1 Samuel 31 - Papiamentu Bible 2013

Saul i su yu hòmbernan ta muri den guera

¹ Entretantu e filisteonan tabata bringa kontra Israel i e israelitanan a hui pa nan. Hopi di nan a muri riba seru Guilboa.

² E filisteonan a logra penetrá yega serka Saul i a mata su yu hòmbernan Yonatan, Abinadab i Malki-Shua.

³ Despues nan a konsentrá tur nan atake riba Saul. E tiradónan di flecha a deskubrié. Ora Saul a mira nan, el a haña mashá miedu.

⁴ P'esei el a bisa su ayudante: ‘Saka bo spada i hinka mi mata, pa e paganonan ei no bin hinka mi mata i hasi bofon di mi.’ Pero su ayudante no ker a hasié, pasobra e tabatin mashá miedu. E ora ei Saul a kohe su mes spada i a benta su kurpa riba dje.

⁵ Ora e ayudante a mira ku Saul a muri, e tambe a benta su kurpa riba su spada i a muri huntu kuné.

⁶ Riba e mesun dia ei a muri: Saul, su tres yu hòmbernan, su ayudante i tur su sòldánan.

⁷ Ora e israelitanan ku tabata biba na otro banda di e vaye i na e otro banda di Yordan a ripará ku e trupanan di Israel a hui i ku Saul i su yu hòmbernan a muri, nan a sali for di e siudatnan i nan tambe a hui. Despues e filisteonan a yega na e siudatnan ei i nan a keda biba ei.

⁸ Su manisé, ora e filisteonan a bai sakia e mortonan, nan a haña Saul i su yu hòmbernan morto den seru di Guilboa.

⁹ Nan a kap kabes di Saul kita afó i kita su armanan for di dje. Nan a manda mensahero pasa den henter teritorio filisteo pa konta e bon notisia den e tèmpelnan di nan diosnan falsu i na e pueblo.

¹⁰ Nan a pone Saul su armanan den tèmpel di Astarte i nan a kologá su kurpa na muraya di Bet-Shean.

¹¹ Ora e habitantenan di Yabèsh di Guilead a haña sa kiko e filisteonan a hasi ku Saul,

¹² tur e hòmbernan ku tabata sa kon usa arma a sali bai huntu. Despues di a kana henter anochi nan a kita e kurpanan di Saul i su yu hòmbernan for di muraya di Bet-Shean i nan a bai bèk Yabèsh, kaminda nan a kima e mortonan.

¹³ Nan a dera restunan di Saul i su yu hòmbernan bou di e palu di tamarisko na Yabèsh. Despues nan a yuna shete dia largu.