2 Krónikanan 11 - Papiamentu Bible 2013

¹ Bèk na Herusalèm Rehabeam a skohe for di tur e famianan di Huda i Benhamin, 180.000 sòldá bon itrein, pa bringa kontra Israel pa haña dominio riba e reino bèk.

² E ora ei profeta Shemaías a risibí un mensahe di SEÑOR:

³ ‘Bisa Rehabeam, yu di Salomon, rei di Huda, i tur israelita na Huda i Benhamin,

⁴ ku SEÑOR ta bisa: “No bai bringa kontra boso rumannan. Manda tur hende nan kas bèk, pasobra t'Ami a disponé asina.” ’ E ora ei nan a obedesé palabra di SEÑOR. Nan a disidí di no ataká Yerobeam i a bai kas bèk.

E siudatnan fortifiká di Rehabeam

⁵ Rehabeam tabata biba na Herusalèm. El a reforsá e siguiente siudatnan fortifiká den Huda i Benhamin:

⁶ Betlehèm, Etam, Tekoa,

⁷ Bet-Sur, Soko, Adulam,

⁸ Gat, Maresha, Zif,

⁹ Adoraim, Lakish, Azeka,

¹⁰ Sora, Ayalon i Hebron.

¹¹ El a reforsá e siudatnan akí i a nombra gobernador pa nan. El a laga warda un kantidat di kuminda, zeta i biña aya.

¹² Tambe el a sòru pa kada siudat tin eskudo i lansa. Di e manera ei el a hasi nan hopi fuerte i e tabatin Huda i Benhamin bou di kòntròl.

Saserdotenan i levitanan ta bai biba na Huda

¹³ E saserdotenan i e levitanan ku tabata biba plamá den Israel a laga nan region i bai biba den teritorio di Rehabeam.

¹⁴ E levitanan a bai laga nan kunukunan di yerba i nan propiedatnan i bai biba na Huda i Herusalèm, pasobra Yerobeam i su susesornan tabata stroba nan di traha komo saserdote den sirbishi di SEÑOR.

¹⁵ Yerobeam a nombra su mes saserdotenan pa e seritunan di sakrifisio kaminda nan tabata adorá mal spiritu i e imágennan di toro yòn ku el a laga instalá.

¹⁶ Hopi hende di tur tribu di Israel a sigui e saserdotenan i e levitanan. Nan tabata disididu di keda adorá SEÑOR, Dios di Israel, i nan a bini Herusalèm pa ofresé sakrifisio na SEÑOR, Dios di nan antepasadonan.

¹⁷ Asina nan a reforsá reino di Huda i apoyá Rehabeam, yu di Salomon. Sinembargo e tempu ku nan tur a sigui ehèmpel di David i di Salomon a dura tres aña so.

Kasánan i yunan di Rehabeam

¹⁸ Rehabeam a kasa ku Mahalat. Mahalat su tata tabata Yerimot, un yu di David. Su mama tabata Abihail, yu di Eliab. Eliab su tata tabata Ishai.

¹⁹ Mahalat a haña e siguiente yu hòmbernan ku Rehabeam: Yeus, Shemarías i Zaham.

²⁰ Despues Rehabeam a kasa ku Maaka, yu di Absalon; kuné Rehabeam tabatin e siguiente yunan: Abías, Atai, Ziza i Shelomit.

²¹ Rehabeam tabatin diesocho kasá i sesenta konkubina, ku nan e tabatin bintiocho yu hòmber i sesenta yu muhé. E tabata stima Maaka, yu di Absalon, mas ku su otro kasánan i konkubinanan.

²² P'esei Rehabeam a nombra Abías, yu di Maaka, komo su susesor i a dun'é un posishon komo lider entre su rumannan.

²³ Rehabeam tabata asina huisioso ku el a plama su otro yu hòmbernan den e siudatnan di Huda i Benhamin i a enkargá nan ku supervishon di e fòrtinan ei. Ademas el a duna nan kuminda na abundansia i a skohe un kantidat grandi di kasá pa nan.