2 Reinan 15 - Papiamentu Bible 2013

Azarías, rei di Huda

¹ Azarías, yu di Amasías, a bira rei di Huda tempu Yerobeam tabatin bintishete aña rei di Israel.

² E tabatin diesseis aña dia el a bira rei i el a goberná sinkuentidos aña na Herusalèm. Su mama tabata yama Yekolya i tabata di Herusalèm.

³ Azarías tabata hasi loke ta bon den bista di SEÑOR. Den tur kos e tabata sigui ehèmpel di su tata.

⁴ Solamente no a kita e seritunan di sakrifisio; e pueblo a sigui mata i kima bestia riba nan.

⁵ SEÑOR a kastigá rei Azarías ku lepra i el a keda ku e malesa te dia el a muri. Tur e tempu ei el a biba den un kas isolá. Su yu Yotam a tuma palasio i gobernashon di e pueblo na su enkargo.

⁶ Sobrá historia di Azarías i tur loke el a hasi ta skibí den buki di krónika di reinan di Huda.

⁷ Azarías a bai sosegá i a der'é serka su antepasadonan den Siudat di David. Su yu Yotam a siguié komo rei.

Zekarías, rei di Israel

⁸ Zekarías, yu di Yerobeam, a bira rei di Israel tempu Azarías tabatin trintiocho aña rei di Huda. Zekarías tabatin su residensia na Samaria i el a goberná seis luna.

⁹ Zekarías tabata hasi loke ta malu den bista di SEÑOR meskos ku su antepasadonan. E no a stòp di hasi e pikánan ku Yerobeam, yu di Nebat, a pone Israel kometé.

¹⁰ Shalum, yu di Yabèsh, a traha un kòmplòt kontra Zekarías. El a dal e mata na Yibleam i a bira rei na su lugá.

¹¹ Sobrá historia di Zekarías ta skibí den buki di krónika di reinan di Israel.

¹² Asina SEÑOR a kumpli ku e promesa ku El a hasi Yehu, esta ku Yehu su yunan lo siguié riba trono di Israel te den di kuater generashon.

Shalum, rei di Israel

¹³ Shalum, yu di Yabèsh, a bira rei, tempu Uzías tabata trintinuebe aña rei di Huda. Un luna kompleto el a goberná na Samaria.

¹⁴ Den e tempu ei Menahem, yu di Gadi, a sali for di Tirsa bai Samaria. Aya el a dal Shalum, yu di Yabèsh, mata i a bira rei na su lugá.

¹⁵ Sobrá historia di Shalum, su kòmplòt kontra Zekarías, ta skibí den buki di krónika di reinan di Israel.

¹⁶ Pasobra e hendenan di Tifsag a nenga di habri porta di siudat pa Menahem, el a konkistá e siudat akí. El a mata tur e habitantenan i e hendenan di henter e region, kuminsando na Tirsa, i a laga habri barika di tur muhé na estado.

Menahem, rei di Israel

¹⁷ Menahem, yu di Gadi, a bira rei di Israel tempu Azarías tabatin trintinuebe aña rei di Huda. Dies aña Menahem a goberná na Samaria.

¹⁸ E tabata hasi loke ta malu den bista di SEÑOR, pasobra e no a stòp di hasi e pikánan ku Yerobeam, yu di Nebat, a pone Israel kometé. Den e tempu ei

¹⁹ Pul, rei di Asiria, a sali pa ataká Israel. Menahem a duna Pul 30.000 kilo di plata, pa Pul yud'é mantené su reino.

²⁰ Pa paga rei di Asiria e kantidat di plata ei, Menahem a ordená pa tur israelita ku tabata por, entregá mei kilo di plata. E ora ei rei di Asiria a retirá i a laga Israel na pas.

²¹ Sobrá historia di Menahem i tur loke el a hasi ta skibí den buki di krónika di reinan di Israel.

²² Despues ku Menahem a bai sosegá, su yu Pekaías a siguié komo rei.

Pekaías, rei di Israel

²³ Pekaías, yu di Menahem, a bira rei di Israel tempu Azarías tabatin sinkuenta aña rei di Huda. Pekaías tabatin su residensia na Samaria i el a goberná dos aña.

²⁴ Pekaías tabata hasi loke ta malu den bista di SEÑOR i e no a stòp di hasi e pikánan ku Yerobeam, yu di Nebat, a pone Israel kometé.

²⁵ Su ofisial di konfiansa Pèkag, yu di Remaliahu, a traha un kòmplòt kontra dje. Ku yudansa di sinkuenta hòmber di Guilead, Pèkag a mata Pekaías, tambe el a mata Argob i Arye den fòrti di palasio real. Pèkag a siguié komo rei.

²⁶ Sobrá historia di Pekaías i tur loke el a hasi ta skibí den buki di krónika di reinan di Israel.

Pèkag, rei di Israel

²⁷ Pèkag, yu di Remaliahu, a bira rei di Israel tempu Azarías tabatin sinkuentidos aña rei di Huda. Pèkag tabatin su residensia na Samaria i el a goberná binti aña.

²⁸ Pèkag tabata hasi loke ta malu den bista di SEÑOR. E no a stòp di hasi e pikánan ku Yerobeam, yu di Nebat, a pone Israel kometé.

²⁹ Tempu ku Pèkag tabata rei di Israel, Tiglat-Pilesèr, rei di Asiria, a ataká Israel i a konkistá Iyon, Abel-Bet-Maaka, Yanoag, Kèdèsh, Hasor i region di Guilead i region di Galilea, esta henter teritorio di Naftali. Tiglat-Pilesèr a deportá e habitantenan pa Asiria.

³⁰ Despues Hosea, yu di Ela, a traha un kòmplòt kontra Pèkag, yu di Remaliahu, i mat'é. Hosea a siguié komo rei den e di binti aña di reinado di Yotam, yu di Uzías.

³¹ Sobrá historia di Pèkag i tur loke el a hasi, ta skibí den buki di krónika di reinan di Israel.

Yotam, rei di Huda

³² Yotam, yu di Uzías, a bira rei di Huda den e di dos aña ku Pèkag, yu di Remaliahu, tabata rei di Israel.

³³ Yotam tabatin bintisinku aña dia el a bira rei i el a goberná diesseis aña na Herusalèm. Mama di Yotam tabata yama Yerusha i tabata yu di Sadok.

³⁴ Yotam tabata hasi loke ta bon den bista di SEÑOR. Den tur kos el a sigui ehèmpel di su tata Uzías.

³⁵ Solamente nan no a kita e seritunan di sakrifisio; e pueblo a sigui mata i kima bestia riba nan. Ta Yotam a laga konstruí e entrada di tèmpel ku ta keda na altu.

³⁶ Sobrá historia di Yotam i tur kos ku el a hasi ta skibí den buki di krónika di reinan di Huda.

³⁷ Den e tempu ei SEÑOR a kuminsá manda Resin, rei di Aram, i Pèkag, yu di Remaliahu, pa ataká Huda.

³⁸ Yotam a bai sosegá i a der'é serka su antepasadonan den Siudat di David. Su yu Ahas a siguié komo rei.