2 Krónikanan 3 - Papiamentu Bible 2013

Salomon ta traha e tèmpel

¹ E ora ei Salomon a kuminsá traha e tèmpel pa SEÑOR na Herusalèm riba seru Moria, kaminda SEÑOR a aparesé na su tata David. David a kumpra e lugá kaminda Ornan, e yebusita, tabata bati trigo ku e meta ei.

² E di dos luna den e di kuater aña di su reinado Salomon a kuminsá traha.

³ Pa konstrukshon di e tèmpel di Dios, Salomon a traha un plan segun e midí sagrado. E tèmpel tabata trinta meter largu i dies meter hanchu.

⁴ E portal dilanti di e sala grandi den tèmpel tabata dies meter largu meskos ku e hanchura di e tèmpel i sesenta meter hundu. El a laga fura paden ku oro puru.

⁵ El a laga fura e sala grandi ku palu di siprès i a fura esaki ku oro puru i a traha diseño di palma i kadena den dje.

⁶ El a laga dòrn'é ku piedra presioso.

⁷ E oro tabata bini di Parwaim. Asina el a laga fura e sala ku su balkinan, su drempinan, su murayanan i su portanan. Den e murayanan el a laga graba figura di kerubin.

⁸ E sala patras, e lugá santísimo, tabata dies meter largu meskos ku hanchura di e tèmpel i e hanchura tambe tabata dies meter. El a laga fur'é ku oro puru, na tur 18.000 kilo.

⁹ Kada klabu tabata pisa mas ku mei kilo di oro. E kuartunan ariba tambe el a fura ku oro.

¹⁰ Pa e lugá santísimo el a laga basha dos figura di kerubin i a fura nan ku oro.

^11-12 E alanan di e kerubinnan huntu tabatin un largura di dies meter. Kada kerubin tabatin dos ala di dos meter i mei largu. Un ala di e promé kerubin tabata mishi ku esun muraya i un ala di e otro kerubin tabata mishi ku e otro muraya i e dos otro alanan tabata topa otro.

¹³ Huntu e alanan di e kerubinnan tabata midi dies meter di punta di ala di un kerubin pa punta di ala di e otro. E kerubinnan tabata pará ku kara pa e sala grandi.

¹⁴ El a laga traha e kortina dilanti di lenen fini koló blou püs, kòrá püs i kòrá bibu ku figura di kerubin aden.

¹⁵ Despues el a laga traha dos pilá ku el a laga pone dilanti di tèmpel. Nan tabata diesshete meter i mei altu. Riba kada pilá tabatin un kapitel di dos meter i mei.

¹⁶ E kadenanan ku el a laga traha el a pone ariba na kabes di e pilánan; despues el a laga traha shen granatapel i a laga pega nan na e kadenanan.

¹⁷ El a laga pone e pilánan na entrada di tèmpel, un na man drechi, un na man robes. Esun na man drechi el a yama Yakin i esun na man robes Boaz.