2 Korintionan 2 - Papiamentu Bible 2013

¹ Ke men, mi a disidí ku ora mi bolbe bishitá boso no mester ta un bishita tristu atrobe.

² Pasobra si mi hasi boso doló, ken lo hasi mi kontentu? Ta esnan ku mi a hasi doló mes!

³ P'esei mes mi a skibi nèt esaki den mi karta. Mi no ker a bini, pa e hendenan ku mester hasi mi kontentu no hasi mi tristu. Pasobra mi ta konvensí ku boso ta kontentu ora ami ta kontentu.

⁴ Ora mi a skibi boso, mi kurason tabata preokupá i kargá, i mi a yora hopi. No tabata mi intenshon pa hasi boso doló, pero pa boso realisá kon grandi mi amor pa boso tur ta.

Pordoná esun ku a peka

⁵ Ora sierto persona a hasi un otro hende doló, no ta ami el a hasi doló, pero te na sierto límite — mi ta bisa asina pa mi no eksagerá — el a hasi boso tur doló.

⁶ Mayoria di boso a dun'é su kastigu kaba; esei ta sufisiente!

⁷ P'esei anto, awor ta mihó boso pordon'é i kurash'é pa e no bira muchu tristu i kai den desesperashon total.

⁸ P'esei mi ke pidi boso: lag'é mira ku boso ta stim'é.

⁹ Mi a skibi e promé karta, pasobra mi ker a mira si en realidat boso ta obedesé mi den tur kos.

¹⁰ Ora boso pordoná un hende loke el a hasi, ami tambe ta pordon'é. Pasobra si mi tin algu ku mi mester pordoná, mi ta hasié pa boso bon. Kristu ta mi testigu!

¹¹ Asina nos ta pordoná pa nos no laga satanas subi nos kabes, pasobra nos sa bon kiko su plannan ta.

Pablo a pasa den ansha na Troas

¹² Ora mi a yega Troas pa prediká e bon notisia tokante Kristu, mi a deskubrí ku Señor a habri un porta pa mi traha einan.

¹³ Pero mi tabata kontinuamente den ansha, pasobra mi no a topa ruman Tito. P'esei mi a bandoná Troas i a sigui pa Masedonia.

¹⁴ Pero mester yama Dios danki! E ta hiba nos semper den su marcha di viktoria, pasobra nos ta uní ku Kristu. I pa medio di nos, Dios ta plama konosementu tokante djE mes tur kaminda manera un holó dushi.

¹⁵ Pasobra nos ta manera e holó dushi di sensia ku Kristu ta ofresé Dios i ku ta plama tantu meimei di esnan ku ta haña salbashon komo meimei di esnan ku ta bai pèrdí.

¹⁶ Pa esnan ku ta bai pèrdí e ta un holó stinki i mortal, pa esnan ku ta haña salbashon e ta un holó dushi ku ta duna bida. Ken ta adekuá pa Dios us'é asin'ei? Niun hende! Nos tampoko;

¹⁷ nos no ta manera hopi otro hende ku ta hasi negoshi barata ku palabra di Dios, pero nos ta papia ku sinseridat, a base di nos union ku Kristu i den presensia di Dios, ku a manda nos.