2 Korintionan 9 - Papiamentu Bible 2013

Donashon pa e rumannan na Hudea

¹ No ta na nodi pa mi skibi boso tokante yudansa pa e kreyentenan na Hudea.

² Mi sa ku boso ta dispuesto pa yuda i mi ta broma ku boso serka e hendenan na Masedonia; mi a bisa: ‘E rumannan na Gresia ta kla pa yuda for di aña pasá!’ I boso zelo pa yuda a animá mayoria di e hendenan na Masedonia pa duna un man.

³ Awor mi ta manda e rumannan akí serka boso pa nos bromamentu ku boso, den e asuntu akí, no resultá enbano. Nos ta manda nan pa enberdat boso pone boso kontribushon kla manera nos a bisa e otronan.

⁴ Pasobra si e hendenan di Masedonia bini huntu ku mi i nan haña ku boso no ta kla, esei lo ta un bèrgwensa pa nos ku a konfia den boso — pa no papia mes di e bèrgwensa ku boso mes lo sinti!

⁵ P'esei mi a haña ta nesesario pa pidi e rumannan akí bai serka boso promé ku mi bini, pa yuda boso prepará e kontribushon ku boso mes a primintí. E ora ei lo ta kla ku ta trata di un donashon generoso i no di algu ku a fòrsa boso pa duna.

⁶ Kòrda bon, e persona ku sembra tiki, ta kosechá tiki! Anto es ku sembra hopi, ta kosechá hopi!

⁷ Tur hende mester duna di akuerdo ku loke nan a disidí di nan kurason, no tristu òf fòrsá, pasobra Dios gusta hende ku ta duna kontentu!

⁸ I Dios por duna boso tur kos na abundansia, ya semper i den tur sentido boso por tin mas ku sufisiente pa boso mes i pa kontribuí ku tur bon obra.

⁹ Manera Skritura ta bisa: ‘E ta un hende ku ta parti ku man lòs pa esnan ku tin mester, e bon ku e ta hasi lo keda pa semper.’

¹⁰ Dios ku ta proveé simia pa e sembradó sembra kuné i pan pa hende kome, lo duna boso simia ku ta multipliká, ya e bon ku boso ta hasi ta bira un kosecha riku.

¹¹ Dios ta enrikesé boso den tur kos pa asina boso por ta generoso tur ora. Asina hende lo gradisí Dios pa boso donashon, ku nos ta entregá nan.

¹² Pasobra e yudansa akí no ta sirbi solamente pa yuda e rumannan den nan nesesidat, pero tambe pa hende gradisí Dios mashá hopi mes.

¹³ E yudansa ku boso ta duna, ta proba bon kla ku boso ta obedesidu na e bon notisia di Kristu ku boso ta profesá. E yudansa ei i e generosidat ku boso a mustra e rumannan ei i tur otro hende, lo pone hopi hende glorifiká Dios.

¹⁴ Nan lo resa pa boso ku hopi kariño, pasobra Dios a mustra boso su grasia na abundansia.

¹⁵ Laga nos gradisí Dios pa su regalo ku no por deskribí ku palabra.