2 Reinan 2 - Papiamentu Bible 2013

SEÑOR ta tuma Elías den shelu

¹ Ora a yega e momento ku, pa medio di un warwarú, SEÑOR lo a tuma Elías den shelu, Elías ku Eliseo a sali for di Guilgal.

² El a bisa Eliseo: ‘Keda aki numa, pasobra SEÑOR a manda mi bai Betel.’ Pero Eliseo a kontestá: ‘Por Dios, mi no ta bai laga bo.’ Asina nan a bai Betel.

³ E ora ei e grupo di profeta di Betel a sali bai serka Eliseo i nan a puntr'é: ‘Bo sa ku awe SEÑOR ta kita bo maestro for di bo?’ Eliseo a kontestá: ‘Mi tambe sa, keda ketu.’

⁴ Elías a bisa: ‘Eliseo, keda aki numa, pasobra SEÑOR a manda mi bai Yériko.’ Pero Eliseo a kontestá: ‘Por Dios, mi no ta bai laga bo.’ Asina nan a yega Yériko.

⁵ E ora ei e grupo di profeta di Yériko a bai serka Eliseo i a puntr'é: ‘Bo sa ku awe SEÑOR ta kita bo maestro for di bo?’ El a kontestá: ‘Mi tambe sa, keda ketu.’

⁶ Elías a bisa Eliseo: ‘Keda aki numa, pasobra SEÑOR a manda mi bai Yordan.’ Pero Eliseo a kontestá: ‘Por Dios mi no ta bai laga bo.’ Asina nan dos a sigui nan kaminda.

⁷ Sinkuenta di e profetanan a sigui nan, pero nan a keda na un bon distansia, ora Elías i Eliseo a keda para na Yordan.

⁸ Elías a kita su mantel, lor'é i a bati kuné riba e awa. E awa a parti poko aki banda i poko aya banda, asina tur dos por a krusa riba tera seku.

⁹ Ora nan a kaba di krusa Elías a bisa Eliseo: ‘Bisa mi kiko bo ke pa mi hasi pa bo, promé ku Dios tuma mi for di bo.’ Eliseo a kontestá: ‘Laga mi haña dòbel porshon di bo donnan spiritual!’

¹⁰ ‘Bo ta pidi algu difísil,’ Elías a kontestá. ‘Pero si bo mira ora Dios tuma mi for di bo, bo deseo ta keda kumplí, de lo kontrali nò.’

¹¹ Miéntras nan tabata kana papia, diripiente un garoshi di kandela ku kabainan di kandela a separá nan for di otro. Asina Elías a subi bai shelu den un warwarú.

¹² Eliseo a mir'é i a grita: ‘Mi tata, mi tata, bo tabata di mesun balor pa Israel ku un ehérsito di garoshi ku kabai.’ Despues di esaki e no por a mira Elías mas. Di fèrdrit Eliseo a sker su paña na dos.

¹³ El a hisa e mantel ku a kai for di Elías i el a bai bèk i a bai kantu di Yordan.

¹⁴ El a bati riba e awa ku e mantel di Elías i a grita: ‘SEÑOR, Dios di Elías, unda Bo ta?’ Asina Eliseo tambe a bati riba e awa, e awa a parti; poko a bai pa aki banda, poko a bai pa aya banda, di manera ku e por a krusa.

¹⁵ E grupo di profeta di Yériko, ku tabata pará na un distansia, a bisa ora nan a wet'é: ‘E donnan spiritual di Elías a pasa pa Eliseo.’ Nan a bai kontr'é i a bùig te na suela su dilanti.

¹⁶ Nan a bis'é: ‘Tende, entre bo sirbidónan tin sinkuenta hòmber balente; laga nan bai buska bo maestro. Podisé Spiritu di SEÑOR a his'é bent'é riba un seru òf den un vaye.’ Pero Eliseo a kontestá: ‘No hasi e kos ei.’

¹⁷ Ma nan a keda persistí te ku e mester a tuma aden. E ora ei el a bisa nan: ‘Laga nan bai numa.’ Nan a manda sinkuenta hòmber bai ku a buska Elías durante tres dia sin por a hañ'é.

¹⁸ Ora e hòmbernan a bolbe Yériko, kaminda Eliseo tabata keda, el a bisa nan: ‘Ma mi no a bisa boso pa no hasié?’

Eliseo ta hasi ku e awa di Yériko ta bira bon pa bebe

¹⁹ E habitantenan di e siudat a bisa Eliseo: ‘Manera señor ta weta, nos siudat ta bon situá, pero e awa ta malu i e ta kousa ku den e region yu di hende i di bestia ta nase morto.’

²⁰ Eliseo a bisa: ‘Buska un skòter nobo pa mi i pone poko salu aden.’ Nan a hasié.

²¹ Despues Eliseo a bai na e bròn i a tira e salu aden ku e palabranan akí: ‘Asina SEÑOR ta bisa: “Mi ta hasi e awa akí bira bon i nunka mas lo e no kousa morto ni nasementu di yu morto.” ’

²² For di e dia ei te dia djawe e awa a keda bon manera Eliseo a bisa.

Eliseo i e muchanan di Betel

²³ Djei Eliseo a bai Betel, den seru. Na kaminda, ora e tabata subi, poko mucha hòmber yòn a sali for di e siudat. Nan tabata hasi bofon di dje. Nan tabata grita Eliseo: ‘Subi no, kabes limpi, subi no!’

²⁴ Eliseo a drei wak nan i maldishoná nan den nòmber di SEÑOR. E ora ei a sali dos mama oso for di mondi ku a habraká 42 di e muchanan.

²⁵ Di Betel Eliseo a bai seru di Karmel i djei el a bolbe Samaria.