2 Korintionan 11 - Papiamentu Bible 2013

Pablo i apòstelnan falsu

¹ Mare boso por soportá un poko lokura di mi parti! Sí, soportá mi!

² E zelo ku mi ta kuida boso kuné ta bini di Dios mes. Mi a komprometé boso pa kasa ku ún solo hòmber i mi ke hiba boso puru manera un bírgen serka djE; e hòmber ei ta Kristu.

³ Mi tin miedu ku meskos ku e kolebra a korumpí Eva ku su astusia, boso tambe ta laga korumpí boso i ku boso ta pèrdè boso deboshon sinsero i puru pa Kristu.

⁴ Mi ta papia asin'akí ku boso, pasobra si un hende bin prediká un ‘Hesus’, diferente for di Esun ku nos a prediká na boso, boso ta kore asept'é i fásilmente boso ta tuma un spiritu òf mensahe ku ta kompletamente diferente for di Spiritu Santu i e bon notisia ku boso a haña serka nos.

⁵ Tòg mi no ta mira kiko e ‘superapòstelnan’ ei di boso tin ku ami no tin!

⁶ Mi por ta un amatùr ora mi ta papia, pero, manera nos a demostrá boso tur na tur sorto di forma, konosementu sí mi tin!

⁷ Ora mi a anunsiá e bon notisia di Dios na boso, mi no a pidi boso niun kontribushon finansiero. Mi a rebahá mi mes pa hasi boso importante. Kisas ta algu malu mi a hasi?

⁸ Pa boso mi a aseptá kontribushon finansiero di e otro iglesianan i ta komo si fuera ta hòrta mi tabata hòrta nan pa por yuda boso!

⁹ Tempu mi tabata serka boso, ku mi a haña mi den pèrtá finansiero, mi no a pidi yudansa di niun hende. E rumannan di Masedonia a proveé den tur mi nesesidatnan. Sí, meskos ku mi no tabata un peso pa boso den pasado, lo mi no ta den futuro tampoko!

¹⁰ Anto mi ta orguyoso di esei, i mes sigur ku e bèrdat di Kristu ta biba den mi, mes sigur ta ku lo mi no laga niun hende na Gresia kita e motibu akí ku mi tin pa broma, fo'i mi.

¹¹ Di kon mi ta papia asina? Ta pasobra mi no ta stima boso? Nò, Dios mes sa ku mi ta stima boso!

¹² Lo mi sigui hasi loke mi ta hasiendo awor akí, ya e ‘superapòstelnan’ ei no ta haña niun motibu pa broma ku nan ta apòstel meskos ku nos.

¹³ E hendenan ei no ta apòstel berdadero; nan ta apòstel falsu ku ta gaña hende i ta presentá nan mes komo berdadero apòstel di Kristu.

¹⁴ Nada straño! Asta satanas ta presentá su mes komo angel di lus.

¹⁵ P'esei anto no ta nada ekstraordinario ku su sirbidónan ta presentá nan mes komo sirbidó di hustisia. Finalmente nan lo haña e kastigu ku nan meresé pa nan aktonan.

Pablo su sufrimentu komo apòstel

¹⁶ Mi ta ripití: niun hende no mester mira mi pa hende loko. Pero si boso hasié tòg, laga mi sigui hasi manera ta hende loko mi ta i broma un poko.

¹⁷ Loke mi ta bai bisa boso, mi no ta bisa komo sirbidó di Señor, pero mi ta papia manera un hende loko ku ta kere ku e por broma ku su mes kosnan.

¹⁸ Ya ku tin asina hopi hende ta broma djis pa motibu humano, mi tambe ta hasié.

¹⁹ Boso mes ku ta pretendé di ta asina sabí, ta soportá hende loko ku mashá grasia!

²⁰ Meskos asina boso ta soportá esnan ku ta trata boso manera katibu, abusá di boso, tuma boso hasi kèns, menospresiá boso i bòfta boso den boso kara.

²¹ Ku bèrgwensa mi tin ku atmití ku enberdat ami sí tabata muchu débil pa trata hende di e forma ei! Pero awor laga mi papia manera hende loko: si tin hende ku por broma ku sierto kos, mi tambe por!

²² Nan ta hebreo? Mi tambe! Nan ta israelita? Mi tambe! Nan ta desendiente di Abraham? Mi tambe!

²³ Nan ta sirbidó di Kristu? Awor sí mi ta papia manera hende loko mes: mi ta mas sirbidó di Kristu ku nan! Mi a traha mas duru, pasa mas tempu den prizòn, haña mas sla i haña mi hopi bia den peliger di morto!

²⁴ Sinku bia e hudiunan a duna mi e kastigu di 39 sla ku karbachi.

²⁵ Tres bia e romanonan a duna mi un halá di sota; un bia hende a piedra mi. Tres bia mi a haña mi den un situashon ku barku a kibra i un bia mi a pasa un dia i un anochi riba laman ganchu.

²⁶ Mi a pasa den hopi peliger durante mi tantísimo biahenan, esta peliger di riu, di ladron, di parti di mi mes kompatriotanan hudiu i hende no hudiu. Tabatin peliger den siudat, den lugá solitario, riba laman i di parti di ruman falsu.

²⁷ Mi mester a traha duru i soda; hopi bia mi a keda sin drumi. Mi a sufri hamber i set; hopi bia mi a keda sin kome, sin un dak riba mi kabes i sin sufisiente paña pa mi bisti.

²⁸ Anto aparte di tur otro kos, mi tin e peso diario di preokupashon pa e iglesianan.

²⁹ Ken ta sinti su mes suak sin ku ami tambe ta sinti suak huntu kuné? Ken ta kai den piká sin ku esei preokupá mi?

³⁰ Si ta broma mi mester broma, mi ta hasié ku loke ta demostrá mi debilidat!

³¹ Dios i Tata di nos Señor Hesus sa ku mi no ta gaña; bendishoná ta su nòmber pa semper.

³² A sosodé un bia ku e gobernador na Damasko, ku tabata bou di Rei Aretas, a pone guardia na porta di siudat pa arestá mi.

³³ Pero algun hende a laga mi baha den un makutu, via di un bentana ku tabatin den muraya di siudat i asina mi a skapa di su gara.