2 Krónikanan 10 - Papiamentu Bible 2013

Divishon di reino Yerobeam, rei di Israel

¹ Rehabeam a bai Sihem, pasobra tur e israelitanan a bini huntu aya pa proklam'é rei.

² Ora Yerobeam, yu di Nebat, a tende e notisia ei, e tabata ainda na Egipto, kaminda el a bai dia el a hui pa rei Salomon.

³ Nan a manda yam'é; e ora ei e i tur e hòmbernan di Israel a bai papia ku Rehabeam. Nan a bis'é:

⁴ ‘Bo tata a pone un yugo pisá riba nos skouder; si bo aliviá e trabou duru ku el a obligá nos hasi i bo kita e yugo pisá ku el a pone riba nos skouder, nos lo sirbi bo.’

⁵ Rehabeam a kontestá nan: ‘Bin bèk ótromañan.’ Ora nan a bai,

⁶ Rehabeam a konsultá ku e ansianonan ku tabata den servisio di su tata Salomon tempu e tabata na bida ainda. El a puntra nan: ‘Kiko boso ta konsehá mi kontestá e pueblo?’

⁷ Nan a konseh'é: ‘No bai duru ku nan; kumpli ku nan deseo i papia ku nan ku kariño. E ora ei nan lo obedesé bo pa semper.’

⁸ Pero Rehabeam a rechasá e konseho ku e ansianonan a dun'é i konsultá ku e hóbennan ku a lanta huntu kuné i ku tabata den su servisio.

⁹ El a puntra nan: ‘Kiko boso ta konsehá mi kontestá e pueblo ku a pidi mi pa mi aliviá e yugo ku mi tata a pone riba nan skouder?’

¹⁰ E hóbennan ku a lanta huntu kuné a bis'é: ‘Kontestá e pueblo ku a pidi bo pa aliviá e yugo pisá ku bo tata a pone riba nan skouder asin'akí: “Mi dede chikí ta mas diki ku mi tata su sintura.

¹¹ Mi tata a pone un yugo pisá riba boso skouder, ami lo hasié mas pisá ainda; mi tata a bati boso ku kabuya, ami lo bati boso ku karbachi.” ’

¹² Riba e di tres dia Yerobeam i tur e hendenan a bolbe serka Rehabeam manera tabata palabrá.

¹³ E rei a duna e pueblo un kontesta duru. Sin hasi kaso di e konseho ku e ansianonan a dun'é,

¹⁴ el a bisa e pueblo loke e hóbennan a konseh'é: ‘Mi tata a pone un yugo pisá riba boso skouder, ami lo hasié mas pisá ainda; mi tata a bati boso ku kabuya, pero ami lo bati boso ku karbachi.’

¹⁵ Asina ta ku rei no a skucha e pueblo. SEÑOR Dios a disponé pa sosodé asina, ya e promesa ku El a hasi Yerobeam, yu di Nebat, pa boka di Ahías di Silo, lo keda kumplí.

¹⁶ Ora henter Israel a realisá ku rei no a skucha nan petishon, e pueblo a kontest'é: ‘Nos no tin nada di aber ku David. Kiko nos tin di hasi ku e yu di Ishai ei? Ban kas bèk, israelitanan! Famia di David sòru pa su mes!’ I tur israelita a bai kas bèk.

¹⁷ Rehabeam a keda rei solamente di e israelitanan ku tabata biba den e siudatnan di Huda.

¹⁸ Rei Rehabeam a purba un bia mas; el a manda Adoniram, kapatas di e trabou obligatorio, serka e representantenan di e dies tribunan, pero nan a batié ku piedra mata. Apénas rei por a subi su garoshi hui bai Herusalèm.

¹⁹ Di e manera ei Israel a kibra ku e famia real di David te dia djawe.