1 Timoteo 4 - Papiamentu Bible 2013

Siñadónan falsu

¹ Pero di otro banda Spiritu Santu ta bisa bon kla ku den e último dianan lo tin hende ku lo nenga nan fe, pasobra nan ta sigui spiritu ku ta engañá hende i siñansa di demoño.

² E siñansanan ei ta bini di e gañadónan hipókrita ku no tin niun klase di heful i ta hende ku ta aktua komo si fuera a kima nan konsenshi ku heru kayente.

³ E hendenan akí ta prohibí kasamentu i komementu di sierto kuminda. Pero Dios a krea e kosnan ei pa e kreyentenan i pa esnan ku konosé bèrdat aseptá nan ku gradisimentu na Dios.

⁴ Pues tur loke Dios a krea ta bon i no mester rechasá nada ku hende aseptá ku orashon di gradisimentu,

⁵ pasobra palabra di Dios huntu ku orashon di e kreyente ta pone ku tur kos ta keda dediká na Dios.

Un bon sirbidó di Kristu-Hesus

⁶ Si bo presentá e instrukshonnan akí na e rumannan, bo ta un bon sirbidó di Kristu-Hesus, alimentá pa e doktrina di nos fe i di e siñansa korekto ku bo ta sigui.

⁷ Pero keda leu di e leyendanan malisioso ku no ta nada mas ku blablamentu. Trein bo mes pa hiba un bida dediká,

⁸ pasobra entrenamentu físiko tin poko balor, pero un bida dediká na Dios tin hopi balor den tur sentido. Di un forma di biba asina bo por spera benefisio tantu den e bida akí komo den esun benidero.

⁹ Esei ta palabra konfiabel; tur hende mester asept'é!

¹⁰ P'esei mes nos ta mula kurpa i traha duru, pasobra nos a pone nos speransa den e Dios bibu, ku ta Salbador di tur hende, spesialmente di esnan ku ta kere den djE.

¹¹ E kosnan akí ta loke bo mester instruí i siña e hendenan.

¹² No laga niun hende menospresiá bo pasobra bo ta hóben, pero sea un ehèmpel pa e kreyentenan den bo manera di papia, bo kondukta, amor, fe i puresa.

¹³ Miéntras bo ta spera mi bishita, dediká bo mes na lesamentu di Skritura pa e kongregashon tende, na ekshortashon i na siñansa.

¹⁴ No neglishá e don spiritual ku bo a haña dia e ansianonan di iglesia a pone man riba bo i bo a risibí un mensahe profétiko.

¹⁵ Praktiká e kosnan akí, dediká bo mes na nan, ya tur hende ta mira ku bo ta progresá.

¹⁶ Keda kuida bo mes i paga tinu na loke bo ta siña otro hende. Sigui hasi e kosnan ku mi a bisa bo akí, pasobra si bo hasi nan lo bo salba bo mes i esnan ku ta skucha bo.