2 Krónikanan 14 - Papiamentu Bible 2013

Asa, rei di Huda

¹ Abías a bai sosegá serka su antepasadonan i a der'é na Siudat di David. Su yu Asa a siguié komo rei. Tempu di Asa e pais tabatin dies aña di trankilidat.

² Asa a hasi loke ta bon den bista di SEÑOR, su Dios.

³ El a kita e altánan strañero i e seritunan di sakrifisio, kibra e piedranan sagrado na pida pida i kap e palunan sagrado basha abou.

⁴ El a ordená pueblo di Huda pa hasi boluntat di SEÑOR, Dios di nan antepasadonan, dor di kumpli ku loke SEÑOR ta ordená den su lei.

⁵ El a kita tur e seritunan di sakrifisio i e altánan di sensia for di den e siudatnan di Huda. Tempu di Asa tabatin trankilidat den reino.

⁶ Durante e periodo akí ku tabatin trankilidat den e pais, el a konstruí diferente siudat reforsá den Huda. Den tur e añanan ei no tabatin ningun guera kontra dje, pasobra SEÑOR a dun'é pas i seguridat.

⁷ Asa a bisa pueblo di Huda: ‘Laga nos reforsá e siudatnan dor di traha muraya rondó di nan ku toren i portanan ku rèndu. Ainda nos tin e pais den nos poder. Pasobra nos a kumpli ku boluntat di SEÑOR, nos Dios, El a sòru pa nos i a duna nos trankilidat na tur nos fronteranan.’ Nan a kuminsá ku e trabou i tur kos a bai bon.

⁸ Asa tabatin un ehérsito di 300.000 hudeo; nan tabatin eskudo i lansa. E tabata disponé tambe di un ehérsito di 280.000 benhaminita; nan tabatin eskudo chikí i bog. Tur tabata sòldánan balente.

⁹ Zèrag di Etiopia a sali pa bringa kontra hudeonan ku un ehérsito inmensamente grandi i 300 garoshi. El a penetrá te na Maresha.

¹⁰ Asa a sali pa bringa kontra dje i e dos ehérsitonan a posishoná nan mes dilanti di otro den vaye di Sefata na Maresha.

¹¹ E ora ei Asa a pidi SEÑOR, su Dios, bin yud'é i bisa: ‘SEÑOR, ta Bo so por yuda esun ku no tin defensa den su bataya kontra esun poderoso. Yuda nos, SEÑOR, nos Dios, pasobra nos ta konfia den Bo. Abo SEÑOR, ta nos Dios, demostrá ku ningun hende no por hasi algu kontra Bo.’

¹² SEÑOR a derotá e hendenan di Etiopia. Nan a pèrdè kontra Asa i e hudeonan i nan a hui.

¹³ Asa i su sòldánan a persiguí nan te Guerar. Asina tantu sòldá di Etiopia a muri ku e ehérsito no por a lanta bèk riba pia. Nan a sufri un derota aplastante na man di SEÑOR i su ehérsito. E hudeonan a haña un botin grandi.

¹⁴ Ademas nan a invadí tur siudat den bisindario di Guerar, pasobra e habitantenan tabata tembla di miedu pa SEÑOR. Nan a sakia tur e siudatnan akí, pa motibu di e botin riku ku nan por a haña.

¹⁵ Fuera di esei nan a ataká kampamentunan di tribunan nomada i a bai ku kantidat grandi di karné, kabritu i kamel. Despues nan a bai Herusalèm bèk.