1 Timoteo 5 - Papiamentu Bible 2013

Obligashon ku otro hende

¹ No koregí un hende hòmber di edat na mal manera, pero papia kuné manera ta ku bo mes tata bo ta papia. Anto koregí e hóbennan manera ta bo mes ruman nan ta.

² Koregí e hende muhénan di edat manera ta bo mes mama nan ta i tambe e mucha muhénan hóben manera ta bo mes ruman nan ta, sin mal intenshon.

³ Sostené biuda ku a keda kompletamente nan so!

⁴ Pero si un biuda tin yu òf ñetu, ta nan mester siña kumpli promé ku nan deber ku nan mes famia i asina paga bèk loke nan famia a hasi pa nan. Esei ta agradá Dios.

⁵ E biuda ku a keda kompletamente so, sin niun hende pa kuid'é, a pone tur su speransa den Dios; di dia i anochi e ta resa, hasi petishon na Dios.

⁶ Pero un biuda ku ta entregá su mes na plaser a muri spiritualmente kaba, ounke e ta na bida ainda.

⁷ Ordená e biudanan pa nan sigui e instrukshonnan akí, ya niun hende no tin nada di reprochá nan.

⁸ Si un hende no kuida su mes famia, spesialmente esnan ku ta biba den kas huntu kuné, el a rechasá su fe i ta pió ku esnan ku no ta kere.

⁹ Pone riba lista di e biudanan solamente esnan di no ménos ku sesenta aña, ku tabata fiel na nan kasá.

¹⁰ Nan mester ta konosí komo hende ku ta hasi bon obra. Mester wak si nan a kria esnan ku a lanta serka nan bon, si nan a mustra hospitalidat, si nan a laba pia di esnan ku ta pertenesé na pueblo santu di Dios, si nan a yuda hende den problema, den un palabra, si nan a dediká nan mes na tur sorto di obra di karidat.

¹¹ Pero nenga di pone biuda hóben riba lista, pasobra ora e deseonan ku ta stroba nan di sirbi Kristu komo biuda lanta, nan ta haña gana di kasa atrobe!

¹² E ora ei nan lo ta kulpabel di a kibra e promesa ku nan a hasi anteriormente pa sirbi Kristu komo biuda.

¹³ Ademas nan ta tuma pa kustumber di pasa kas pa kas i hasi kos di floho; anto esei no ta tur kos, no solamente nan ta bira floho, pero tambe hasidó di redu ku ta mete den loke no ta toka nan i ta papia loke nan no mester papia!

¹⁴ P'esei mi ke pa e biudanan hóben kasa, haña yu i manehá nan kas, ya nan no ta duna nos enemigu chèns pa kritiká nos.

¹⁵ Pasobra algun di nan a desviá i ta sigui Satanas kaba!

¹⁶ Pero den kaso di e biudanan mas bieu, si un di nan ta famia di un muhé kreyente, t'é mester kuid'é i no lag'é bira un karga pa iglesia, ya asina iglesia por kuida e biudanan ku di bèrdat a keda kompletamente so.

Ansiano i kongregashon

¹⁷ E ansianonan ku ta guia iglesia bon, meresé dòbel honor, spesialmente esnan ku a tuma e trabou di prediká i duna siñansa.

¹⁸ Pasobra Skritura ta bisa: ‘No bisti un bue bosal, ora bo ta us'é pa trabou di bati trigo’ i ‘Un trahadó meresé su suèldu’.

¹⁹ No pèrmití pa niun hende, ku no tin dos òf tres testigu na su banda, entregá un akusashon kontra di un ansiano.

²⁰ Skual e ansianonan, ku ta sigui den piká, públikamente, ya e otronan ta kohe kurpa.

²¹ Mi ta enkargá bo seriamente, ku Dios, Hesu-Kristu i e angelnan skohí komo testigu, pa sigui e reglanan akí, sin diskriminá òf tuma parti pa niun hende!

²² No pone man riba hende muchu lihé ni bira kómplise den piká di otro hende; tene bo mes puru.

²³ No bebe awa so, pero bebe un tiki biña tambe pa bo stoma i e hopi malesanan ku bo sa sinti.

²⁴ Tin hende ku nan piká ta asina bisto ku promé ku hiba nan dilanti hues, nan piká mes a sali na kla kaba. Pero tin otro hende ku nan piká ta sali na kla te despues.

²⁵ Asina tambe bon obra ta bisto i asta esnan ku no ta dje bisto ei no ta keda skondí!