rei i el a bisa su sirbidónan: ‘Paga bon tinu! Asina e biña hasi Amnon kontentu i mi bisa boso: “Dal Amnon mata”, boso mester mat'é. No tene miedu. N' t'ami a manda boso? Sea balente i aktua ku kurashi!’

²⁹ E sirbidónan di Absalon a hasi ku Amnon manera Absalon a ordená. E ora ei tur e yu hòmbernan di rei a lanta fo'i mesa, subi nan mula i hui.

³⁰ Nan tabata na kaminda ainda, ora e notisia a yega na orea di David ku Absalon a laga mata tur e yu hòmbernan di rei i ku ni un di nan no a skapa.

³¹ E ora ei rei a lanta para, sker e pañanan ku e tabatin na su kurpa kibra di fèrdrit i a kai drumi abou. Tur su funshonarionan tabata pará ku nan pañanan isker rònt di dje.

³² Pero Yehonadab, yu di Shima ruman di David, a tuma palabra i bisa: ‘Mi shon, no pensa ku ta tur e prínsipenan yòn nan a mata; ta Amnon so a muri. Por a mira e intenshon akí na kara di Absalon for di dia ku Amnon a deshonrá su ruman muhé Tamar.

³³ P'esei, su mahestat no mester kere ku ta tur e yu hòmbernan di rei a muri, ta Amnon so a muri.’

³⁴ Absalon a hui bai. E hòmber ku tabata na warda a hisa kara i riba e kaminda di Horonaim el a mira un multitut grandi ku tabata baha for di seru. E guardia a bai bisa rei ku riba e kaminda di Horonaim el a mira un grupo di hende ku tabata baha for di seru.

³⁵ Yehonadab a bisa rei: ‘Mi n' bisa rei? Ata rei su yunan ta bini aya.’

³⁶ E no a kaba di papia ku e yunan di rei a yega. Nan a kuminsá yora mashá duru; rei i su funshonarionan tambe a grita yora.

³⁷ Entretantu Absalon a hui bai serka Talmai, e yu hòmber di Amihud, ku tabata rei di Gueshur. Tur dia David tabata yora su yu.

³⁸ Asina ta ku Absalon a hui bai Gueshur i a keda tres aña aya.

³⁹ Ora David a konformá su mes ku morto di Amnon, el a kuminsá sinti mashá falta di Absalon.